ដោយ៖ សុផារី
សៀមរាប៖ ក្រោយបើកជើងហោះហើរឡើងវិញ ជាមួយនឹងការបន្ធូរបន្ថយលក្ខខណ្ឌចេញចូលផងដែរនោះ កម្ពុជាទទួលបានភ្ញៀវទេសចរបរទេស ចូលមកទស្សនានៅតំបន់វប្បធម៌អង្គរកើនឡើងវិញជាបន្តបន្ទាប់។
ជាក់ស្តែង នៅរយៈពេល៦ខែដើមឆ្នាំ២០២២នេះ ភ្ញៀវទេសចរ ដែលទិញសំបុត្រចូលទស្សនាតំបន់អង្គរ ប្រាសាទកោះកែរ និងកំពង់ផែចុងឃ្នៀស មានចំនួន៥៩.៩៨៣នាក់ កើនឡើងជាង១០០០%។ នេះបើយោងតាមរបាយការណ៍ទិន្នន័យរបស់គ្រឹះស្ថានអង្គរ ចេញផ្សាយនៅដើមខែកក្កដា ឆ្នាំ២០២២នេះ។
តាមរយៈការកើនឡើងនេះធ្វើឱ្យកម្ពុជាទទួលបានចំណូលចំនួន២.៤២០.០៨១ដុល្លារអាមេរិក កើនឡើង១០០៣ភាគរយ បើធៀបនឹងរយៈពេលដូចគ្នាឆ្នាំ២០២១។
កំណើនចំនួនភ្ញៀវទេសចរបរទេសនេះ បង្ហាញពីសញ្ញាល្អនៃការវិលត្រឡប់របស់ភ្ញៀវទេសចរ បន្ទាប់ពីអាក់ខានដើរហើរ អស់រយៈពេលជាង២ឆ្នាំ ដោយសារវិបត្តិនៃជំងឺរាតត្បាតកូវីដ១៩៕