ដោយៈជេស៊ីកា
ភ្នំពេញៈ ធនាគារកាណាឌីយ៉ា ត្រូវបានបង្កើតឡើងនៅថ្ងៃទី ១១ ខែ វិច្ឆិកា ឆ្នាំ ១៩៩១ ដែលមានឈ្មោះថា Canadia Gold & Trust Corporation Limited នៅក្រោមការបណ្តាក់ទុនរួមគ្នាជាមួយប្រជាជនកម្ពុជានៅក្រៅប្រទេស និងធនាគារជាតិនៃកម្ពុជា។
សកម្មភាពអាជីវកម្មសំខាន់ៗរបស់ធនាគារនេះ គឺផ្អែកលើប្រតិបត្តិការជួញដូរមាស និងការផលិតមាសសន្លឹក។ នៅថ្ងៃទី ១៩ ខែ មេសា ឆ្នាំ ១៩៩៣ ស្ថាប័នមួយនេះត្រូវបានប្តូរឈ្មោះទៅជា “ធនាគារ កាណាឌីយ៉ា អិលធីឌី” ហើយក្រោយមកប្តូរទៅជា “ធនាគារ កាណាឌីយ៉ា ភីអិលស៊ី”។
នៅថ្ងៃទី ១៦ ខែ ធ្នូ ឆ្នាំ ២០០៣ បានក្លាយជាធនាគារពាណិជ្ជដែលបានចុះបញ្ជីនៅក្រសួងពាណិជ្ជកម្ម និងធនាគារជាតិនៃកម្ពុជា។
អ្នកឧកញ៉ាពុង ឃាវសែប្រធានក្រុមប្រឹក្សាភិបាលធនាគារកាណាឌីយ៉ាបានមានប្រសាសន៍ឲ្យដឹងកាលពីសប្តាហ៍មុនថា ចាប់តាំងពីពេលនោះមក ធនាគារកាណាឌីយ៉ា បានប្ដេជ្ញាចិត្តចំពោះប្រជាជនកម្ពុជាគ្រប់រូប ដើម្បីក្លាយជាធនាគាររបស់ប្រជាជន។ ធនាគារបានរក្សាការសន្យារបស់ខ្លួន ជាពិសេសក្នុងអំឡុងពេលមានភាពវឹកវរ នៅរាជធានីភ្នំពេញ ក្នុងឆ្នាំ១៩៩៧។
ខណៈដែលធនាគារភាគច្រើនបានបិទទ្វារ ក្នុងអំឡុងពេលមានភាពវឹកវររយៈពេល ២ថ្ងៃនោះ ធនាគារកាណាឌីយ៉ា នៅតែបើកដំណើរការ មិនត្រឹមតែសម្រាប់អតិថិជនរបស់ខ្លួនប៉ុណ្ណោះទេ ប៉ុន្តែថែមទាំងសម្រាប់អតិថិជន ដែលមិនមែនជាអតិថិជនរបស់ធនាគារកាណាឌីយ៉ាថែមទៀតផង ដើម្បីដកប្រាក់ពីមូលប្បទានបត្ររបស់ពួកគេ ដោះស្រាយការទូទាត់ប្រាក់បៀវត្សរ៍ដល់កម្មករ រោងចក្រកាត់ដេរចំនួន២ ក៏ដូចជា បានជួយស្ថានទូតមួយឱ្យដកប្រាក់តាមរយៈមូលប្បទានបត្រ ដើម្បីទិញសំបុត្រយន្តហោះឱ្យនិស្សិតទៅបន្តការសិក្សារបស់ពួកគេនៅប្រទេសបារាំង។
អស់រយៈពេលជាច្រើនឆ្នាំមកនេះ ធនាគារកាណាឌីយ៉ា បានបន្តពង្រីកសេវាកម្មរបស់ខ្លួន ក្នុងនោះធនាគារ កាណាឌីយ៉ា គឺជាអ្នកចេញ MasterCard ដំបូងគេនៅកម្ពុជា ជាធនាគារដំបូងគេ ដែលដាក់ឱ្យប្រើប្រាស់ម៉ាស៊ីនដកប្រាក់ ATM និងបានចាប់ផ្តើមវិស័យធនាគារឯកជន ដើម្បីបម្រើអតិថិជនដែលមានទ្រព្យសម្បត្តិដុលខ្ពស់។ ព្រឹត្តិការណ៍ដ៏អស្ទារ្យទាំងនេះ គឺជាកត្តាជំរុញដល់កំណើនរបស់ធនាគារ កាណាឌីយ៉ា ដើម្បីក្លាយជាគ្រឹះស្ថានហិរញ្ញវត្ថុឈានមុខគេនៅកម្ពុជានាពេលបច្ចុប្បន្ន៕