ដោយ៖ លាងហួរ
ប្រទេសថៃ៖ ធនាគារពិភពលោកបានព្យាករណ៍ថា អតិផរណាខ្ពស់ និងបំណុលគ្រួសារ នឹងក្លាយជាហានិភ័យសំខាន់ៗក្នុងការរារាំងដល់កំណើនសេដ្ឋកិច្ចរបស់ប្រទេសថៃ នៅឆ្នាំ២០២២នេះ។ នេះបើយោងតាមសារពត៌មាន The Nation Thailand ចុះផ្សាយនៅថ្ងៃទី២៩ ខែមិថុនា ឆ្នាំ២០២២នេះ។
ធនាគារពិភពលោក បានព្យាករណ៍ថា សេដ្ឋកិច្ចរបស់ប្រទេសថៃ នឹងកើនឡើង២,៩ភាគរយនៅឆ្នាំនេះ ដោយសារឧស្សាហកម្មទេសចរណ៍ និងការប្រើប្រាស់ឯកជន ដែលបង្ហាញសញ្ញាវិជ្ជមាននៃការងើបឡើងវិញ។
ទោះយ៉ាងណាក៏ដោយ មានផ្នែកមួយចំនួនគួរឱ្យព្រួយបារម្ភ គឺការកើនឡើងតម្លៃយ៉ាងឆាប់រហ័ស និងបំណុលគ្រួសារ ដែលអាចជះផលប៉ះពាល់ ដល់កំណើនសេដ្ឋកិច្ចប្រទេសថៃ។
ទន្ទឹមនឹងនេះ ភាពតានតឹងជាសាកល បណ្តាលពីសង្គ្រាមរុស្ស៊ី-អ៊ុយក្រែន និងភាពមិនច្បាស់លាស់នៃជំងឺរាតត្បាត នៅក្នុងប្រទេសចិន ចាំបាច់ត្រូវតាមដានយ៉ាងដិតដល់ផងដែរ ដោយសារបញ្ហាទាំងពីរនេះ ប៉ះពាល់ដល់ការពឹងផ្អែកប្រេងរបស់ប្រទេសថៃ និងភាពងាយរងគ្រោះក្នុងការរំខានដល់ខ្សែសង្វាក់ផ្គត់ផ្គង់។
លោក Kiatipong Ariyapruchya សេដ្ឋវិទូជាន់ខ្ពស់របស់ប្រទេសថៃ បានមានប្រសាសន៍ថា ប្រទេសថៃទាមទារវិធានការមួយចំនួន ដើម្បីគ្រប់គ្រងតម្លៃទំនិញឱ្យបាន។ ទន្ទឹមនឹងនេះ ទោះបីជាប្រព័ន្ធហិរញ្ញវត្ថុនៅតែមានស្ថេរភាពជារួមក៏ដោយ ហានិភ័យទាក់ទងនឹងការកើនឡើងនៃកម្រិតបំណុលសាជីវកម្ម និងគ្រួសារនៅតែមាន។
ធនាគារពិភពលោកបានព្យាករណ៍ថា អតិផរណារបស់ប្រទេសថៃ នឹងស្ថិតនៅកម្រិតខ្ពស់ត្រឹម៥,២ភាគរយនៅឆ្នាំ២០២២នេះ ជាមួយនឹងអតិផរណាស្នូលនៅ២,៣ភាគរយ មុននឹងធ្លាក់ចុះមកនៅត្រឹម២,២ភាគរយ នៅឆ្នាំក្រោយ។ ការនាំចេញទំនិញរបស់ប្រទេសថៃ ត្រូវបានគេរំពឹងថា នឹងកើនឡើងក្នុងអត្រា៤,១ភាគរយក្នុងឆ្នាំ២០២២៕
|