ដោយ៖ ម៉ាណេត
ភ្នំពេញៈ សៀវភៅ “ការកសាងវិស័យហិរញ្ញវត្ថុប្រកបដោយបរិយាបន្ន” បានចងក្រងឡើង ដើម្បីបម្រើជាអត្ថប្រយោជន៍សម្រាប់ប្រទេសកម្ពុជា និងចែករំលែកនូវបទពិសោធន៍ ក្នុងវិស័យហិរញ្ញវត្ថុដ៏មានតម្លៃរបស់កម្ពុជា ដល់ប្រទេសផ្សេងៗលើពិភពលោក ជាពិសេសប្រទេសកំពុងអភិវឌ្ឍន៍ដទៃៗទៀត ។
នៅថ្ងៃទី៨ ខែកញ្ញា ឆ្នាំ២០២០ លោក រ័ត្ន សុវណ្ណនរៈ អគ្គនាយកត្រួតពិនិត្យនៃធនាគារជាតិនៃកម្ពុជា បានអញ្ជើញជាអធិបតីក្នុងពិធីប្រគល់សៀវភៅប្រវត្តិ និងការអភិវ ឌ្ឍវិស័យមីក្រូហិរញ្ញវត្ថុនៅកម្ពុជា “ការកសាងវិស័យហិរញ្ញវត្ថុ ប្រកបដោយបរិយាបន្ន” ជូនតំណាងគ្រឹះស្ថានធនាគារ និងហិរញ្ញវត្ថុនៅកម្ពុជា។
សៀវភៅនេះរៀបរាប់អំពីដំណើរកកើត នៃវិស័យមីក្រូហិរញ្ញវត្ថុនៅកម្ពុជា គោលបំណង និងបុព្វហេតុនៃការអភិវឌ្ឍ ពីដំណាក់កាលមួយទៅដំណាក់កាលមួយ សមាសភាពតួអង្គពាក់ព័ន្ធសំខាន់ៗ សារៈប្រយោជន៍របស់មីក្រូហិរញ្ញវត្ថុ និងរំលេចនូវទស្សនាទានអំពីអនាគតរបស់មីក្រូហិរញ្ញវត្ថុកម្ពុជា ក្នុងការចូលរួមអភិវឌ្ឍសេដ្ឋកិច្ចនិងសង្គមកម្ពុជាប្រកបដោយនិរន្តរភាព។
លោករ័ត្ន សុវណ្ណនរៈបានបញ្ជាក់ថា វិស័យមីក្រូហិរញ្ញវត្ថុកម្ពុជាបានចាប់កកើតក្នុងទសវត្សរ៍ឆ្នាំ១៩៨០ ក្រោយពេលការដួលរលំ នៃរបបប្រល័យពូជសាសន៍ប៉ុល ពត ហើយបានបន្តរីកចម្រើនជាបន្តបន្ទាប់ ជាពិសេសមានការរីកចម្រើនយ៉ាងខ្លាំង ក្រោយពេលដែលប្រទេសកម្ពុជា ទទួលបានសុខសន្តិភាពពេញលេញ តាមរយៈនយោបាយឈ្នះ-ឈ្នះរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
អគ្គទេសាភិបាលធនាគារជាតិនៃកម្ពុជា លោកជា ចាន់តូ បានចារក្នុងអារម្ភកថារបស់សៀវភៅនេះថា កាលពីបួនទសវត្សរ៍កន្លងមក ប្រវត្តិសាស្ត្រកម្ពុជាបានចារឹកយ៉ាងច្បាស់ពីដំណើរងើបឡើងវិញរបស់ប្រទេសកម្ពុជា ពីស្ថានភាពមួយដែលខ្ទេចខ្ទាំដល់ឬសគល់ ជាពិសេស វិស័យហិរញ្ញវត្ថុ ដែលត្រូវបានលុបបំបាត់ទាំងស្រុង និងធ្វើឱ្យប្រជាជនកម្ពុជា លែងមានជំនឿមកលើវិស័យហិរញ្ញវត្ថុកម្ពុជា។
លោកបន្តថា “កត្តាប្រវត្តិសាស្ត្រនេះ គឺជាមូលដ្ឋានសម្រាប់ធ្វើការវិភាគ និងស្វែងយល់អំពីមូលហេតុ ឧបសគ្គ និងបញ្ហាប្រឈមនានាដែលអ្នកជំនាន់មុនបានជួបប្រទះ” ។
ក្នុងគោលគំនិតចងក្រងជាឯកសារប្រវត្តិសាស្ត្រផង ជាឃ្លាំងផ្ទុកនូវបទពិសោធន៍ផង និងជាមេរៀនសំខាន់ៗផង សម្រាប់ផ្តល់ជូនដល់អ្នកសិក្សាស្រាវជ្រាវ និងសាធារណជនទូទៅ ទើបថ្នាក់ដឹកនាំធនាគារជាតិនៃកម្ពុជា ក្រោមការដឹកនាំរបស់ លោក ជា ចាន់តូ ទេសាភិបាលធនាគារជាតិនៃកម្ពុជា បានសម្រេចចិត្តប្រគល់ការងារនេះជូន លោក រ៉ុន បេវ៉ាកក្វា ដែលជាស្ថាបនិក និងនាយកគ្រប់គ្រងរបស់ក្រុមហ៊ុន Access Advisory ដើម្បីធ្វើការសិក្សាស្រាវជ្រាវ និងចងក្រងសៀវភៅ “ការកសាងវិស័យហិរញ្ញវត្ថុប្រកបដោយបរិយាបន្ន” និងប្រកាន់លើគោលគំនិតនិងមតិយោបល់ឯករាជ្យរបស់អ្នកនិពន្ធ” ។
លោកគា បូរាណ ប្រធានសមាគមមីក្រូហិរញ្ញវត្ថុកម្ពុជា បានថ្លែងនៅក្នុងពិធីប្រគល់សៀវភៅនេះថា សៀវភៅនេះគឺជាស្នាដៃដ៏មានសារៈសំខាន់ ដែលនឹងបម្រើជាឯកសារគោលសម្រាប់វិស័យហិរញ្ញវត្ថុ ដោយផ្តោតសំខាន់អំពីប្រវត្តិ និងការអភិវឌ្ឍវិស័យមីក្រូហិរញ្ញវត្ថុនៅកម្ពុជាជាងពីរទស្សវត្សរ៍។
លោកបន្តថា “សៀវភៅនេះមិនត្រឹមតែបម្រើជាអត្ថប្រយោជន៍ សម្រាប់ប្រទេសកម្ពុជាប៉ុណ្ណោះទេ ថែមទាំងបានចែករំលែកនូវបទពិសោធន៍ ក្នុងវិស័យហិរញ្ញវត្ថុដ៏មានតម្លៃរបស់កម្ពុជា ដល់ប្រទេសផ្សេងៗលើពិភពលោក ជាពិសេសប្រទេសកំពុងអភិវឌ្ឍន៍ដទៃៗទៀត” ។
ជាមួយគ្នានេះ លោក រ៉ុន បេវ៉ាកក្វា បានធ្វើបទបង្ហាញពីទិដ្ឋភាពទូទៅ និងការរកឃើញនៅក្នុងសៀវភៅនេះ។ លោកបានថ្លែងថា មីក្រូហិរញ្ញវត្ថុកម្ពុជា ស្ថិតក្នុងចំណោមប្រព័ន្ធមីក្រូហិរញ្ញវត្ថុ ល្អបំផុតនៅលើពិភពលោក ហេតុដូច្នេះ មីក្រូហិរញ្ញវត្ថុកម្ពុជាគួរត្រូវបានយកចិត្តទុកដាក់ និងទទួលបាននូវការគោរព។
លោកបានបន្តថា វិស័យមីក្រូហិរញ្ញវត្ថុ ត្រូវការធ្វើការសម្រេចចិត្តឱ្យបានត្រឹមត្រូវក្នុងការផ្តល់សេវាហិរញ្ញវត្ថុ ប្រកួតប្រជែងដោយស្មើភាព ផ្តល់សេវាហិរញ្ញវត្ថុជូនអតិថិជនតាមតម្រូវការ ដាក់ចេញបទប្បញ្ញត្តិ និងមានការចុះត្រួតពិនិត្យសំដៅ ធានាការអនុលោមតាមបទប្បញ្ញត្តិ ព្រមទាំងតម្រូវឱ្យមានការសហការគ្នា រវាងភាគីពាក់ព័ន្ធ ដើម្បីធានាឱ្យបានសុច្ចរិតភាពនៃទីផ្សារ ទោះបីជាមានការប្រកួតប្រជែងគ្នាក្នុងទីផ្សារក៏ដោយ៕