ដោយៈគង់ ម៉ាលីនណា
ភ្នំពេញៈ រដ្ឋាភិបាលកម្ពុជា តាមរយៈក្រសួងរ៉ែ និងថាមពលបានបញ្ជាក់ថា ក្រុមហ៊ុនរបស់អូស្រ្តាលីមួយនេះ បានសិក្សានិងវាយតម្លៃ “គ្រប់ជ្រុងជ្រោយ”ពីផលប៉ះពាល់បរិស្ថាននិងសង្គម នៃអាជីវកម្មធនធានរ៉ែនេះ អស់រយៈពេលជិត១៤ឆ្នាំ ដែលការដ្ឋានអាជីវកម្ម និងរោងចក្ររ៉ែមាសនេះ ត្រូវបានចាប់ផ្តើមពីពាក់កណ្តាលឆ្នាំ២០២០ ដោយប្រើដើមទុនអស់ប្រមាណ១២០ លានដុល្លាអាមេរិក។
ក្រសួងបន្ថែមថា ការដ្ឋានអាជីវកម្ម និងរោងចក្រចម្រាញ់រ៉ែមាសនេះ មានសមត្ថភាពជីកយករ៉ែឆៅ ប្រមាណ២លានតោនក្នុងមួយឆ្នាំ និងចម្រាញ់ចេញជាដុំមាសកម្រិត៩០%បានប្រមាណ៣តោនក្នុងមួយឆ្នាំ ។ សម្រាប់រយៈពេលប៉ាន់ស្មាន៨ឆ្នាំដំបូង វានឹងអាចទាញចំណូលដុល ប្រមាណ១៨៥លានដុល្លាអាមេរិកក្នុងមួយឆ្នាំ ក្នុងនោះចំណូលសួយសារ និងសារពើពន្ធផ្ទាល់ មានប្រមាណ៤០លានដុល្លាអាមេរិកក្នុងមួយឆ្នាំ។
មន្រ្តីជាន់ខ្ពស់ក្រសួង រ៉ែនិងថាមពលបានបញ្ជាក់ថា ការធ្វើអាជីវកម្មរ៉ែមាសដោយក្រុមហ៊ុនអូស្រ្តាលីនេះ នឹងស្រូបទាញកម្លាំងពលកម្ម សរុបប្រមាណ៤៦២នាក់ ដែលក្នុងនោះមានជនជាតិខ្មែរ៤២៧នាក់ និងបរទេសចំនួន៣៥នាក់៕
