ដោយៈគង់ ម៉ាលីនណា
ភ្នំពេញៈ ក្រសួងទេសចរណ៍បានប្រកាសលើកទឹកចិត្ត ឱ្យយុវជនវ័យក្មេងក្នុងវិស័យទេសចរណ៍ ចូលរួមដាក់ពាក្យប្រកួតប្រជែងក្នុងកម្មវិធី «សហគ្រិនវ័យក្មេងក្នុងវិស័យទេសចរណ៍ជនបទ» (UNWTO Rural Tourism Startup Competition)។
កម្មវិធីនេះគាំទ្រដោយអង្គការទេសចរណ៍ពិភពលោក (UNWTO) ដែលកម្មវិធីនេះ នឹងអាចជួយឱ្យអ្នកចូលរួមទទួលបាននូវជំនួយបច្ចេកទេស សម្រាប់ពង្រឹងអាជីវកម្ម និងការធ្វើបទបង្ហាញពីទម្រង់អាជីវកម្មរបស់ខ្លួន នៅក្នុងមហាសន្និបាទអង្គការទេសចរណ៍ពិភពលោកនៅខែតុលាខាងមុខ។
យោងតាមលិខិតជូនដំណឹងផ្សព្វផ្សាយ លើបណ្តាញសង្គមផ្លូវការរបស់ក្រសួងទេសចរណ៍នាថ្ងៃទី ១៧ ខែមិថុនាបានឱ្យដឹងថា ក្រោមកិច្ចសហការ និងការគាំទ្រពីអង្គការទេសចរណ៍ពិភពលោក ក្រសួងទេសចរណ៍សូមជូនដំណឹង និងលើកទឹកចិត្តដល់យុវជនដែលជាសហគ្រិនវ័យក្មេង ក្នុងវិស័យទេសចរណ៍ ឬមានគម្រោងបង្កើតមុខរបរដែលអាចជួយដល់សហគមន៍ជនបទ ងើបចេញពីវិបត្តិកូវីដ១៩ ទាំងអស់ឱ្យចូលរួមក្នុងកម្មវិធីប្រកួតប្រជែង “សហគ្រិនវ័យក្មេងក្នុងវិស័យទេសចរណ៍ជនបទ” របស់អង្គការទេសចរណ៍ពិភពលោក។
សេចក្តីជូនដំណឹងដដែលបានបញ្ជាក់ថា កម្មវិធីប្រកួតប្រជែងនេះ មានគោលដៅជ្រើសរើសសហគ្រិនវ័យក្មេងឆ្នើម ពីប្រទេសសមាជិកអង្គការទេសចរណ៍ពិភពលោក ដើម្បីជំរុញការបង្កើតអាជីវកម្មទេសចរណ៍ ជាពិសេសនៅតាមតំបន់គោលដៅទេសចរណ៍ជនបទ ដើម្បីទ្រទ្រង់ជីវភាពរស់នៅរបស់ប្រជាពលរដ្ឋមូលដ្ឋាន ឆ្ពោះទៅកាន់ការអភិវឌ្ឍទេសចរណ៍ប្រកបដោយចីរភាព បរិយាបន្ន និងភាពធន់កាន់តែប្រសើរ ជាពិសេសចូលរួមដោះស្រាយផលប៉ះពាល់នៃវិបត្តិកូវីដ ១៩ ក្នុងវិស័យទេសចរណ៍៕
