ដោយ៖ សុផារី
កំពង់ស្ពឺ៖ ក្រុមអ្នកធុរកិច្ចម៉ាឡេស៊ីមានគម្រោងដាក់ទុនវិនិយោគលើការដាំដុះរុក្ខជាតិអំបូរកញ្ឆា និងរុក្ខជាតិតិណទេសផ្សេងទៀត ដើម្បីផលិតឱសថនាំចេញនៅក្នុងខេត្តកំពង់ស្ពឺ បន្ទាប់ពីមើលឃើញពីសក្ដានុពលជាច្រើននៃខេត្តមួយនេះ ប៉ុន្តែសំណើរនេះត្រូវបានលោកអភិបាលខេត្តបដិសេដ។
ក្នុងជំនួបពិភាក្សាការងារជាមួយលោក វ៉ី សំណាង អភិបាលខេត្តកំពង់ស្ពឺ នៅសាលាខេត្តកំពង់ស្ពឺនាថ្ងៃទី៥ ខែឧសភា ឆ្នាំ២០២២ លោក ដាតូ តេគឹមពូ នាយកក្រុមហ៊ុន អេដេង លេន ឯ.ក បានលើកឡើងថា ក្រុមហ៊ុនរបស់លោក និងក្រុមការងារធុរៈកិច្ចទី១ មានគោលបំណងចំនួន៤ ដែលចង់ដាក់ទុនវិនិយោគនៅក្នុងខេត្តកំពង់ស្ពឺ។
លោកបញ្ជាក់ថា ក្នុងនោះ គឺចង់វិនិយោគលើការដាំដុះរុក្ខជាតិអំបូរកញ្ឆា និងរុក្ខជាតិតិណទេសផ្សេងទៀត ដើម្បីផលិតឱសថនាំចេញបង្កើតខ្សែសង្វាក់ផលិតកម្មរោងចក្រសម្រាប់កែច្នៃ និងចម្រាញ់រុក្ខជាតិនេះ ស្វែងយល់ពីព័ត៌មានលម្អិតបន្ថែមស្តីពីការលើកទឹកចិត្តរបស់ក្រុមប្រឹក្សាអភិវឌ្ឍន៍កម្ពុជា និងស្វែងយល់ពីលទ្ធភាពនៃការអភិវឌ្ឍអចលនទ្រព្យ ឧស្សាហកម្ម នៅខេត្តកំពង់ស្ពឺ។
លោកបន្ដថា ការគ្រោងដាក់ទុនវិនិយោគនៅក្នុងខេត្តកំពង់ស្ពឺនេះ គឺជាខេត្តគោលដៅ ព្រោះខេត្តនេះមានសក្តានុពលគ្រប់គ្រាន់ដែលក្រុមហ៊ុនអាចដាក់ទុនវិនិយោគបាន ខណៈលោកមានផែនការចង់អភិវឌ្ឍន៍ខេត្តកំពង់ស្ពឺឱ្យក្លាយជាខេត្តសួនឧស្សាហកម្ម។
លោក វ៉ី សំណាង បានច្រានចោលការស្នើសុំវិនិយោគលើការដាំដុះអំបូររុក្ខជាតិកញ្ឆានិងរុក្ខជាតិតិណទេស ដែលក្រុមហ៊ុននេះអះអាងថា កែច្នៃធ្វើជាឱសថសម្រាប់នាំចេញ។
លោកថា ការដាំដុះកញ្ឆាគឺ ជាការល្មើសនឹងប្រឆាំងនឹងច្បាប់នៃកម្ពុជា ដែលនៅកម្ពុជាកញ្ឆាត្រូវបានចាត់ជាគ្រឿងញៀន។ យ៉ាងណាក្តី លោកបានឯកភាពលើសំណើ ដែលក្រុមហ៊ុនចង់វិនិយោគលើវិស័យអចលនទ្រព្យឧស្សាហកម្ម។
លោកបានមានប្រសាសន៍ថា “នៅខេត្តកំពង់ស្ពឺមានចម្ការស្វាយរាប់ម៉ឺនហិកតាដែលប្រជាកសិករខេត្តនេះដាំបាន ដូច្នេះក្រុម ហ៊ុនអាចសិក្សានិងបង្កើតរោងចក្រសម្រាប់កែច្នៃផ្លែស្វាយនេះបាន។ មិនតែប៉ុណ្ណោះ ខេត្តក៏មានធនធានច្រើនទៀតដូចជា រមណីយដ្ឋានសម្បូរបែប ទាំងរមណីយដ្ឋានធម្មជាតិ កែច្នៃ និងកសិទេសចរណ៍ មានធនធានរ៉ែ មានផ្ទៃដីដែលអំណោយផលដល់វិស័យកសិកម្ម មានទីតាំងល្អសម្រាប់វិស័យអចលនទ្រព្យ និងឧស្សាហកម្ម ដែលក្រុម ហ៊ុនអាចដាក់ទុនវិនិយោគនៅក្នុងខេត្តនេះបាន”៕
