ដោយៈ សុវណ្ណារ៉ា
បន្ទាយមានជ័យៈ មន្ត្រីជាន់់ខ្ពស់ក្រសួងសាធារណៈការ និងដឹកជញ្ជូនបានឲ្យដឹងថា ច្រកទ្វារព្រំដែនអន្តរជាតិស្ទឹងបត់- បានណងអៀងកម្ពុជា-ថៃ ស្ថិតនៅក្នុងភូមិស្ទឹងបត់ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ឈមនឹងស្រុកអារញ្ញប្រាថេត ខេត្តស្រះកែវ ប្រទេសថៃ ដែលកំពុងដំណើរការសាងសង់គ្រោងនឹងបើកជាផ្លូវការនៅក្នុងរយៈពេល២១ខែខាងមុខនេះ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានមានប្រសាសន៍នៅល្ងាចថ្ងៃទី៥ ខែសីហា ឆ្នាំ២០២០កន្លងមកថា តាមគម្រោង និងផែនការ ច្រកទ្វារព្រំដែនអន្តរជាតិស្ទឹងបត់-បានណងអៀងកម្ពុជា-ថៃ នឹងបើកដំណើរការជាផ្លូវការក្រោយពេលបញ្ចប់សាងសង់ទាំងស្រុង នៅក្នុងរយៈពេល២១ខែខាងមុខនេះ ។
លោកបញ្ជាក់ថា “ពេលនេះខ្ញុំបានពិភាក្សា ជាមួយក្រុមហ៊ុនទទួលម៉ៅការសាងសង់ និងក្រុមហ៊ុនប្រឹក្សាពីគម្រោងអភិវឌ្ឍន៍ច្រកទ្វារអន្តរជាតិស្ទឹងបត់ ដូចជាការសាងសង់អាគាររដ្ឋបាល និងផ្លូវដែលមានគុណភាពជាដើម” ។
តាមរបាយការណ៍របស់ក្រុមហ៊ុនបានបង្ហាញថា គិតត្រឹមថ្ងៃទី៥ ខែសីហា ឆ្នាំ២០២០នេះ ទើបតែសម្រេចបានលទ្ធផល ប្រមាណ៥ភាគរយតែប៉ុណ្ណោះ ដែលបង្ហាញពីភាពយឺតយ៉ាវ។
លោកស៊ុន ចាន់ថុលបានបន្តថា “តាមគម្រោងនៅក្នុងកិច្ចសន្យាសាងសង់ គឺត្រូវបញ្ចប់ទាំងស្រុង នៅត្រឹមរយៈពេល២១ខែខាងមុខនេះ ប៉ុន្តែខ្ញុំមិនអាចរង់ចាំរហូតដល់២១ខែនោះទេ។ លោកបន្តថា “ខ្ញុំបានសម្រេចបើកច្រកដំណើរ ការជាបណ្តោះអាសន្ន ដោយការធ្វើផ្លូវវាងជាខ្នែង សម្រាប់ដឹកទំនិញរវាងប្រទេសទាំង។ ដោយឡែកសម្រាប់ឯកសារ ដោយសារតែយើងនៅមិនទាន់សាងសង់ អាគាររដ្ឋបាលរួចរាល់ ដូច្នេះត្រូវរៀបចំឯកសារនៅខាងថៃមួយរយៈពេលសិន” ។
ក្រុមហ៊ុន CM JV TKE ដែលបានទទួលម៉ៅការពីរដ្ឋ ក្នុងការស្ថាបនាអគាររដ្ឋបាលច្រកទ្វារព្រំដែនអន្តរជាតិស្ទឹងបត់ បានទទួលសាងសង់ផ្លូវភ្លោះមួយខ្សែ ទីតាំងត្រួតពិនិត្យរថយន្តដឹកទំនិញ ចំណតរថយន្ត ទីតាំងស្តុកទូកុងតឺន័រ អគាររដ្ឋបាល និងអគារស្នាក់នៅរបស់មន្ត្រីរាជការ ដែលបម្រើការងារប្រចាំច្រក ដោយប្រើប្រាស់រយៈពេលសាងសង់ចំនួន២ឆ្នាំដើម្បីស្ថាបនាឲ្យទាន់ពេលវេលា។
ច្រកទ្វារព្រំដែនអន្តរជាតិនេះ នឹងបម្រើតែសេវាដឹកជញ្ជូនទំនិញប៉ុណ្ណោះ ដោយរក្សាទុកច្រកអន្តរជាតិប៉ោយប៉ែត សម្រាប់បម្រើតែសេវាដឹកជញ្ជូនភ្ញៀវទេសចរ ដើម្បីកាត់បន្ថយការកកស្ទះចរាចរណ៍ ក៏ដូចជាផ្ដល់ភាពងាយស្រួល ដល់សមត្ថកិច្ចក្នុងការត្រួតពិនិត្យទំនិញ ដឹកជញ្ជូនឆ្លងកាត់ព្រំដែនឱ្យមានប្រសិទ្ធភាព តម្លាភាព និងចំណេញពេលវេលាច្រើន៕