ដោយ ម៉ាណេត
ភ្នំពេញៈ រដ្ឋាភិបាលពិសេសសម្តេចតេជោហ៊ុន សែននាយករដ្ឋមន្ត្រីកម្ពុជាបានលើកឡើងម្តងហើយម្តងទៀតថា កម្ពុជាមិនមានអ្វីព្រួយបារម្ភ ពីការបាត់បង់ប្រព័ន្ឋអនុគ្រោះពន្ឋលើរាល់មុខទំនិញលើកលែងតែអាវុធ (EBA) នោះទេ។
បើមិនមានអ្វីប្រែប្រួលនោះទេ នៅសល់តែក្នុងរយៈពេល១ថ្ងៃទៀត ការសម្រេចដកផ្នែកខ្លះ នៃប្រព័ន្ធអនុគ្រោះពន្ធរបស់គណៈកម្មការអឺរ៉ុប ដែលបានផ្តល់ឱ្យកម្ពុជា ក្រោមគម្រោងពាណិជ្ជកម្ម អ្វីគ្រប់យ៉ាងលើកលែងតែអាវុធ (EBA) នឹងចូលជាធរមាននៅថ្ងៃស្អែក ទី១២ ខែសីហា ឆ្នាំ ២០២០ខាងមុខនេះ។
ជាមួយគ្នានេះអ្នកជំនាញ និងមន្ត្រីជាន់ខ្ពស់ក្រសួងពាណិជ្ជកម្មក៏បានសម្តែងការមិនព្រួយបារម្ភផងដែរ ទាក់ទងនឹងបញ្ហា EBA នេះ។
លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា បានបង្ហាញជំនឿចិត្តយ៉ាងមុតមាំថាគណៈកម្មការសហភាពអឺរ៉ុប នឹងមិនដកប្រព័ន្ធអនុគ្រោះពន្ធ EBA ពីកម្ពុជានោះទេ ខណៈតាមការគ្រោងទុកគណៈកម្មការសហភាពអឺរ៉ុប នឹងសម្រេចដកឬមិនដកពីកម្ពុជានៅថ្ងៃទី១២ ខែសីហា ឆ្នាំ ២០២០ខាងមុខនេះ។
ថ្លែងនៅក្នុងវេទិកាតុមូលជជែក ពីកិច្ចព្រមព្រៀងពាណិជ្ជកម្មសេរីកម្ពុជា-ចិន កាលពីចុងខែកក្កដា ឆ្នាំ២០២០ លោកបណ្ឌិតសុខ ទូច បានឱ្យដឹងថា ការដកប្រព័ន្ធអនុគ្រោះពន្ធ EBA របស់គណៈកម្មការសហភាពអឺរ៉ុប គឺជាជញ្ជីងនយោបាយ ដែលបានដាក់បន្ទុកមកលើកម្ពុជា។
លោកបណ្ឌិរសុខ ទូចថ្លែង “ខ្ញុំមានជំនឿថា EBA នឹងមិនត្រូវបានដកចេញពីកម្ពុជា ព្រោះនេះ ជាជញ្ជីងនយោបាយរបស់សហភាពអឺរ៉ុប” ។ លោកសង្កត់ធ្លន់ថា “បើដក EBA សហភាពអឺរ៉ុប គឺខ្សោយខាងធនធានផ្នែកនយោបាយ តែយ៉ាងកម្ពុជាក៏ត្រូវធ្វើការចរចាព្រោះមានផលិតច្រើនណាស់ ដែលត្រូវការធ្វើនាំចេញ ដើម្បីជំរុញកំណើនសេដ្ឋកិច្ចជាតិ។
លោកសុខ សុភ័ក្ដ្រ រដ្ឋលេខាធិការក្រសួងពាណិជ្ជកម្មបានពន្យល់ថា កិច្ចព្រមព្រៀងពាណិជ្ជកម្មសេរី ខុសពីប្រព័ន្ធអនុគ្រោះពន្ធ EBA ដែលសហភាពអឺរ៉ុបឱ្យមកកម្ពុជា ព្រោះប្រព័ន្ធនេះ មិនមានការចរចានោះទេ ពោលគឺសហភាពអឺរ៉ុប បានផ្តល់ឱ្យដល់កម្ពុជាដោយឯកតោភាគី ។
លោកបន្តថា “នៅពេលដែលកម្ពុជាមានសេដ្ឋកិច្ចរីកចំរើន សហភាពអឺរ៉ុបនឹងដកទៅវិញដោយស្វ័យប្រវត្តិ” ។ លោកបន្ថែមថា “ការចរចាពាណិជ្ជកម្មសេរីកម្ពុជា-ចិននេះ គឺទទួលបានផលប្រយោជន៍ទៅវិញទៅមក និងម្យ៉ាងគឺដោយសារតែកម្ពុជាមានទំនាក់ទំនង និងកិច្ចសហការល្អជាមួយប្រទេសចិន ពោលគឺមិនមែនភាគីចិន ជួយជ្រោមជ្រែងក្នុងការចុះព្រមព្រៀងពាណិជ្ជកម្មសេរីសម្រេចនៅពេលនេះទេ” ។
យោងតាមសេចក្តីប្រកាសព័ត៌មាន របស់គណៈកម្មការអឺរ៉ុបបានឱ្យដឹងកាលពីខែកក្កដាកន្លងមកនេះថា ការដកផ្នែកខ្លះនៃការអនុគ្រោះពន្ធ និងការជំនួសមកវិញជាមួយនឹងពន្ធស្តង់ដាររបស់សហភាពអ៊ឺរ៉ុប នឹងប៉ះពាល់ដល់ផលិតផលសម្លៀកបំពាក់ និងស្បែកជើង ដែលបានជ្រើសរើស និងរាល់ទំនិញសម្រាប់ការធ្វើដំណើរនិងស្ករ ស។
សេចក្តីប្រកាសដដែលបន្តថា ការដកនេះមានចំនួនប្រហែល១ភាគប្រាំ ឬ១ពាន់លានអឺរ៉ូ នៃការនាំចេញប្រចាំឆ្នាំរបស់ប្រទេសកម្ពុជា ទៅកាន់សហភាពអឺរ៉ុប។ លើកលែងតែសភាអឺរ៉ុប និងក្រុមប្រឹក្សាជំទាស់រឿងនេះ បើពុំនោះទេវិធានការនេះ នឹងចូលជាធរមាននៅថ្ងៃទី១២ ខែសីហា ឆ្នាំ ២០២០ ។
ការព្រមានដក ឬព្យួរប្រព័ន្ធអនុគ្រោះពន្ធ EBAរបស់គណៈសហភាពអឺរ៉ុបនេះ បានធ្វើផលិតផលនាំចេញរបស់កម្ពុជា ប្រមាណ៤០មុខ រួមមាន សម្លៀកបំពាក់កាត់ដេរ សម្ភារៈធ្វើដំណើរ វ៉ាលីធ្វើដំណើរ កាបូបស្ពាយ ស្បែកជើង និងស្ករសផងនោះ ត្រូវបង់ពន្ធឡើងវិញក្នុងចំណែក២០ភាគរយនោះ៕