ដោយៈ ម៉ាលីនណា
ភ្នំពេញៈ ទំហំពាណិជ្ជកម្មទ្វេភាគីរវាងកម្ពុជា-ជប៉ុន សម្រេចបានប្រមាណ៧៧៨លានដុល្លារ កើនឡើងក្នុងអត្រា១២,៣ភាគរយ ក្នុងរយៈពេល៥ខែដើមឆ្នាំនេះ បើធៀបនឹងរយៈពេលដូចគ្នាក្នុងឆ្នាំមុន។
យោងតាមរបាយការណ៍របស់ អគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា ការនាំចេញទំនិញពីកម្ពុជាទៅជប៉ុន៥ខែនេះ មានទំហំទឹកប្រាក់ជាង៤៦២លានដុល្លារ ដែលមានការកើនឡើងប្រមាណ១០,៣ភាគរយ បើធៀបរយៈពេលដូចគ្នាក្នុងឆ្នាំ២០២១ ដែលមានជាង៤១៩លានដុល្លារ។
ចំណែកការនាំចូលទំនិញពីជប៉ុនមកកម្ពុជាវិញ មានទំហំប្រមាណ ៣១៦លានដុល្លារ មានការកើនឡើងក្នុងអត្រា១៥,៤ភាគរយ បើធៀបរយៈពេលដូចគ្នា ដែលមានទំហំទឹកប្រាក់ជាង២៧៣លានដុល្លារកាលពីឆ្នាំមុន។
ចំពោះប្រភេទមុខទំនិញដែលកម្ពុជា នាំចូលពីជប៉ុន មានដូចជា រថយន្ត គ្រឿងអេឡិចត្រូនិក គ្រឿងចក្រ និងប្លាស្ទិក ជាដើម។ រីឯទំនិញដែលកម្ពុជានាំចេញទៅប្រទេសជប៉ុន មានផលិតផលស្បែក កាបូប ស្បែកជើង សម្លៀកបំពាក់។ល។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា បច្ចុប្បន្ននេះទាំងស្ថានទូត ទាំងវិនិយោគិនជប៉ុន បានស្វះស្វែងចូលមកកម្ពុជាជាច្រើន ដើម្បីរកឱកាសវិនិយោគនៅកម្ពុជា។ លោកឧកញ៉ាបានឱ្យដឹងទៀតថា ក្រសួងពាណិជ្ជកម្ម ក៏កំពុងជំរុញកិច្ចព្រមព្រៀងសេរីទ្វេភាគីផងដែរ ដែលនេះគឺជាចំណុចល្អសម្រាប់កម្ពុជា៕