ដោយៈគង់ ម៉ាលីនណា
ភ្នំពេញៈ ស្របពេលសេដ្ឋកិច្ចវិលមករកភាពប្រសើរឡើង វិស័យធនាគារនិងហិរញ្ញវត្ថុ នៅតែមានសុខភាពភាពរ៉ឹងមាំ ជាក់ស្តែងធនាគារហត្ថាដែលជាធនាគារធំមួយនៅកម្ពុជា នៅតែមានសុខភាពល្អប្រសើរ។
ប្រធានអគ្គនាយកធនាគារហត្ថា លោកឧកញ៉ាហួត អៀងតុងបានមានប្រសាសន៍ឲ្យដឹងតាមទូរស័ព្ទ កាលពីថ្ងៃទី៣ មិនាកន្លងមកថា ស្ថានភាពឥណទាន និងប្រាក់បញ្ញើក្នុងរយៈពេលពីរខែដើមឆ្នាំនេះ មានភាពល្អប្រសើរ និងសម្រេចបានតាមអ្វីដែលយើងចង់បាន។
លោកឧកញ៉ាបានបន្តថា “ជាមួយនឹងសុខភាពឥណទាន និងការដាក់ប្រាក់បញ្ញើរសម្រេចបានតាមផែនការ ស្របពេលធនាគារបាន និងកំពុងបន្តវិនិយោគលើចច្ចេកវិទ្យាហិរញ្ញវត្ថុ ដើម្បីផ្តល់ភាពងាយស្រួលដល់អ្នកប្រើប្រាស់ និងមានប្រសិទ្ឋភាព សុវត្ថិភាពខ្ពស់”។
លោកឧកញ៉ាហួត អៀងតុងបានបន្តថា ជាមួយគ្នានេះ ធនាគារកំពុងដាក់ឲ្យសាកល្បងនូវប្រព័ន្ឋ Smart Banking បណ្តើរៗ ដែលជាការធ្វើតេស្តលើប្រព័ន្ឋបច្ចេកវិទ្យាហិរញ្ញវត្ថុថ្មីមួយ ដើម្បីធ្វើឲ្យធនាគារកាន់តែពង្រីកសេវាកម្មទូទាត់កាន់តែប្រសើរ ឆាប់រហ័ស និងសុវត្ថិភាពដល់អតិថិជន។
ធនាគារហត្ថាបានរីកចម្រើនយ៉ាងឆាប់រហ័ស បន្ទាប់ពីគ្រឹះស្ថាននេះបានប្រែក្លាយពីមីក្រូហិរញ្ញវត្ថុហត្ថា ក្រោយពីស្ថាប័ននេះបានលក់ភាគហ៊ុនមួយចំនួនដល់ធនាគារក្រុងស្រ៊ី ដែលជាធនាគារឈានមុខគេមួយនៅប្រទេសថៃ៕
