ដោយៈ ម៉ាណេត
ភ្នំពេញៈ សមាជិកផ្ដល់សន្ទនីយភាព គឺជាសមាជិករបស់ក្រុមហ៊ុនផ្សារមូលបត្រកម្ពុជា (ផ.ម.ក.) ដែលមានភារកិច្ចជម្រុញសន្ទនីយភាពនៃភាគហ៊ុន ដែលពួកគេបានជ្រើសរើស ដោយត្រូវរក្សារគម្លាតថ្លៃបញ្ជាទិញនិងលក់ នៅក្នុងទីផ្សារឱ្យនៅស្មើឬតូចជាង១០ឯកតាគម្លាតថ្លៃ។
មានន័យថានៅពេលបញ្ជាទិញ និងលក់ល្អបំផុតរបស់ភាគហ៊ុនមួយ នៅលើទីផ្សារមានថ្លៃខុសគ្នាច្រើន លើសពី១០ឯកតាគម្លាតថ្លៃ សមាជិកផ្តល់សន្ទនីយភាពត្រូវដាក់បញ្ជាទិញ/លក់ ចូលក្នុងទីផ្សារធ្វើយ៉ាងណា ឱ្យគម្លាតថ្លៃនោះទាបជាងឬស្មើ១០ឯកតាគម្លាតថ្លៃ។
គេសង្កេតឃើញថា ភាគហ៊ុនដែលមានសមាជិក ផ្ដល់សន្ទនីយភាពជួយជម្រុញ មានទំនោរជួញដូរ និងសន្ទនីយភាពសកម្ម ជាងភាគហ៊ុនដទៃផ្សារមូលបត្រ គឺជាកន្លែងដែលមូលបត្រ ដូចជា ភាគហ៊ុននិងសញ្ញាបណ្ណ ត្រូវបានទិញនិងលក់ដោយវិនិយោគិនផ្សេងៗ រួមទាំងជាតិ និងអន្តរជាតិ។
ផ្សារមូលបត្រដើរតួនាទីយ៉ាងសំខាន់ ក្នុងការជម្រុញនូវសេដ្ឋកិច្ចរបស់ប្រទេសមួយ ដោយវាបានអនុញ្ញាតឱ្យក្រុមហ៊ុនសាជីវកម្ម សហគ្រាសសាធារណៈ និងរដ្ឋាភិបាលអាចប្រមូលទុន ដោយផ្ទាល់ពីសាធារណជន មកប្រើប្រាស់ដើម្បីពង្រីកអាជីវកម្ម ឬអភិវឌ្ឍន៏ហេដ្ឋារចនាសម្ព័ន្ធជាដើម។
ម្យ៉ាងវិញទៀត ទីផ្សារនេះទៀតសោត ក៏បានផ្តល់ឱកាសដល់អ្នកដែលមានប្រាក់សល់ពីការចំណាយ មានជម្រើសក្នុងការធ្វើពិពិធកម្ម សំណុំវិនិយោគរបស់ខ្លួន ឬធ្វើការសន្សំ(ជាមួយមូលបត្រដែលមានហានិភ័យទាប) ផងដែរ។
នៅពេលដែលមានលំហូរមូលធន ពីអ្នកមានប្រាក់ទៅកាន់អ្នក ដែលត្រូវការប្រាក់កើតឡើងប្រកបដោយប្រសិទ្ធភាព នោះសកម្មភាពសេដ្ឋកិច្ចដូចជាពាណិជ្ជកម្ម និងផលិតកម្មនឹងរីកលូតលាស់ ព្រមទាំងបង្កើតឱ្យមានការងារ និងទ្រព្យសម្បត្តិសម្រាប់ប្រជាជនទូទៅផងដែរ៕
