ដោយៈ សាវុធ
កំពតៈ អង្គការចៃកា (JICA) របស់ជប៉ុន គ្រោងសិក្សាអភិវឌ្ឍន៍មន្ទីរពេទ្យតំបន់ ក្នុងខេត្តកំពត ដើម្បីពង្រីកសេវាសុខាភិបាលឲ្យកាន់តែកៀកទៅនឹងប្រជាពលរដ្ឋ។
គម្រោងសិក្សាអភិវឌ្ឍន៍មន្ទីរពេទ្យតំបន់នេះ ត្រូវបានលើកឡើង នៅថ្ងៃទី២២ ខែកក្កដា ឆ្នាំ២០២១ ក្នុងកិច្ចពិភាក្សា រវាងជាវ តាយ អភិបាល នៃគណៈអភិបាលខេត្តកំពត និងតំណាងប្រតិភូអង្គការចៃកា ដែលដឹកនាំដោយលោកស្រី ហា យុ និងលោក យ៉ម៉ា សាគិ ទីប្រឹក្សាបច្ចេកទេស នៃអង្គការចៃកា មកពីទីក្រុងតូក្យូ ប្រទេសជប៉ុន ដើម្បីពិភាក្សាលើការអភិវឌ្ឍន៍ មន្ទីរពេទ្យបង្អែកខេត្ត ឲ្យក្លាយទៅជាមន្ទីរពេទ្យតំបន់។
តំណាងប្រតិភូអង្គការចៃកា បានឱ្យដឹងថា បេសកកម្មមកខេត្តកំពតលើកនេះ គឺតាមរយៈការស្នើសុំរបស់ក្រសួងសុខាភិបាល ដើម្បីសិក្សាអភិវឌ្ឍន៍មន្ទីរពេទ្យតំបន់ ក៏ដូចជាពង្រីកសេវាសុខាភិបាលឲ្យកាន់តែកៀកទៅនឹងប្រជាពលរដ្ឋ។
តំណាងប្រតិភូអង្គការចៃកា បានឱ្យដឹងទៀតថា ហើយការសិក្សាគម្រោងមន្ទីរពេទ្យតំបន់នេះ គឺធ្វើឡើងនៅខេត្តកំពត ខេត្តកំពង់ចាម ខេត្តស្វាយរៀង ខេត្តស្ទឹងត្រែង ខេត្តបាត់ដំបង និងរាជធានីភ្នំពេញ។ គម្រោងនេះគឺធ្លាប់បានធ្វើរួចហើយនៅឆ្នាំ២០១៧ ប៉ុន្តែមិនបានជោគជ័យ ទើបអង្គការចៃកាបានរៀបចំយន្តការថ្មី ដើម្បីសិក្សាឲ្យកាន់តែលម្អិត និងស៊ីជម្រៅ ឈានទៅរកការជោគជ័យ។
ជាចុងក្រោយ លោកអភិបាលខេត្ត បានថ្លែងនូវមតិគាំទ្រដល់គម្រោង និងស្នើលោកប្រធានមន្ទីរសុខាភិបាលខេត្តត្រូវចូលរួមសហការ ដើម្បីសម្រួលដល់ដំណើរការសិក្សា និងវាយតម្លៃ របស់ប្រតិភូអង្គការចៃកា ដើម្បីឲ្យគម្រោងនេះឆាប់ទទួលបានជោគជ័យ៕
