ដោយៈ ម៉ាណេត
ភ្នំពេញៈទំហំមូលធននូបនីយកម្ម ទីផ្សារមូលបត្របានកើនឡើងដល់២,៥៧ពាន់លានដុល្លារក្នុងឆមាសទី១ ឆ្នាំ២០២០នេះ កើនឡើង៤,៥ភាគរយ បើធៀបនឹងរយៈពេលដូចគ្នាពីឆ្នាំមុន។ នេះបើយោងតាមរបាយការណ៍ចុងក្រោយ របស់ក្រុមហ៊ុនផ្សារមូលបត្រកម្ពុជា (CSX) ។
លោក ហុង សុខហួរ អគ្គនាយក CSX បានថ្លែងក្នុងសប្តាហ៍នេះថា រហូតមកដល់ពេលនេះ CSX មានក្រុមហ៊ុនចុះបញ្ជី១៣ ក្នុងចំណោមនោះក្រុមហ៊ុន៧ បានចុះបញ្ជីមូលបត្រកម្មសិទិ្ធ និងក្រុមហ៊ុន៦ចុះបញ្ជីរសញ្ញាបណ្ណសាជីវកម្ម។
លោកបានឱ្យដឹងទៀតថា “ក្រុមហ៊ុនទាំង១៣នេះ បានប្រមូលមូលនិធិប្រហែល ២៤៣លានដុល្លារ។ ត្រឹមបញ្ចប់ឆមាសទី១ ឆ្នាំនេះ ទំហំមូលធននូបនីយកម្មទីផ្សារមូលបត្រ បានកើនឡើងដល់២,៥៧ ពាន់លានដុល្លារ ដោយកើនឡើងចំនួន៤,៥ ដងបើប្រៀបធៀបនឹងរយៈពេលដូចគ្នាកាលពីឆ្នាំមុន” ។
កាលពីថ្ងៃទី១២ ខែសីហា ឆ្នាំ២០២០ ក្រុមហ៊ុនផ្គត់ផ្គង់ខ្សែបញ្ចូលថាមពល Pestech (Cambodia) Plc ដែលជាបុត្រសម្ព័ន្ធគ្រប់គ្រង១០០ភាគរយ របស់ក្រុមហ៊ុនមេ Pestech International Bhd មានមូលដ្ឋាននៅប្រទេសម៉ាឡេស៊ី ចុះបញ្ជីមូលបត្រកម្មសិទ្ធិរបស់ខ្លួនជាផ្លូវការ នៅលើក្រុមហ៊ុនផ្សារមូលបត្រកម្ពុជា និងជាក្រុមហ៊ុនទី១៣ បោះផ្សាយមូលបត្រជាផ្លូវការនៅកម្ពុជា។
លោកហុង សុខហួរបានឲ្យដឹងថា ក្រុមហ៊ុននឹងប្រមូលមូលនិធិចំនួន៣លានដុល្លារជាមួយនឹងតម្លៃ IPO ៣១២០រៀលក្នុង១ភាគហ៊ុន ជាមួយនឹងការចុះបញ្ជីនេះ ហើយវានឹងបម្រើជាប្រភពថ្មី នៃមូលនិធិសម្រាប់ក្រុមហ៊ុន ក្នុងការវិនិយោគបន្ថែម និងពង្រីកអាជីវកម្មនៅកម្ពុជា។
លោកបញ្ជាក់ថា “ការប្រមូលមូលនិធិតាមរយៈទីផ្សារមូលធននេះ នឹងក្លាយជាម ធ្យោបាយអាទិភាពសម្រាប់ក្រុមហ៊ុនធុនតូច និងមធ្យម ដើម្បីលើកកម្ពស់ និងពង្រីកអាជីវកម្មរបស់ពួកគេនៅពេលអនាគត។
លោកបានបន្តថា “ការប្រមូលមូលនិធិនេះ នឹងជាថ្នូរនៃជម្រើសដោយទំនុកចិត្តចំពោះក្រុមវិនិយោគិនសក្ដានុពល ដែលកំពុងស្វែងរកការវិនិយោគ ឬចង់ប្រើប្រាស់ប្រាក់លើសចំនួនរបស់ពួកគេ ក្នុងការស្វែងរកប្រាក់ចំណេញ នៅក្នុងរយៈពេលខ្លី និងរយៈពេលវែង” ៕