ដោយៈសុផារី
ប្រទេសថៃៈ ផលប៉ះពាល់ពីកូវីដ១៩ ដែលបានអូសបន្លាយ និងកូវីដ១៩ រលកចុងក្រោយនេះ បានធ្វើឱ្យអត្រាគ្មានការងារធ្វើ ក្នុងវិស័យទេសចរណ៍កើនឡើងដល់ ៧១% ឬស្មើនឹង៣,០៥ លាននាក់នៅត្រីមាសទី៣ឆ្នាំនេះ ក្នុងចំណោមសរុប៤,៣លាននាក់ មុនពេលផ្ទុះឡើង។ នេះបើយោងតាមរបាយការណ៍ក្រុមប្រឹក្សាទេសចរណ៍ថៃ។
ខណៈដែលប្រទេសថៃនៅតែបន្តបើកប្រទេស អនុញ្ញាតឱ្យភ្ញៀវទេសចរបរទេសដែលបានចាក់វ់ាក់សាំងរួចរាល់ ចូលមកកាន់ប្រទេស ក្នុងគោលបំណងជំរុញសេដ្ឋកិច្ចជាតិ វិស័យសណ្ឋាគារកំពុងចាប់ផ្តើមមានក្តីសង្ឃឹម លើការត្រលប់មកវិញនៃវិស័យទេសចរណ៍ ជាពិសេសនៅទីក្រុងបាងកក។
លោក Garth Simmons នាយកប្រតិបត្តិក្រុមហ៊ុន Accor សម្រាប់តំបន់អាស៊ីអាគ្នេយ៍ ជប៉ុន និងកូរ៉េខាងត្បូងបាននិយាយថា “ប្រទេសថៃកាន់តែឆាប់បើកដំណើរការឡើងវិញ នោះសេដ្ឋកិច្ចថៃក៏នឹងឆាប់ងើបឡើងវិញផងដែរ ហើយប្រជាជនអាចបន្តការរស់នៅរបស់ពួកគេឡើងវិញ ព្រោះវិស័យទេសចរណ៍ គឺជាខ្សែជីវិតរបស់ប្រជាជនជាច្រើននៅក្នុងប្រទេស”។
លោកបន្តថា “ការបើកដំណើរការឡើងវិញរបស់ថៃ គឺជាជោគជ័យខាងសេដ្ឋកិច្ចភ្លាមៗឬអត់ អាស្រ័យលើវិធានការដែលរដ្ឋកំណត់សម្រាប់ទីក្រុងបាងកក”។
លោក Wallapa Traisorat នាយកប្រតិបត្តិនិងជាប្រធានក្រុមហ៊ុន Asset World Corp (AWC) បាននិយាយថា ”ប្រសិនបើទីក្រុងបាងកក អាចបើកឡើងវិញសម្រាប់ការធ្វើដំណើរដោយគ្មានចត្តាឡីស័កនោះទេ នោះនឹងមានការធ្វើដំណើរច្រើនឡើងខ្លាំង ដែលជួយឱ្យសេដ្ឋកិច្ចមានដំណើរការឡើងវិញ”៕
