ដោយ: សុផារី/ភ្នំពេញ៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានអញ្ជើញដឹកនាំប្រតិភូក្រសួងពាណិជ្ជកម្មចូលរួមកិច្ចប្រជុំពិភាក្សាអន្តរក្រសួងកម្រិតចង្អៀតលើសេចក្តីព្រាងវិសោធនកម្មច្បាប់ចំនួន ២ គឺ ១. ស្តីពីសហគ្រាសពាណិជ្ជកម្ម ២. សេចក្តីព្រាងវិសោធនកម្មច្បាប់ស្តីពីវិធានពាណិជ្ជកម្មនិងបញ្ជីពាណិជ្ជកម្មជាលើកទី២ ដែលដឹកនាំដោយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
នារសៀលថ្ងៃទី១ ខែតុលា ឆ្នាំ២០២១ កន្លងមក ក្រសួងពាណិជ្ជកម្មបានលើកឡើងថា នៅក្នុងអង្គប្រជុំនោះ លោករដ្ឋមន្ត្រី ប៉ាន សូរស័ក្តិ បានលើកឡើងពីសារៈសំខាន់និងភាពចាំបាច់ក្នុងការធ្វើវិសោធនកម្មច្បាប់ទាំងពីរ ក្នុងគោលបំណងដើម្បីឱ្យស្របនឹងការអនុវត្តជាក់ស្តែង កំណែទម្រង់ក្នុងការសម្រួលការធ្វើធុរកិច្ចដែលបានធ្វើកំណែទម្រង់ច្រើនលើកមកហើយដើម្បីស្របតាមបរិបទថ្មី ដែលរាជរដ្ឋាភិបាលបានអនុម័ត និងច្បាប់ថ្មីស្តីពីពាណិជ្ជកម្មតាមប្រព័ន្ធអេឡិចត្រូនិកដែលកំពុងអនុវត្ត ហើយបាននិងកំពុងធ្វើការផ្តល់សេវាសាធារណៈតាមប្រព័ន្ធអេឡិចត្រូនិក និងការស្តារសេដ្ឋកិច្ចឡើងវិញក្រោយវិបត្តិនៃជំងឺកូវីដ-១៩ដើម្បីបង្កើតការប្រកួតប្រជែងការធ្វើធុរកិច្ច។
ជាមួយគ្នានេះដែរ លោករដ្ឋមន្រ្តី អូន ព័ន្ធមុនីរ័ត្ន ប្រធានដឹកនាំអង្គប្រជុំ បានថ្លែងអំណរគុណនិងវាយតម្លៃខ្ពស់ដល់ក្រុមការងារក្រសួងពាណិជ្ជកម្មនិងក្រសួង-ស្ថាប័នពាក់ព័ន្ធ ដែលបានខិតខំសម្របសម្រួលការងារដ៏មានសារៈសំខាន់នេះ និងបានណែនាំឱ្យក្រសួងពាណិជ្ជកម្មដាក់ស្នើសេចក្តីព្រាងច្បាប់ទាំងពីរនេះទៅក្រុមប្រឹក្សាជាតិភាសាខ្មែរនៃទីស្តីការគណៈរដ្ឋមន្ត្រីដើម្បីពិនិត្យនិងកែសម្រួលបន្តជាការប្រញាប់ មុននឹងបន្តនីតិវិធីគោរពស្នើសុំការអនុម័តពីប្រមុខរាជរដ្ឋាភិបាល៕
