ដោយៈលក្ខិណា
ភ្នំពេញៈ នៅក្នុងកាលៈទេសៈ ដែលកម្ពុជាជួបនឹងវិបត្តិជំងឺកូវីដ១៩ ក្រុហ៊ុននិងសហគ្រាសជាច្រើន បានជួបនូវបញ្ហាបាត់បង់ប្រាក់ចំណូល តែក៏មានម្ចាស់អាជីវកម្ម ម្ចាស់សហគ្រាសមួយចំនួនបានបត់បែន ទៅតាមស្ថានភាពជាក់ស្ដែង ដែលជំរុញក្រុមហ៊ុននោះផ្លាស់ប្តូរ ពីចំនុចអវិជ្ជមានទៅជាចំនុចវិជ្ជមានវិញ។
លោកបណ្ឌិតអ៊ិន ចាន់នី ប្រធានសមាគមធនាគារនៅកម្ពុជា បានមានប្រសាសន៍ថា នៅក្នុងវិបត្តិនេះ ស្ទើរតែមិនមានក្រុមហ៊ុន ឬស្ថាប័នណាគេចផុតពីផលប៉ះពាល់នោះទេ លើកលែងតែក្រុមហ៊ុន បម្រើសេវាកម្មទូរគមនាគមន៍ ដែលត្រូវទទួលបានឱកាសល្អ សម្រាប់វិបត្តិនេះ។
លោកបន្តថា “ថ្វីត្បិតតែក្រុមហ៊ុនជាច្រើនបានប៉ះពាល់ ដោយសារកូវីដ១៩ពិតមែន តែក្រុមហ៊ុន និងសហគ្រាសខ្លះ បានចាប់យកឱកាសនៃវិបត្តិនេះ ប្រែក្លាយទៅជាឱកាសវិជ្ជមាន និងរកចំណូលបានទៅវិញ” ។
ជាក់ស្ដែងបណ្ដារោងចក្រកាត់ដេរមួយចំនួន បានផ្លាស់ប្តូរពីការផលិតសម្លៀកបំពាក់ ទៅការការផលិតម៉ាស់ ផលិតសម្ភារៈបរិក្ខា សម្រាប់វិស័យសុខាភិបាល ហើយអាចលក់ចេញបានដដែល និងមានកំណើនជាងមុនទៅទៀត ។
លោកថា “នេះគឺជាភាពឈ្លាសវៃមួយរបស់ម្ចាស់ក្រុមហ៊ុន ក្នុងការបត់បែនទៅតាមកាលៈទេសៈ និងបានស្វែងយល់ ពីតម្រូវការទីផ្សារចាំបាច់ក្នុងពេលមានវិបត្តិនៃជំងឺ។ លោកបន្ថែមថា “សម្រាប់វិស័យធនាគារ និងហិរញ្ញវត្ថុវិញ ក៏មានស្ថាប័នជាច្រើនបានវិវត្តន៍ទៅពង្រីកការប្រើប្រាស់បច្ចេកវិទ្យា ក្នុងវិស័យហិរញ្ញវត្ថុ ដោយបានស្វែងយល់ពីតម្រូវការនៃការប្រើប្រាស់បច្ចេកវិទ្យាហិរញ្ញវត្ថុ នៅក្នុងដំណាក់កាលនៃការឆ្លងរាលដាលជំងឺ” ។
ម្ចាស់អាជីវកម្ម ឬស្ថាប័ននីមួយៗ មិនអាចនៅតែធ្វើប្រតិបត្តិការដដែលៗនោះឡើយ គឺត្រូវមានការផ្លាស់ប្តូរ ដើម្បីសម្រួលដល់ប្រជាពលរដ្ឋ កាន់តែមានភាពងាយស្រួល ។
លោកបណ្ឌិតអ៊ិន ចាន់នីបានបន្ថែមទៀតថា ឆ្លងតាមបទពិសោធន៍នៃវិបត្តិ បរិយាកាសអាជីវកម្ម ដែលពឹងផ្អែកហេដ្ឋារចនាសម្ព័ន្ធតាមប្រពៃណី នឹងលែងមានតម្រូវការខ្ពស់ទៀតហើយ វានឹងប្រែប្រួលទៅតាមបច្ចេកវិទ្យាសម័យទំនើប ដោយអាចបម្រើសេវាកម្មពីចំងាយដោយមិនចាំបាច់ជួបមុខគ្នា ជាក់ស្ដែងនៅក្នុងវិស័យអប់រំក៏ដូច្នោះដែរ កាលពីមុនគ្រូនិងសិស្សគឺត្រូវបង្រៀនផ្ទាល់ៗ ហើយចំណេះភាគច្រើនបានពីគ្រូ តែសម័យនេះ សិស្សអាចធ្វើការស្រាវជ្រាវច្រើន ហើយគ្រូគ្រាន់តែបំពេញបន្ថែមប៉ុណ្ណោះ៕