ដោយគង់ ម៉ាលីន
ភ្នំពេញៈ មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា វិស័យសហគ្រាសធុនតូច និងមធ្យមនឹងងើបឡើងវិញនៅក្នុងបច្ចុប្បន្ន ខណៈរដ្ឋាភិបាលបានបង្ហូរសាច់ប្រាក់ជួយប្រជាពលរដ្ឋ។
លោកវង្សី វិស្សុតរដ្ឋលេខាធិកាក្រសួងសេដ្ឋកិច្ច និងហិរញ្ញវត្ថុបានថ្លែងក្នុងសន្និសីទសារព៌តមាននាព្រឹកថ្ងៃទី៨ កក្កដានេះថា រដ្ឋាភិបាលបានបង្កើតមេទ័ពក្នុងវិស័យឯកជន ខណៈមេទ័ព ក្នុងវិស័យសាធារណៈក៏រដ្ឋាភិបាលបានរៀបចំរួចហើយ ហេតុនេះទើបរដ្ឋាភិបាលបាននិងកំពុងរៀបចំមជ្ឈមណ្ឌលSME ដើម្បីជួយលើកកំពស់វិស័យនេះ តាមរយៈគោលនយោបាយ ការបង្កើតការងារ ការបណ្តុះបណ្តាលជាដើម។
លោកបន្តថា “ក្នុងកាលៈទេសៈនេះវិស័យSMEងើបឡើងវិញ ដោយសារការចំណាយរបស់ប្រជាពលរដ្ឋ ដែលទទួលបានការឧបត្ថម្ភពីរដ្ឋាភិបាល ដល់ប្រជាពលរដ្ឋក្រីក្រ ដែលពួកគេនឹងចំណាយ ខុសពីអ្នកមានដែលបានលុយទុកខ្លះចាយខ្លះ តែអ្នកក្រីក្រចាយច្រើន”។
លោកវង្សី វិស្សុតបានបន្តថា ក្នុងវិស័យសហគ្រាសធុនតូច និងមធ្យម រដ្ឋាភិបាលក៏បានកសាងគោលនយោបាយជាច្រើន ដើម្បីលើកទឹកចិត្តដល់វិស័យសហគ្រាសធុនតូច និងមធ្យម ដែលកំពុងមានការងើបឡើងវិញ៕
