ដោយៈគង់ ម៉ាលីនណា
ភ្នំពេញៈ ផ្សារហ៊ុនបានរីកចម្រើនលឿនគួរសមក្នុងមួយរយៈចុងក្រោយនេះ ប៉ុន្តែចំណេះដឹងរបស់ប្រជាពលរដ្ឋ ក៏នៅមានកម្រិតផងដែរ ទាក់ទងនឹងការជួញដូរនៅក្នុងទីផ្សារដែលបានបង្កើតឡើងនេះ។
តើអ្នកចង់វិនិយោគលើផ្សារហ៊ុន ត្រូវធ្វើដូចម្តេចខ្លះ? ដំបូងយើងត្រូវធ្វើការជ្រើសរើសក្រុមហ៊ុនមូលបត្រ (Broker) ណាមួយក្នុងចំណោមសមាជិកទាំងអស់របស់ផ្សារមូលបត្រកម្ពុជា។
បន្ទាប់មក ក្រុមហ៊ុនមូលបត្រនោះ នឹងជួយស្នើរសុំលេខអត្តសញ្ញាណវិនិយោគិន (Investor ID) ពីគណៈកម្មការមូលបត្រកម្ពុជា (គ.ម.ក.) រួចហើយបើកគណនីជួញដូរមូលបត្រ(Trading Account)មួយឱ្យយើង។ បន្ទាប់ពីយើងមានគណនីជួញដូរ និងដាក់ប្រាក់ក្នុងគណនីជួញដូរហើយ វិនិយោគិនត្រូវរងចាំដល់ថ្ងៃស្អែក(ថ្ងៃធ្វើការ) ទើបអាចធ្វើការជួញដូរភាគហ៊ុននៅលើផ្សារមូលបត្រកម្ពុជាបាន។
វិនិយោគិនម្នាក់ ទទួលបានលេខអត្តសញ្ញាណវិនិយោគិនតែមួយប៉ុណ្ណោះ ប៉ុន្តែមានសិទ្ធិបើកគណនីជួញដូរ នៅគ្រប់ក្រុមហ៊ុនមូលបត្រទាំងអស់។
ជាមួយគ្នានេះ លោក អ្នកប្រាកដជាមានចម្ងល់ផងដែរថា តើការជួញដូរភាគហ៊ុន ត្រូវដំណើរការដូចម្តេចខ្លះ?។ នេះជាអ្វីដែលអ្នកត្រូវដឹង ដែលមានចំណុចសំខាន់ៗទាំងនេះ។
- វិនិយោគិនដាក់បញ្ជាទិញ ឬលក់ភាគហ៊ុនទៅកាន់ក្រុមហ៊ុនមូលបត្រ
- ក្រុមហ៊ុនមូលបត្រនឹងបញ្ជូនបញ្ជានោះបន្តមកកាន់ផ្សារមូលបត្រកម្ពុជា
- ផ្សារមូលបត្រកម្ពុជាផ្គូរផ្គងបញ្ជានោះ ជាមួយនឹងបញ្ជារបស់វិនិយោគិនផ្សេងទៀត។
- ផ្សារមូលបត្រកម្ពុជា នឹងផ្ដល់លទ្ធផលនៃការជួញដូរទៅក្រុមហ៊ុនមូលបត្រ។
- ហើយក្រុមហ៊ុនមូលបត្រ នឹងផ្ដល់ដំណឹងបន្តទៅកាន់វិនិយោគិនវិញ៕