ដោយៈគង់ សូរិយា
ភ្នំពេញៈ សមាគមអ្នកអភិវឌ្ឈន៍ដីឡូត៍កម្ពុជា (CLDA) បានរៀបចំសិក្ខាសាលាក្រោមប្រធានបទ “ការរៀបចំប្រព័ន្ធគ្រប់គ្រងការងារផ្ទៃក្នុង ស្រ បតាមស្តង់ដារ និងឱកាសបណ្ដាក់ទុនវិនិយោគពីក្រៅប្រទេស” ដែលកម្មវិធីនេះ បានប្រារព្ធឡើងនៅទីស្នាក់ការសមាគមអ្នកអភិវឌ្ឈន៍ដីឡូត៍កម្ពុជា។
កម្មវិធីនេះមានការអញ្ជើញចូលរួម ពីថ្នាក់ដឹកនាំជាន់ខ្ពស់របស់សមាគ មគឺ លោកឧកញ៉ា ម៉ន សុខា ប្រធានសមាគម លោកឧកញ៉ាម៉ាន់ ច័ន្ទឌី ទីប្រឹក្សាសមាគម និងជាអគ្គនាយកក្រុមហ៊ុនIQI CAMBODIA លោក រស់ សុវណ្ណថា អគ្គលេខាធិការសមាគម និងជាស្ថាបនិកក្រុមហ៊ុន NSO TECHNOLOGY ព្រមទាំងបងប្អូនសមាជិក សមាជិកា ជាច្រើនរូបទៀត។
សកម្មភាពចម្បងនៃសិក្ខាសាលានេះ គឺធ្វើយ៉ាងណាអោយសិក្ខាកាម និងសមាជិក សមាជិកា ដែលចូលរួម មានឱកាសកសាងបណ្តាញទំនាក់ទំនង (Networking) ការជជែកដេញដោលដើម្បីស្វែងរកបញ្ហា និងដំណោះស្រាយ ការរៀបចំប្រព័ន្ធគ្រប់គ្រងផ្ទៃក្នុង ស្របតាមស្តង់ដារបច្ចេក ទេស និងឱកាស ក្នុងការគៀងគរបណ្តាវិនិគិនពីក្រៅប្រទេស ដែលជា” វេទិកាប្រឹក្សាយោបល់ និងផ្ដល់ដំណោះស្រាយអាជីវកម្ម អចនវត្ថុ៣៦០ដឺក្រេ” ដើម្បីចែកជូនដល់សិក្ខាកាម ដែលបានអញ្ជើញចូលរួម។
លោកឧកញ៉ា ម៉ាន់ ច័ន្ទឌី ទីប្រឹក្សាសមាគមបានមានប្រសាសន៍ថា អ្នកធុរកិច្ចនានាគួរដើរចេញក្រៅផ្ទះ (ចេញទៅបរទេស)ឲ្យបានច្រើន ដើម្បីសិក្សារៀនសូត្រ យកបទពិសោធន៍ និងបង្កើតមិត្តល្អៗនៅក្រៅប្រទេស និងពង្រឹងការងារផ្ទៃក្នុងក្រុមហ៊ុនរបស់យើង ឲ្យមានស្តង់ដាជាក់លាក់ ដើម្បីយើងអាចទាក់ទាញការវិនិយោគពីបរទេសបាន ពិសេសទាក់ទាញក្រុមហ៊ុនអន្តរជាតិនានាមកចាប់ដៃគូជាមួយយើង។
លោកបន្តថា “ខ្ញុំទទួលបានវិនិយោគិនពីបរទេស ជាដៃគូលើក្រុមហ៊ុនមួយចំនួន ដើម្បីពង្រីកផែនការវិនិយោគ ប៉ុន្តែមុនសម្រេចបាននូវលទ្ឋផលទាំងនេះ ខ្ញុំបានចេញសិក្សាស្វែងយល់ពីការងារ និងរៀនសូត្រនៅបរទេសតាំងពីឆ្នាំ២០១៦”។
ជាមួយគ្នានេះ លោកឧកញ៉ាម៉ន សុខាប្រធានសមាគមអ្នកអភិវឌ្ឍន៍ដីឡូត៍កម្ពុជាបានមានប្រសាសន៍ថា សមាគមបាននិងកំពុងដើរតួនាទីកាន់តែមានសារៈសំខាន់ ដើម្បីផ្តល់ឱកាសចែករំលែកចំណេះដឹង បទពិសោធន៍ដល់សមាជិកសមាគម ដើម្បីពួកគាត់អាចពង្រីកមូលដ្ឋាននៃការវិនិយោគរបស់ខ្លួនកាន់តែធំ និងទទួលបានជោគជ័យថ្មីៗទៀត។
លោកបន្តថា “ជាមួយគ្នានេះ សមាគមក៏បាននិងកំពុងចូលរួមផ្សព្វផ្សាយច្បាប់ បទបញ្ញត្តិនានា ដល់សមាជិកសមាគម ដោយសហការជាមួយស្ថាប័នពាក់ព័ន្ឋ ដើម្បីឲ្យអ្នកអភិវឌ្ឍន៍នានាដើរស្របតាមគន្លង និងផែនការអភិវឌ្ឍន៍របស់រាជរដ្ឋាភិបាលកម្ពុជា”៕
