ដោយ៖ សុផារី
បន្ទាយមានជ័យ៖ រដ្ឋបាលក្រុងប៉ោយប៉ែត នៅថ្ងៃទី១៨ ខែឧសភា ឆ្នាំ២០២២ បានបើកការដ្ឋានសាងសង់ “សួនប៉ោយប៉ែតតេជោឈ្នះឈ្នះ” ប្រវែង២៥០ម៉ែត្រ ដែលមានទីតាំងនៅចន្លោះផ្លូវជាតិលេខ៥ និងផ្លូវដែក ដើម្បីលើកមុខលើកមាត់ទឹកដីជាយដែន នាខេត្តបន្ទាយមានជ័យ។
ពិធីបើកការដ្ឋានសាងសង់សួនប៉ោយប៉ែតតេជោឈ្នះឈ្នះ នៅតាមបណ្តោយផ្លូវជាតិលេខ ៥នេះ ជាសមិទ្ទិផលថ្មីស្រឡាងមួយ ក្នុងចំណោមសទ្ធិផលនានា នៅក្នុងទីក្រុងប៉ោយប៉ែត ដែលនឹងជំរុញប្រជាប្រិយភាព សោភ័ណភាព និងលើកមុខលើកមាត់ទឹកដីជាយដែន នា ខេត្តបន្ទាយមានជ័យ។
គម្រោងស្ថាបនាសួនប៉ោយប៉ែតតេជោឈ្នះឈ្នះ បានលេចជារូបរាងឡើង បន្ទាប់ពីមានការ សម្របសម្រួលរវាងអាជ្ញាធរ និងប្រជាពលរដ្ឋ ដែលបានតាំងលំនៅដ្ឋានលើចំណីផ្លូវសាធារណៈ ក្នុងពេលកន្លងមក ដោយបានយល់ព្រមរុះរើ ឱ្យអាជ្ញាធរធ្វើការអភិវឌ្ឍតំបន់នេះ ទៅជាប្រយោជន៍សាធារណៈ។
ពួកគាត់ក៏ទទួលបានការសណ្ដោសប្រណី ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តល់នូវដីលំនៅឋានស្របច្បាប់ ក្នុង១គ្រួសារ១ឡូតិ៍ក្បាលដី នៅភូមិបឹងជង្រុកតេជោឈ្នះឈ្នះ៕
