ដោយ៖ សុផារី
ភ្នំពេញ៖ ផលិតផលចំនួន០៥មុខទៀត រួមមាន អង្ករបាត់ដំបង បង្គារក្រៀមកំពង់សោម បង្គារក្រៀមកោះកុង ប្រហុកត្រីសៀមរាប អំបិល និងផ្កាអំបិលកំពត-កែប ដែលជាផលិតផលសក្តានុពលនៃប្រទេសកម្ពុជា ត្រៀមចុះបញ្ជីម៉ាកសម្គាល់ភូមិសាស្រ្តទំនិញ ឬម៉ាកសមូហភាព។
នេះជាការបញ្ជាក់របស់លោក សួន វិជ្ជា ទីប្រឹក្សាក្រសួងពាណិជ្ជកម្ម និងជាប្រធានលេខាធិការដ្ឋាននៃគណៈកម្មាធិការជាតិគ្រប់គ្រងកម្មសិទ្ធិបញ្ញា និងជាប្រធាននាយកដ្ឋានកម្មសិទ្ធិបញ្ញា នៅក្នុងសិក្ខាសាលាពិគ្រោះយោបល់ស្តីពី ទស្សនទាន និងអត្ថប្រយោជន៍នៃ ការចុះបញ្ជីម៉ាកសម្គាល់ភូមិសាស្រ្តទំនិញ “អំបិល និងផ្កាអំបិលកំពត-កែប” និងការបង្កើតសមាគមម៉ាកសម្គាល់ភូមិសាស្រ្តទំនិញ កាលពីថ្ងៃទី១៥ ខែកក្កដាម្សិលមិញ។
លោកបន្ថែមទៀតថា ក្រសួងពាណិជ្ជកម្មបានខិតខំស្វះស្វែងរកអង្គការដៃគូអភិវឌ្ឍន៍ ដើម្បីសិក្សាលទ្ធភាពក្នុងការចុះបញ្ជីម៉ាកសម្គាល់ភូមិសាស្រ្តទំនិញ ឬម៉ាកសមូហភាព លើវិស័យកសិកម្ម និងជលផលរួមមាន៖ “អង្ករបាត់ដំបង” “បង្គារក្រៀមកំពង់សោម” “បង្គារក្រៀមកោះកុង” និង “ប្រហុកត្រីសៀមរាប” ដែលជាផលិតផលសក្តានុពលនៃប្រទេសកម្ពុជា។
នាយកដ្ឋានកម្មសិទ្ធិបញ្ញា នៃក្រសួងពាណិជ្ជកម្ម បានសហការជាមួយជំនាញការថ្នាក់ជាតិ និងអន្តរជាតិរបស់ អង្គការ WIPO ក្នុងការរៀបចំសិក្ខាសាលាផ្សព្វផ្សាយ និងបានចុះយកសំណាក់ (ទឹកសមុទ្រ ដី និងអំបិល) ដើម្បីយកទៅពិនិត្យអំពីគុណភាព “អំបិល និងផ្កាអំបិលកំពត-កែប” ក្នុងមណ្ឌលផលិតកម្មទាំង ៧ រួមមាន បឹងទូក ត្រើយកោះ បឹងរួង១ បឹងរួង ២ សេះស កែប និងកំពង់ត្រាច និងទទួលបានលទ្ធផលជាវិជ្ជមាន និងអាចបញ្ចូលក្នុងតំបន់ផលិតកម្ម “អំបិល និងផ្កាអំបិលកំពត-កែប” បាន។
នាយកដ្ឋាននឹងសហការជាមួយអង្គការ AFD ដើម្បីរៀបចំបង្កើតសមាគមម៉ាកសម្គាល់ភូមិសាស្រ្តទំនិញ ដើម្បីចូលរួមរៀបចំសៀវភៅលក្ខន្តិកៈសមាគម បទបញ្ជាផ្ទៃក្នុង សៀវភៅបន្ទុកម៉ាកសម្គាល់ភូមិសាស្រ្តទំនិញ រូបសញ្ញាម៉ាកសម្គាល់ភូមិសាស្រ្តទំនិញ “អំបិល និងផ្កាអំបិលកំពត-កែប” និងឯកសារពាក់ព័ន្ធផ្សេងៗ។
លោកបានស្នើឱ្យគ្រប់ភាគីពាក់ព័ន្ធទាំងអស់ ចូលរួមអនុវត្តគម្រោងចុះបញ្ជីម៉ាកសម្គាល់ភូមិសាស្រ្តទំនិញ “អំបិល និងផ្កាអំបិលកំពត-កែប” ឱ្យបានទទួលជោគជ័យ ក្នុងពេលឆាប់ៗខាងមុខនេះ៕
