ដោយ: ម៉ាលីស
បេកាំង: ធនាគារកណ្តាលរបស់ប្រទេសចិនកាលពីថ្ងៃពុធបានបញ្ជូលសន្ទនីយភាពចំនួន១០ពាន់លានយ័ន ឬ១,៥៧ពាន់លានដុល្លារអាមេរិក ក្នុងប្រព័ន្ធហិរញ្ញវត្ថុជាតិ តាមរយៈប្រព័ន្ធ Reverse repo។ នេះបើតាមការចុះផ្សាយរបស់កាសែត Xinhua កាលពីថ្ងៃទី៨ ខែធ្នូនេះ។
សន្ទនីយភាព (liquidity) ជាពាក្យឆ្លុះបញ្ចាំងពីសមត្ថភាពក្នុងការបម្លែងទ្រព្យសកម្ម (asset) ដែលសំដៅដល់ផលិតផល ឬទំនិញសម្រាប់លក់ដូរ និងលុយដែលអតិថិជនជំពាក់ ឱ្យទៅជាសាច់ប្រាក់ ឬសមត្ថភាពទូទាត់បំណុលរយៈពេលខ្លីបាន។
Reverse repo គឺជាដំណើរការដែលធនាគារកណ្តាលទិញមូលបត្រពីធនាគារពាណិជ្ជតាមរយៈការដេញថ្លៃ ជាមួយនឹងកិច្ចព្រមព្រៀងមួយដើម្បីលក់វាមកវិញនៅពេលអនាគត។
កាសែតដដែលបានបន្តថា យោងតាមធនាគារប្រជាជនចិនបានឱ្យដឹងថា អត្រាការប្រាក់សម្រាប់ការដាក់លក់បញ្ច្រាសរយៈពេលប្រាំពីរថ្ងៃត្រូវបានកំណត់នៅត្រឹម២,២ ភាគរយ។
ធនាគារកណ្តាលបាននិយាយថា ការផ្លាស់ប្តូរនេះមានគោលបំណងរក្សាសាច់ប្រាក់ងាយស្រួលនៅក្នុងប្រព័ន្ធធនាគារអោយមានស្ថេរភាពសមរម្យមួយ៕