ដោយៈគង់ ម៉ាលីនណា
ភ្នំពេញៈ ក្រសួងទេសចរណ៍សហការជាមួយអង្គការ ASSIST វិទ្យាស្ថាន William Angliss នៃប្រទេសអូស្ត្រាលី និងក្រុមហ៊ុន Thalias Hospitality Groupបានរៀបចំសិក្ខាសាលាតាមប្រព័ន្ធអនឡាញស្តីពី “ការបណ្តុះបណ្តាលគ្រូបង្គោលជាតិ ផ្នែកផលិតកម្មម្ហូបអាហារនៃសេវាកម្មសណ្ឋាគារ”។
ការបណ្តុះបណ្តាលនេះ មានរយៈពេល១៤ ថ្ងៃចាប់ពី ថ្ងៃទី ១៦ ខែសីហា ដល់ថ្ងៃទី ២ ខែកញ្ញា ឆ្នាំ ២០២១ ដោយមានសិក្ខាកាមសរុប២៧រូប។ សិក្ខាសាលានេះ ធ្វើឡើងក្នុងគោលបំណង ដើម្បីលើកកម្ពស់ផលិតកម្មម្ហូបអាហារនៅកម្ពុជា។
រដ្ឋលេខាធិការក្រសួងទេសចរណ៍ លោក ប៉ាក់ សុខុម បានថ្លែងក្នុងពេលបើកសិក្ខាសាលានេះថា ការបណ្តុះបណ្តាលគ្រូបង្គោលជាតិ ផ្នែកផលិតកម្មម្ហូបអាហារ គឺពិតជាសំខាន់ ក្នុងការឈានឆ្ពោះទៅត្រៀម បើកទទួលភ្ញៀវទេសចរអន្តរជាតិឡើងវិញ បន្ទាប់ពីវិបត្តិជំងឺកូវីដ១៩មានភាពថមថយ។
តាមរយៈការបណ្តុះបណ្តាលនេះ គ្រូបង្គោលជាតិត្រូវយកអ្វីដែលទទួលបាន ទៅធ្វើការបណ្តុះបណ្តាលបន្ត ដល់យុវជនខ្មែរផ្សេងៗទៀត ដើម្បីឈានឆ្ពោះទៅដល់ការត្រៀមបើកទេសចរណ៍អន្តរជាតិឡើងវិញ។
លោកប៉ាក់ សខុមបានថ្លែងថា សិក្ខាសាលានេះ គឺជាសកម្មភាពមួយនៃការអនុវត្តផែនទីចង្អុលផ្លូវស្តីពីការលើកស្ទួយ និងស្តារវិស័យទេសចរណ៍ឡើងវិញក្នុងអំឡុង និងក្រោយវិបត្តិកូវីដ ១៩ ដែលរដ្ឋាភិបាលបានអនុម័ត។
សម្តេចតេជោហ៊ុន សែននាយករដ្ឋមន្រ្តីនៃកម្ពុជាកាលពីចុងខែកក្កដាកន្លងមកបានចេញសេចក្តីសម្រេចមួយស្តីពី ការបង្កើតក្រុមការងាររាជរដ្ឋាភិបាល និងឯកជន ដើម្បីស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ ១៩ ដោយមានរដ្ឋមន្ត្រីក្រសួងទេសចរណ៍ លោកថោង ខុន ជាប្រធាន។
ក្រុមការងារនេះមានតួនាទី និងភារកិច្ច ដឹកនាំ ចាត់ចែង និងតាមដានត្រួតពិនិត្យការអនុវត្តផែនទីចង្អុលផ្លូវ (Roadmap) ស្ដីអំពីផែនការស្ដារ និងលើកស្ទួយវិស័យទេសចរណ៍ក្នុង និងក្រោយវិបត្តិជំងឺកូវីដ ១៩។
ប្រធានសមាគមសហគមចុងភៅកម្ពុជា លោកសុង តេង បានបានមានប្រសាសន៍ថា សិក្ខាសាលាស្តីពីម្ហូបអាហារមានគុណភាព និងស្តង់ដាអនាម័យនឹងជួយផ្សព្វផ្សាយពីមុខម្ហូបខ្មែរ ក៏ដូចជាអាហារបរទេសមួយចំនួននៅកម្ពុជា ទៅកាន់ប្រជាជននៃប្រទេសនានាលើពិភពលោក ឱ្យងាកចាប់អារម្មណ៍ ក្នុងការធ្វើដំណើរមកកម្សាន្តនៅកម្ពុជា។ ម្យ៉ាងទៀត សិក្ខាសាលានេះ ក៏ធ្វើឡើងនៅចំពេលដែលប្រទេសកម្ពុជា កំពុងរៀបចំខ្លួនដើម្បីត្រៀមបើកទ្វារទទួលភ្ញៀវទេសចរបរទេស ចាក់វ៉ាក់សាំងរួចរាល់នៅត្រីមាសទី ៤ ខាងមុខនេះផងដែរ។
លោកនិយាយថា “កម្ពុជាគួរតែរៀបចំសិក្ខាសាលាបណ្តុះបណ្តាល ម្ហូបអាហារឱ្យបានច្រើន ព្រោះតាមរយៈនេះគេអាចធ្វើការបញ្ជ្រាបឱ្យចុងភៅខ្មែរ បានយល់ដឹងកាន់តែច្រើនពីមុខម្ហូប និងស្តង់ដាគុណភាពអនាម័យ ព្រមទាំងជួយផ្សព្វផ្សាយពីមុខម្ហូបខ្មែរដល់ភ្ញៀវទេសចរបរទេសផងដែរ”៕
