ដោយៈ គៀតឈូ
ហុងកុងៈ រូបិយប័ណ្ណឌីជីថល Bitcoin បានកើនឡើងវិញបន្តិចនៅថ្ងៃអង្គារ មួយថ្ងៃបន្ទាប់ពីធ្លាក់ចុះរយៈពេលពីរសប្តាហ៍ បន្ទាប់ពីធនាគារកណ្តាលចិនបានបញ្ជាក់ជាថ្មីនូវបទប្បញ្ញត្តិក្នុងរឹតត្បិតលើរូបិយប័ណ្ណឌីជីថលជាច្រើន (cryptocurrencies) និងរឹតត្បិតបណ្តាញជួញដូរសម្រាប់ប្រជាជនចិន។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២២ ខែមិថុនា ឆ្នាំ២០២១។
រូបិយប័ណ្ណឌីជីថលធំបំផុតនៅលើពិភពលោក (Bitcoin) បានកើនឡើងវិញ៤.៥៨% ដល់៣៣.០០០ដុល្លារ បន្ទាប់ពីបានធ្លាក់ចុះជាង១០% កាលពីថ្ងៃចន្ទ។ Ether ដែលជារូបិយប័ណ្ណឌីជីថលធំបំផុតទី២ បានកើនឡើង៥.០៥% ស្មើនឹង១,៩៨៣ដុល្លារ បន្ទាប់ពីបានធ្លាក់ចុះរយៈពេល៥សប្តាហ៍។
ការលក់ចេញរូបិយប័ណ្ណឌីជីថល កាលពីថ្ងៃចន្ទ កើនឡើង ដោយសេចក្តីប្រកាសមួយរបស់ធនាគារកណ្តាលចិន ដែលឱ្យដឹងថា ខ្លួនបានបញ្ជាឱ្យធនាគារធំៗ និងក្រុមហ៊ុនទូទាត់របស់ប្រទេសចិន រឹតបន្តឹងឱ្យកាន់ខ្លាំងលើការជួញដូររូបិយប័ណ្ណឌីជីថល។
លោក Bobby Lee ស្ថាបនិកនិងជានាយកប្រតិបត្តិក្រុមហ៊ុន Ballet ដែលជាកម្មវិធីកាបូបលុយឌីជីថល និងជាអតីតនាយកប្រតិបត្តិក្រុមហ៊ុន BTC China ដែលជាកន្លែងប្តូរ Bitcoin ជាមួយរូបិយប័ណ្ណ លើកដំបូងរបស់ចិន បានឱ្យដឹងថា “វាអាចនិយាយថា ប្រតិបត្តិការដកប្រាក់មិនប្រើប្រាសបញ្ជរ (OTC) ឥឡូវនេះមិនស្របច្បាប់ទេ … យើងមិនត្រូវបានអនុញ្ញាតដោយធនាគារ ដើម្បីផ្ទេរប្រាក់សម្រាប់ការទិញ និងលក់ cryptocurrency ទេ”។
ការផ្លាស់ប្តូររូបិយប័ណ្ណឌីជីថលត្រូវបានដកចេញពីប្រទេសចិ ដោយការផ្លាស់ប្តូរវិធានច្បាប់ឆ្នាំ២០១៧ ប៉ុន្តែតាមរយៈវេទិកា (OTC) ដែលមានមូលដ្ឋាននៅក្រៅប្រទេសបង្កើតឡើង ដើម្បីដើរតួជាឈ្មួញកណ្តាលទទួលការទូទាត់ពីប្រជាជនដែលមានមូលដ្ឋាននៅប្រទេសចិន និងទិញរូបិយប័ណ្ណឌីជីថល ជំនួសពួកគេ៕