ដោយៈគង់ សិរីជេស៊ីកា
សៀមរាបៈ រហូតមកទល់ពេលនេះ មជ្ឈមណ្ឌលស្រាវជ្រាវអភិរ័ក្សពូជផ្កាសួនកេស “កូល” សុខ អានបន្ទាយស្រី ប្រមូលបានប្រភេទផ្កាព្រៃជាង៣០០មុខហើយ ក្នុងចំណោមផ្កាព្រៃជាង៥០០មុខ។
អ្នកនាំពាក្យ និងជារដ្ឋលេខាធិការក្រសួងបរិស្ថាន លោកនេត្រ ភ័ត្រាបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី១៦ វិច្ឆិកាកន្លងមកថា មជ្ឈមណ្ឌលនេះបានបង្កើតឡើងតាំងឆ្នាំ២០១៨ ដើម្បីថែរក្សា និងអភិរ័ក្សពូជផ្កាព្រៃនានា ដែលយកមកពីតាមបណ្តារាជធានី ខេត្តចំនួន១០។ លោកបន្តថា ការអភិរ័ក្សនេះ ដើម្បីទប់ស្កាត់ការជួញដូរ និងដើម្បីថែរក្សាពូជកេស កូលផងដែរ។
លោកបន្តថា “មជ្ឈមណ្ឌលសួនកេស “កូល”ក៏ជាការផ្សារភ្ជាប់ខ្សែច្រវ៉ាក់ទេសចរណ៍ធម្មជាតិរវាងក្រុងអង្គរ មកកាន់ស្រុកបន្ទាយស្រី និងឧទ្យានជាតិភ្នំលែនផងដែរ”។លោកបន្តថា “មជ្ឈមណ្ឌលសួនកេស “កូល” បានអនុញ្ញាត្តឲ្យភ្ញៀវទេសចរណ៍ជាតិ អន្តរជាតិចូលទស្សនាដោយឥតគិតថ្លៃ ប៉ុន្តែនាពេលអនាគត យើងនឹងគិតគូជំហ៊ានបន្តទៀត”។
លោកនេត្រ ភ័ត្រាបានបន្តថា ជាមួយគ្នានេះ មជ្ឈមណ្ឌលសួនកេស “កូល” ក៏ជាកន្លែងសំរាកញាំកាហ្វេ របស់ភ្ញៀវទេសចរណ៍ជាតិ អន្តរជាតិមុនឡើងភ្នំគូលែន និងចុះពីភ្នំគូលែនផងដែរ ពិសេសពួកកេអាចសិក្សាស្វែងយល់ពីការផ្សព្វផ្សាយ និងអភិរ័ក្សជីវចម្រុះ នៅសួនកេស “កូល”ក្រោមការរៀបចំរបស់ក្រសួងបរិស្ថានផងដែរ។
អភិបាលស្រុកបន្ទាយស្រី លោកឃឹម ហ្វីណង់បានមានប្រសាសន៍ឲ្យដឹងកាលពីពេលថ្មីៗនេះថា ស្រុកបន្ទាយស្រីមានរមណីយដ្ឋានធម្មជាតិ និងកែច្នៃជាង១០០កន្លែង ពិសេសមជ្ឈមណ្ឌលសួនកេស “កូល” មានទទំហំផ្ទៃដី២០០០ហិកតា និងគំរោងអភិវឌ្ឍន៍របស់ក្រុមហ៊ុនកោះសសង្សារ នៅក្រុងមូលដ្ឋាននេះ នឹងធ្វើឲ្យស្រុកបន្ទាយស្រីកាន់តែទាក់ទាញការវិនិយោគ និងមានភាពលេចធ្លោផងដែរ៕