ដោយៈ សុខុម
បាងកក: ប្រជាជនឥណ្ឌា និងម៉ាឡេស៊ី មានចំនួនច្រើនជាងក្នុងចំណោមភ្ញៀវទេសចរអន្តរជាតិ ដែលហូរប្រទេសថៃ បន្ទាប់ពីប្រទេសនេះបានបន្ធូរបន្ថយការរឹតបន្តឹងច្រកចូល ដោយនៅឆមាសទី១ ដើមឆ្នាំ២០២២ នេះទទួលបានទេសចរបរទេសលើស២លាននាក់។
លោកស្រី Traisuree Taisaranakul អ្នកនាំពាក្យរដ្ឋាភិបាលថៃ បានលើកឡើង តាមរយៈសេចក្ដីថ្លែងការណ៍កាលពីថ្ងៃច័ន្ទ ដើមសប្ដាហ៍នេះថា ចំនួនភ្ញៀវទេសចរបរទេស មានចំនួនសរុប២,០៣លាននាក់ គិតចាប់ពីថ្ងៃទី០១ ខែមករា ដល់ថ្ងៃទី២៦ ខែមិថុនា។
លោកស្រីបានបន្ថែមទៀតថា ភ្ញៀវទេសចរដែលមកពីប្រទេសឥណ្ឌា ម៉ាឡេស៊ី អង់គ្លេស សិង្ហបុរី និងសហរដ្ឋអាមេរិក មានចំនួនច្រើនជាងគេ។
យោងតាមសារព័ត៌មានThe Star ឱ្យដឹងថា ឧស្សាហកម្មទេសចរណ៍របស់ប្រទេសថៃ ដែលស្ទើរតែធ្លាក់ដល់ចំណុចសូន្យ ដោយសារវិបត្តិកូវីដ-១៩ រំពឹងខ្ពស់ថា នឹងទទួលបានកំណើនទេសចរប្រចាំខែ ជាមធ្យមរហូតដល់ប្រមាណ១,៥លាននាក់ នៅខែកក្កដាខាងមុខនេះ នៅពេលប្រព័ន្ធ Thailand Pass ដែលតម្រូវឱ្យទិញធានារ៉ាប់រងពេលចូលប្រទេសថៃ ត្រូវបានលុបចោល។
មជ្ឈមណ្ឌលគ្រប់គ្រងស្ថានការណ៍កូវីដ-១៩ (CCSA) របស់ប្រទេសថៃ បានប្រកាសលុបចោលទាំងស្រុងនូវប្រព័ន្ធ Thailand Pass សម្រាប់អ្នកដំណើរដែលចូលប្រទេសថៃ ក្នុងខែនេះ ដោយលុបចោលការតម្រូវឱ្យចុះឈ្មោះ និងការទិញធានារ៉ាប់រងមុនពេលមកដល់។
ថៃ ដែលជាសេដ្ឋកិច្ចធំបំផុតទី២ នៅអាស៊ីអាគ្នេយ៍ ក៏បានបន្ធូរបន្ថយការរឹតបន្តឹងកូវីដ-១៩ លើការធ្វើដំណើរ និងអាជីវកម្មផងដែរ ដោយហាងស្រា និងបារ ពេលនេះត្រូវបានអនុញ្ញាត ឱ្យបើកដំណើរការតាមម៉ោងធម្មតាឡើងវិញ។
លោក Phiphat Ratchakitprakarn រដ្ឋមន្ត្រីក្រសួងទេសចរណ៍ និងកីឡាថៃ បានលើកឡើងកាលពីសប្តាហ៍មុនថា រូបិយប័ណ្ណបាតចុះថោក និងការអនុញ្ញាតឱ្យប្រើប្រាស់កញ្ឆា ដោយស្របច្បាប់កាលពីពេលថ្មីៗនេះ ក៏ប្រហែលជាអាចជួយរួមចំណែក នាំយកភ្ញៀវទេសចរកាន់តែច្រើន មកកាន់ប្រទេសថៃ វិញផងដែរ៕ Laotian Times៕
