ដោយៈលក្ខិណា
ភ្នំពេញៈ រដ្ឋាភិបាលថៃបានបញ្ចេញ កញ្ចប់ទឹកប្រាក់ជាង៣២០លានដុល្លារអាមេរិក ដើម្បីជួយដល់សហគ្រាសធុនតូច និងមធ្យម(SME) ក្នុងវិស័យទេសចរណ៍ ដែលបានរងផលប៉ះពាល់ដ៏អាក្រក់ពីវិបត្តិជំងឺកូវីដ។
យោងតាមការចុះផ្សាយរបស់សារព័ត៌មានបាងកកប៉ុស្តិ៍ឱ្យដឹងថា ធនាគារសន្សំរដ្ឋាភិបាលថៃ (GSB) បានប្រកាសផ្តល់ប្រាក់កម្ចីសម្បទាន ក្នុងទំហំទឹកប្រាក់សរុប១០ពាន់លានបាត ឬប្រមាណ៣២០,១៧លានដុល្លារអាមេរិក ដើម្បីជួយដល់សហគ្រាសធុនតូច និងមធ្យម (SMEs) នៅក្នុងវិស័យទេសចរណ៍ ដើម្បីធ្វើឲ្យប្រសើរឡើងនូវលំហូរសាច់ប្រាក់របស់ពួកគេ ក្នុងអំឡុងពេលការឆ្លងរីករាលដាល រលកទី៣នៃជំងឺកូវីដ១៩ក្នុងប្រទេសនេះ។
ប្រភពដដែលថា ការផ្តល់ឥណទាននេះ នឹងត្រូវអនុវត្តក្នុងរយៈពេល៣ឆ្នាំ ដែលមានអត្រាការប្រាក់ជាមធ្យមទាបជាង៣ភាគរយ។ សហគ្រាសធុនតូច និងមធ្យម នឹងអាចដាក់ពាក្យស្នើសុំប្រាក់កម្ចីនេះ ដោយចុះឈ្មោះនៅត្រឹមថ្ងៃទី៣០ ខែមិថុនា ឬរហូតដល់មានការជូនដំណឹងសារជាថ្មី។
ការផ្តល់ឥណទាននេះ ធ្វើឡើងជាមួយអត្រាការប្រាក់ប្រចាំឆ្នាំដ៏ទាប ដោយក្នុងឆ្នាំទី១ គឺ០,១០% ឆ្នាំទី២ គឺ០,៩៩% និង ៥,៩៩% នៅឆ្នាំទី៣។ អត្រាការប្រាក់ជាមធ្យមគឺ ២,៣៦% ក្នុងរយៈពេល៣ ឆ្នាំ។ ប្រាក់កម្ចីអតិបរមាសម្រាប់បុគ្គលនិងនីតិបុគ្គល ត្រូវបានកំណត់ត្រឹម ១០លានបាត និង៥០លានបាតរៀងៗខ្លួន។
សារព័ត៌មានមួយនេះបានឱ្យដឹងទៀតថា សមាគមធនាគារថៃ បានប្តេជ្ញាផ្តល់ប្រាក់កម្ចីសម្បទានដែលមានតម្លៃ១០០ពាន់លានបាត ដល់អាជីវកម្មខ្នាតតូច និងមធ្យម នៅក្នុងវិស័យអាទិភាពសំខាន់ៗ ដែលរងផលប៉ះពាល់ពីវិត្តិកូវីដ១៩ ក្រោមគម្រោងកែប្រែរបស់ធនាគារកណ្តាលថៃ សម្រាប់រយៈពេល៦ខែខាងមុខ ខណៈធនាគារកណ្តាលថៃបានដាក់ប្រាក់សរុបចំនួន ២៥០ពាន់លានបាត សម្រាប់គម្រោងប្រាក់កម្ចីសម្បទាន ដល់វិស័យឯកជនរបស់ខ្លួន។
ធនាគារកណ្តាលថៃ បានផ្តល់ប្រាក់ចំនួន១១,៥៤ពាន់លានបាត ដល់ប្រតិបត្តិករអាជីវកម្មចំនួន៥.៤៦៥នាក់ គិតត្រឹមសប្ដាហ៍ទី៣នៃខែឧសភា ក្នុងនោះប្រហែល៦៣% នៃអ្នកខ្ចីប្រាក់កម្ចី គឺជាសហគ្រាសខ្នាតតូចបំផុត ដែលបន្ទាត់ឥណទានមិនលើសពី៥លានបាតក្នុងនីមួយៗ បន្ទាប់មកសហគ្រាសធុនតូច និងមធ្យម៣២,៦ភាគរយ៕
