ដោយៈគង់ ម៉ាលីន
ភ្នំពេញៈ ខណៈផ្លូវក្រវ៉ាត់ក្រុងទី៣បានសម្រេចសាងសង់៥០ភាគរយ ពន្លឺនិងក្តីសង្ឃឹមកំពុងមានដែលថា ផ្លូវក្រវ៉ាត់ក្រុងទី៤នឹងសាងសង់បន្ត ខណៈអ្នករកស៊ីដីធ្លី និងម្ចាស់ដីលើខ្សែផ្លូវនេះកំពុងរង់ចាំ។
មន្ត្រីជាន់ខ្ពស់របស់ក្រសួងសាធារណការ និងដឹកជញ្ជូនធ្លាប់បានអះអាងថា ផ្លូវខ្សែក្រវាត់ក្រុងទី៤ ដែលក្រសួងបានឱ្យក្រុមហ៊ុនសាជីវកម្មស្ពាន ថ្នល់ចិន សិក្សាតាំងពីឆ្នាំ២០១៨ បានសិក្សាចប់សព្វគ្រប់នៅឆ្នាំ២០២០ ដោយផ្លូវនេះមានប្រវែង១៩៥ គីឡូម៉ែត្រ ឆ្លងកាត់ខេត្តចំនួន៤ គឺខេត្តកំពង់ស្ពី តាកែវ កណ្តាល និងខេត្តព្រៃវែង។
លោកលីម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូនបញ្ជាក់នៅក្នុងសិក្ខាសាលាពិគ្រោះយោបល់ស្តីពី ការជ្រើសរើសផ្លូវក្រវាត់ក្រុងទី៤ ការគ្រប់គ្រងនិងការទប់ស្កាត់ការទន្ទ្រានដីចំណីផ្លូវ តម្រូវការហេដ្ឋានរចនាសម្ព័ន្ធនៃប្រព័ន្ធ ចម្រោះទឹកកខ្វក់បានមានប្រសាសន៍ឲ្យដឹងកាលពីពេលថ្មីៗនេះថា ក្នុងចំណោមខេត្តទាំង៤នេះ ផ្លូវក្រវ៉ាត់ក្រុងទី៤ នឹងកាត់ខេត្តកំពង់ស្ពីចំនួន៣ ស្រុកខេត្តតាកែវចំនួន១ ស្រុកខេត្តកណ្តាល៨ស្រុកនិងខេត្តព្រៃវែង២ស្រុក។
លោកបន្តទៀតថា “ផ្លូវក្រវាត់ក្រុងទី៤ ជាផ្លូវមួយមានសារៈសំខាន់ ដែលនឹងចូលរួមចំណែកកាត់បន្ថយការកក់ស្ទះចរាចរណ៍ និងជួយសម្រួលដល់ការដឹកជញ្ជូនទំនិញរបស់បងប្អូនប្រជាពលរដ្ឋ ទៅកាន់ផ្លូវជាតិផ្សេងៗ និងទៅកាន់ព្រំដែនប្រទេសវៀតណាម និងប្រទេសថៃ បានកាន់តែលឿន ចំណេញពេលវេលា កាត់បន្ថយការចំណាយបានមួយកំរិតទៀត” ។
លោកលឹម ស៊ីដេនីនបន្ថែមថា ក្រៅពីការគ្រប់គ្រង និងការទប់ស្កាត់ការទន្ទ្រានដីចំណីផ្លូវ តាមដងផ្លូវខុសច្បាប់ ឬការទន្ទ្រាន យកដីចំណីផ្លូវយកមកគ្រប់គ្រង បានធ្វើឲ្យមានការខូចខាត ដល់ហេដ្ឋារចនាសម្ព័ន្ធផ្លូវថ្នល់ បង្កឱ្យកកស្ទះដល់ហេដ្ឋារចនាសម្ព័ន្ឋ ប្រព័ន្ធលូបង្ហូរទឹក ប្រជាពលរដ្ឋនៅតាមបណ្ដាទីប្រជុំជន ឬទីក្រុង បានធ្វើឱ្យពិបាកក្នុងការគ្រប់គ្រងកាក់សំណល់ ការសម្អាតបរិស្ថានថែមទៀតផង។
លោកក៏បានជំរុញលើកទឹកចិត្តឲ្យក្រសួង ក៏ដូចជា មន្ទីរជំនាញពាក់ព័ន្ធ លើកសំណើទៅរដ្ឋបាលខេត្ត សិក្សាទីតាំងចាក់សំរាម ប្រព័ន្ធលូបង្ហូរទឹកកខ្វក់ និងការទន្ទ្រានយកដីចំណីផ្លូវ និងសំណូមពរឱ្យបងប្អូនប្រជាពលរដ្ឋ បញ្ឈប់សកម្មភាពការទន្ទ្រានយកដីចំណីផ្លូវ ការចាក់ដីលុបរំលោភលើដីចំណីផ្លូវ ដែលធ្វើឲ្យផ្លូវបាត់បង់សោភ័ណភាព នឹងបណ្ដាលឲ្យផ្លូវឆាប់ខូចមុនពេលកំណត់។
ក្រសួងសាធារណការ និងដឹកជញ្ជូនធ្លាប់បានរៀបចំសិក្ខាសាលា ក្នុងគោលបំណង ពិគ្រោះយោបល់ស្តីពីការជ្រើសរើសផ្លូវក្រវាត់ក្រុងទី៤ យន្តការការគ្រប់គ្រង និងការទប់ស្កាត់ការទន្ទ្រានដីចំណីផ្លូវ និងតម្រូវការហេដ្ឋានរចនាសម្ព័ន្ធ នៃប្រព័ន្ធចម្រោះទឹកកខ្វក់ ដោយមានការពិគ្រោះយោបល់ ជាមួយបណ្តាក្រសួងពាក់ព័ន្ធ រដ្ឋបាលថ្នាក់ក្រោមជាតិ និងដៃគូអភិវឌ្ឍន៍អំពីផលប៉ះពាល់លើ អនុវត្តគម្រោងនេះ និងដើម្បីប្រមូលធាតុចូលបន្ថែមឱ្យគ្រប់ជ្រុងជ្រោយ សម្រាប់ការអនុវត្តគម្រោងផ្លូវក្រវាត់ក្រុងទី៤នេះមានភាពរលូន និងប្រសិទ្ធភាពខ្ពស់។
ទីប្រឹក្សាសមាគមអ្នកអភិវឌ្ឈន៍ដីឡូត៍កម្ពុជា លោកយិន លាងគង់បានមានប្រសាសន៍ថា នៅកម្ពុជានៅពេលរដ្ឋាភិបាលប្រកាស សាងសង់គំរោងហេដ្ឋារចនាសម្ព័ន្ឋអ្វីមួយ តម្លៃដីនៅតំបន់នោះកើនឡើងជាស្វ័យប្រវត្តិ ជាក់ស្តែងតំបន់ផ្លូវក្រវ៉ាត់ក្រុងទី៣ មុនពេលប្រកាសសាងសង់ផ្លូវនេះ តម្លៃដីនៅតំបន់នោះមានចន្លោះពី១០ ទៅ២០ដុល្លារប៉ុណ្ណោះ ប៉ុន្តែបច្ចុប្បន្នតម្លៃដីនៅតំបន់នោះ បានឡើងថ្លៃដល់ចន្លោះពី១០០ ទៅ៤០០ដុល្លារអាមេរិកក្នុងមួយម៉ែត្រការ៉េ។
លោកបន្តថា “ការឡើងថ្លៃតម្លៃដីធ្លីជារឿងល្អសម្រាប់អ្នកមានដី ប៉ុន្តែវាក៏ជាឧបសគ្គសម្រាប់អ្នកអភិវឌ្ឈន៍មួយចំនួនផងដែរ ដោយសារទុនរបស់ពួកគេនៅមានកម្រិត ពិសេសអ្នកអភិវឌ្ឍន៍លំនៅដ្ឋានខ្នាតមធ្យម មិនអាចទិញយកមកសាងសង់បានឡើយ” ។ លោកបន្តថា “ហេតុផលដែលតម្លៃដីតែងតែឡើងថ្លៃ នៅតំបន់កសាងហេដ្ឋារចនាសម្ពូ័ន្ឋនានា គឺដោយសារមានកំនើននៃការធ្វើដំណើរ កំនើនប្រជាសាស្ត្រ និងកំនើននៃការវិនិយោគពីវិនិយោគិនជាតិ និងអន្តរជាតិ” ៕
