ដោយៈគង់ សូរិយា
ភ្នំពេញៈ ក្រុងព្រះសីហនុ ក្រុងកោះរ៉ុង និងតំបន់តារាសាគរ ជាតំបន់សំខាន់ទាំងបីដែលត្រូវបើកទ្វារ ស្វាគមន៍ភ្ញៀវទេសចរណ៍អន្តរជាតិមុនគេ។ តើខេត្តព្រះសីហនុបានត្រៀមខ្លួនដូចម្តេច ដើម្បីចាប់យកឱកាសមាសនេះ។
អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យបានមានប្រសាសន៍ឲ្យដឹងតាមប្រព័ន្ឋតេឡេក្រាមកាលពីព្រលប់ថ្ងៃទី៤ វិច្ឆិកានេះថា ដើម្បីទទួលទេសចរណ៍វ៉ាក់សាំង ដែលរាជរដ្ឋាភិបាលនឹងបើកដំណើរការនីថ្ងៃទី៣០ វិច្ឆិកាខាងមុខនេះ រដ្ឋបាលខេត្តបានផ្តោតលើការគ្រប់គ្រង នូវការឆ្លងរីករាលដាលនូវជំងឺកូវីដ១៩ ឲ្យកាន់តែមានប្រសិទ្ឋភាព។ យើងធ្វើការត្រួតពិនិត្យ តាមដាននិងដាក់ឲ្យអនុវត្តន៍នូវស្តង់ដាSOP របស់ក្រសួងទេសចរណ៍។
លោកបន្តថា “យើងនឹងជម្រុញយុទ្ឋនាការទីក្រុងស្អាត ដើម្បីលើកកំពស់បរិស្ថាន សោភ័ណភាព តាមរយៈការយកចិត្តទុកដាក់គ្រប់គ្រងកាកសំណល់រ៉ឹង រាវ ហេដ្ឋារចនាសម្ព័ន្ឋ បន្ទប់ទឹកសាធារណៈ និងកិច្ចការជាច្រើនទៀត”។ លោកបន្តថា “ជាមួយគ្នានឹងការលើកកំពស់សោភ័ណភាពឆ្នេរ រដ្ឋបាលខេត្តនឹងពង្រឹងសុវត្ថិភាពសាធារណៈ និងជម្រុញការផ្សព្វផ្សាយពីសក្តានុពលសេដ្ឋកិច្ច និងទេសចរណ៍”។
លោកឃាង ភារម្យបានបន្តថា ជាមួយគ្នានេះ ខេត្តព្រះសីហនុបាននិងកំពុងជម្រុញការចាក់វ៉ាក់សាំង ជូនប្រជាពលរដ្ឋ និងបានចាក់ជូនកុមារអាយុ៥ឆ្នាំ ហើយវិសាលភាពនៃការចាក់វ៉ាក់សាំង បានគ្របដណ្តប់ជាង៩០ភាគរយ។ អាជីវករ និងអ្នកផ្តល់សេវាកម្មត្រូវអនុវត្តន៍៍ ឲ្យបានដាច់ខាតនូវសុវត្ថិភាពទេសចរណ៍ និងតាមវិធានការណ៍បីកុំ បីការពាររបស់ក្រសួងសុខាភិបាល ព្រមទាំងត្រូវចាក់វ៉ាក់សាំងឲ្យបានគ្រប់ដូស ដើម្បីទទួលទេសចរណ៍ផង និងដើម្បីទប់ស្កាត់ការរីករាលដាលជំងឺកូវីដ១៩ផង។
លោកបន្តថា “ភ្ញៀវទេសចរណ៍ពិភពលោកមកច្រើនប៉ុណ្ណាក៏ដោយ យើងត្រៀមស្វាគមន៍ និងមានសង្ឃឹមឲ្យតែលោកអញ្ជើញមក”៕
