ដោយៈសិរី ជេស៊ីកា
ភ្នំពេញៈ មន្រ្តីជាន់ខ្ពស់ក្រសួងបរិស្ថានបានអះអាងថា មន្រ្តីជំនាញនៃក្រសួងបរិស្ថាន និងក្រសួងវប្បធ៌ម កំពុងសិក្សាបច្ចេកទេស ក្នុងការរៀបចំបង្កើតតំបន់បេតិកភណ្ឌធម្មជាតិ និងប្រវត្តិសាស្ត្រវប្បធម៌ នៅតំបន់ភ្នំឈើកាច់បាភ្នំ ក្នុងភូមិសាស្ត្រស្រុកបាភ្នំ ខេត្តព្រៃវែង។
រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន លោកនេត្រ ភ័ត្រាបានមានប្រសាសន៍ឲ្យដឹងកាលពីថ្ងៃទី៣០ កញ្ញាម្សិលម៉ិញនេះថា អ្នកជំនាញក្រសួងបរិស្ថាន ក្រសួងវប្បធម៌ និងអាជ្ញាធរខេត្តព្រៃវែងបាន និងកំពុងសិក្សាបច្ចេកទេស ពិនិត្យទៅលើការរៀបចំ បង្កើតតំបន់បេតិកភណ្ឌធម្មជាតិ និងប្រវត្តិសាស្ត្រវប្បធម៌ នៅតំបន់ភ្នំឈើកាច់បាភ្នំ នៅក្នុងខេត្តព្រៃវែង។
លោកបន្តថា “ក្រសួងបរិស្ថានចាំបាច់ត្រូវបង្កើតតំបន់ការពារធម្មជាតិ ដើម្បីអភិរក្សតំបន់ហ្នឹងផង ធនធានធម្មជាតិនៅទីហ្នឹងផង និងវប្បធម៌ប្រវត្តិសាស្ត្រនៅហ្នឹងផង”។
លោកឈៀង សុវណ្ណរ៉ា នាយករដ្ឋបាលខេត្តព្រៃវែងបានឱ្យដឹងផងដែរថា ការរៀបចំបង្កើតតំបន់បេតិកភណ្ឌធម្មជាតិ និងប្រវត្តិសាស្ត្រវប្បធម៌តំបន់ភ្នំឈើកាច់បាភ្នំនេះ កំពុងស្ថិតក្នុងការសិក្សាស្រាវជ្រាវនៅឡើយ។
លោកថ្លែងថា “យើងមិនទាន់សម្រេចបានលទ្ធផលអីទេ ដោយសារនៅលើបាភ្នំហ្នឹងសុទ្ធតែកន្លែងទ័ព កន្លែងទាហាន គេនៅឈរជើងការពារទឹកដី។ អ៊ីចឹងឥឡូវ គឺយើងកំពុងធ្វើការសិក្សាស្រាវជ្រាវ”។
ការសិក្សានេះគឺដើម្បីដឹងថា តើវាមានបញ្ហាប្រឈមអ្វីខ្លះ និងចំណុចសំខាន់អីខ្លះដែលត្រូវធ្វើជាទល្ហីកណ៍ ដើម្បីធ្វើការរៀបជូនទៅថ្នាក់ដឹកនាំក្រសួងដើម្បីសម្រេច។
ចំណែកលោក ឡុង ប៉ុណ្ណាស៊ីរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈ ថ្លែងថា នេះជាការងារបច្ចេកទេសធម្មតា ដែលកិច្ចការងារបែបនេះ ក៏ធ្លាប់ធ្វើកន្លែងផ្សេងៗផងដែរ។ នេះជាការសហការគ្នា ដើម្បីងាយស្រួលកុំឱ្យមានការប៉ះពាល់ផ្នែកវប្បធម៌។
លោកបញ្ជាក់ថា ពេលក្រសួងបរិស្ថាន ធ្វើការរៀបចំកំណត់តំបន់ធម្មជាតិណាមួយ ដោយខ្លាចប៉ះពាល់ស្ថានីយបុរាណវិទ្យា ក៏ហៅក្រសួងវប្បធ៌ទៅ ដើម្បីសហការគ្នារៀបចំតំបន់មួយដែលមានគ្រប់ជំនាញ”៕
