ដោយគង់ ម៉ាលីនណា
ភ្នំពេញៈ ធនាគារជាតិនៃកម្ពុជា ហៅកាត់NBC បានអនុម័តឲ្យធនាគារហត្ថាបង្កើនទុន២៥លានដុល្លារបន្ថែមទៀត ដើម្បីផ្តល់ឥណទានជូនដល់អតិថិជន។
ប្រធានអគ្គនាយកធនាគារហត្ថាលោកឧកញ៉ាហួត អៀងតុងបានមានប្រសាសន៍ ឲ្យដឹងកាលពីថ្ងៃម្សិលម៉ិញនេះថា ធនាគារទើបទទួលបានការអនុម័តយល់ព្រម ពីធនាគារជាតិនៃកម្ពុជា ដើម្បីបង្កើនទំហំទូនរបស់ខ្លួន២៥លានដុល្លារបន្ថែមទៀត ដើម្បីផ្តល់ឥណទានជូនដល់ប្រជាពលរដ្ឋ ធ្វើយ៉ាងណាឲ្យមានសកម្មភាពក្នុងសេដ្ឋកិច្ច ដើម្បីជំរុញកំនើនសេដ្ឋកិច្ចកម្ពុជាងើបឡើងវិញក្រោយពីវិបត្តិកូវីដ១៩ ។
លោកបន្តថា “ដើមទុនថ្មីនេះនឹងជួយដល់វិស័យសហគ្រាសធុនតូច និងមធ្យម (SME) ឲ្យមានសកម្មភាព និងអភិវឌ្ឍន៍បានកាន់តែប្រសើរ ព្រោះ SME ជាឆ្អឹងខ្នងនៃសេដ្ឋកិច្ចជាតិ” ។លោកបន្តថា “នៅពេលសកម្មភាពអាជីវកម្ម របស់ក្រុមហ៊ុនមួយដំណើរការល្អ នឹងផ្តល់ការងារងារច្រើនដល់ប្រជាពលរដ្ឋ ដែលធ្វើឲ្យផលិតភាពក្នុងសេដ្ឋកិច្ចមានភាពរសរវើក និងធ្វើឲ្យសេដ្ឋកិច្ចជាតិកើនឡើង” ។
លោកឧកញ៉ាហួត អៀងតុងបានបន្តថា អ្វីដែលជាការងារស្នូលរបស់យើង ចង់ផ្តល់ឥណទានកាន់តែច្រើន និងធ្វើឲ្យប្រជាពលរដ្ឋបានទទួលទុនច្រើន ដើម្បីពង្រីកអាជីវកម្មរបស់ពួកគេប្រកបដោយគុណភាព និងបញ្ចៀសបាននូវហានិភ័យ ព្រោះយើងតែងតែនៅជាមួយអតិថិជន ដើម្បីផ្តល់ការប្រឹក្សា វិភាគពីមូលដ្ឋានអាជីវកម្មរបស់ពួកគេ ដើម្បីឲ្យអតិថិជនរបស់យើងបានទទួលជោគជ័យផងដែរ។
ធនាគារហត្ថាមានការិយាល័យទូទាំងប្រទេសចំនួន១៧៧ មានបុគ្គលិកចំនួន៥៦០០នាក់ និងមានទ្រព្យសកម្មកើនឡើងប្រមាណ១៥០០លានដុល្លារអាមេរិក។
អគ្គទេសាភិបាលធនាគារជាតិនៃកម្ពុជា លោកជា ចាន់តូធ្លាប់បានមានប្រសាសន៍ថា សុខភាពក្នុងវិស័យហិរញ្ញវត្ថុរបស់កម្ពុជា នៅតែមានភាពល្អប្រសើរ តាមរយៈការដាក់ចេញនូវគោលនយោបាយ ច្បាប់បទដ្ឋានគតិយុត្តិនានា ដែលផ្តល់ការលើកទឹកចិត្ត និងគាំទ្រដល់គ្រឹះស្ថានធនាគារ និងមីក្រូហិរញ្ញវត្ថុឲ្យទទួលបាននូវការអនុវត្តល្អ ក្នុងការធ្វើយ៉ាងណាឲ្យការផ្តល់ឥណទាន និងការដាក់ប្រាក់បញ្ញើរ ប្រកបដោយមូលដ្ឋានវិជ្ជាជីវៈនិងក្រមសីលធ៌ម៕
