ដោយៈ ម៉ាណេត
ភ្នំពេញៈ កម្ពុជាបាននាំចេញកសិផលទៅក្រៅប្រទេស មានបរិមាណសរុបជាង៥លានតោន ដែលមានតម្លៃប្រមាណជិត៣ពាន់លានដុល្លារ ក្នុងរយៈពេល៧ខែឆ្នាំ២០២១។ នេះបើយោងតាមរបាយការណ៍ ដែលចេញផ្សាយដោយលោកវេង សាខុនក្រសួងកសិកម្ម រុក្ខាប្រមាញ់ និងនេសាទនៅថ្ងៃទី៣១ ខែកក្កដា ឆ្នាំ២០២១។
ដោយផ្អែកលើប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) របស់អគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល៧ខែឆ្នាំ២០២១នេះ កម្ពុជាបាននាំចេញកសិផលទៅក្រៅប្រទេសមាន បរិមាណសរុប ៥ ០៣២ ៩៦៨,៦០តោន (ជាង៥លានតោន) ទៅកាន់ទិសដៅ ៦៤ប្រទេស។មានការកើនឡើងចំនួន ២ ៣៤២ ៩៨១,៣៩តោន ស្មើនឹង ៨៧,១០% បើធៀបនឹងរយៈពេលដូចគ្នាក្នុងឆ្នាំ២០២០ គឺទទួលបានត្រឹមតែ ២ ៦៨៩ ៩៨៧,២២តោន ។
ការប៉ាន់ស្មានតម្លៃក្នុងរយៈពេល៧ខែឆ្នាំ២០២១ ដែលទទួលបានពីការនាំចេញកសិផល (ឯកតាតម្លៃផ្អែកតាមវិក្កយបត្ររបស់អ្នកនាំចេញ) មានចំនួន២ ៩៦៤ ៩៧៤ ៧១៤,៤៣ដុល្លារអាមេរិក (ជិត៣ពាន់លានដុល្លារ) ដែលក្នុងនោះ៖ – ការនាំចេញអង្ករមានចំនួន២៦១ ៨៣៥ ៩២៥ដុល្លារអាមេរិក – ការនាំចេញស្រូវមានចំនួន ៣២៩ ៣៥១ ៥២៤ដុល្លារអាមេរិក – ការនាំចេញកសិផលក្រៅពីស្រូវ-អង្ករមានចំនួន២ ៣៧៣ ៧៨៧ ២៦៥,៤៣ដុល្លារអាមេរិក។
ការនាំចេញកសិផលសរុបក្នុងរយៈពេល៧ខែឆ្នាំ២០២១ មានកំណើនចំនួន៨៧,១០% ក្នុងនោះកសិផល ក្រៅពីអង្ករមានការកើនឡើងចំនួន១០៨,៦៣% រីឯការនាំចេញអង្ករមានការថយចុះចំនួន-២៧,២៧% ដោយសារកង្វះទូរកុងតេន័រសម្រាប់ផ្ទុក និងតម្លៃដឹកជញ្ជូនកើនឡើង៕
