ដោយៈ ចំណាន
ភ្នំពេញៈ តំណាងក្រុមហ៊ុនអាមេរិកនៅកម្ពុជា បានសរសេរលិខិតមួយទៅកាន់ស្ថានទូតសហរដ្ឋអាមេរិក ស្នើឲ្យស្ថានទូញបញ្ជូនសារទៅរដ្ឋាភិបាលអាមេរិកអំពីក្ដីបារម្ភរបស់ក្រុមហ៊ុនអាមេរិក ពាក់ព័ន្ធនឹងការកំណត់របស់យោធាថៃថា កំពង់ផែរបស់កម្ពុជាថា “មានហានិភ័យខ្ពស់” និងបិទផ្លូវដឹកជញ្ជូនប្រេងឥន្ធនៈ និងទំនិញផ្សេងទៀត។
លោក Casey Barnett ប្រធានសភាពាណិជ្ជកម្មអាមេរិកប្រចាំកម្ពុជា (AmCham) បានសរសេរនៅក្នុងលិខិតចុះថ្ងៃទី១៥ ខែធ្នូ ផ្ញើជូនលោកស្រី Bridgette Walker ភារធារីនៃស្ថានទូតអាមេរិកប្រចាំនៅភ្នំពេញ ដោយលោកបានស្នើសុំឱ្យស្ថានទូត ជម្រាបពីក្តីបារម្ភយ៉ាងខ្លាំងរបស់អាជីវកម្មអាមេរិក ទៅកាន់រដ្ឋាភិបាលសហរដ្ឋអាមេរិក ក៏ដូចជារដ្ឋាភិបាលថៃ។
បច្ចុប្បន្ននេះ មានអាជីវកម្មដែលគ្រប់គ្រង ដោយជនជាតិអាមេរិកប្រមាណ៨៦៥ក្រុមហ៊ុន បានចុះឈ្មោះនៅក្នុងប្រទេសកម្ពុជា ហើយក្រុមហ៊ុនរាប់រយទៀតធ្វើការរួមគ្នា ជាមួយក្រុមហ៊ុនផលិតរបស់កម្ពុជា ដើម្បីផលិតទំនិញសម្រាប់ម៉ាកយីហោអាមេរិក។
ក្រុមហ៊ុនទាំងនេះ តំណាងឱ្យការវិនិយោគរបស់សហរដ្ឋអាមេរិកជាច្រើនពាន់លានដុល្លារនៅក្នុងប្រទេសកម្ពុជា ដោយផ្តល់ទំនិញ និងសេវាកម្មដែលមានគុណភាពខ្ពស់ និងមានតម្លៃសមរម្យសម្រាប់គ្រួសារ និងអ្នកប្រើប្រាស់ទាំងកម្ពុជា និងអាមេរិក។
លោកបាននិយាយថា “ទំនាក់ទំនងរវាងសហរដ្ឋអាមេរិក និងកម្ពុជាបានរីកចម្រើនយ៉ាងខ្លាំង ក្នុងប៉ុន្មានឆ្នាំចុងក្រោយនេះ ជាពិសេសក្នុងឆ្នាំ២០២៥ ជាមួយនឹងការចុះហត្ថលេខា លើកិច្ចព្រមព្រៀងស្តីពីពាណិជ្ជកម្មទៅវិញទៅមក”។ លោកបន្ថែមថា “ជនជាតិអាមេរិករាប់ពាន់នាក់ រស់នៅក្នុងប្រទេសកម្ពុជាជាមួយគ្រួសារ កូនៗ និងមនុស្សជាទីស្រលាញ់របស់ពួកគេ។ ជនជាតិអាមេរិកបានបង្កើតសាលារៀន និងសេវាថែទាំសុខភាព មួយចំនួននៅក្នុងប្រទេសកម្ពុជា”។
លោកបានសរសេរថា“ដូច្នេះហើយ យើងបានកត់សម្គាល់ដោយក្តីបារម្ភយ៉ាងខ្លាំង ចំពោះសេចក្តីថ្លែងការណ៍របស់យោធាថៃ កាលពីថ្ងៃទី១៤ ខែធ្នូ ឆ្នាំ២០២៥ ដោយគំរាមកំហែងនឹងកំណត់កំពង់ផែរបស់កម្ពុជាថាជាហានិភ័យខ្ពស់ និងបិទផ្លូវដឹកជញ្ជូនប្រេងឥន្ធនៈ និងទំនិញផ្សេងទៀតតាមសមុទ្រ”។
កាលពីថ្ងៃទី១៤ ខែធ្នូ លោក Nara Khunkothom ជំនួយការអ្នកនាំពាក្យកងទ័ពជើងទឹកភូមិន្ទថៃ បានថ្លែងនៅមជ្ឈមណ្ឌលសារព័ត៌មានស្ថានភាពព្រំដែនថៃ-កម្ពុជា។ លោកបានពិពណ៌នាអំពីសំណើរបស់យោធាថៃក្នុងការទប់ស្កាត់ និងត្រួតពិនិត្យការដឹកជញ្ជូនប្រេងឥន្ធនៈ និងការផ្គត់ផ្គង់ផ្សេងទៀតទៅកាន់ប្រទេសកម្ពុជា ក៏ដូចជាការប្រកាសដែនទឹកជុំវិញកំពង់ផែរបស់កម្ពុជាថាជា “តំបន់ហានិភ័យខ្ពស់”។
លោក Barnett បាននិយាយថា “ការបិទផ្លូវប្រេងឥន្ធនៈនឹងមានផលវិបាកយ៉ាងធ្ងន់ធ្ងរដល់គ្រួសារ និងអាជីវកម្មអាមេរិកនៅក្នុងប្រទេសកម្ពុជា”។ លោកបន្ថែមថា “អាជីវកម្មអាមេរិកនឹងបិទទ្វារ ហើយគ្រួសារអាមេរិកនឹងប្រឈមមុខ នឹងបញ្ហាក្នុងការបំពេញតម្រូវការដឹកជញ្ជូន និងថាមពលប្រចាំថ្ងៃជាមូលដ្ឋាន រួមទាំងសម្រាប់សាលារៀន និងការព្យាបាលវេជ្ជសាស្ត្រផងដែរ។ ជនស៊ីវិលអាមេរិកនឹងរងទុក្ខ”។
យោងតាមលោកBarnett ពាណិជ្ជកម្មភាគច្រើនរវាងសហរដ្ឋអាមេរិក និងកម្ពុជា ត្រូវបានធ្វើឡើងតាមរយៈការដឹកជញ្ជូនតាមសមុទ្រ។
ការកំណត់កំពង់ផែស៊ីវិលរបស់កម្ពុជាថា ជាហានិភ័យខ្ពស់នឹងធ្វើឱ្យថ្លៃធានារ៉ាប់រង និងការដឹកជញ្ជូន មិនអាចមានលទ្ធភាពទិញបាន ដែលនឹងបំផ្លាញពាណិជ្ជកម្ម ដែលកំពុងរីកចម្រើនរវាងសហរដ្ឋអាមេរិក និងកម្ពុជា។
លោកបានបន្ថែមថា វាក៏នឹងរុញកម្មកររោងចក្រ ដែលក្រីក្រ និងងាយរងគ្រោះបំផុតជាងមួយលាននាក់ ឱ្យធ្លាក់ចូលក្នុងភាពក្រីក្រផងដែរ។ ការគំរាមកំហែងរបស់ថៃចំពោះកំពង់ផែ និងការដឹកជញ្ជូនប្រេងឥន្ធនៈរបស់កម្ពុជា គឺជាការកើនឡើងនៃជម្លោះដែលមិនចាំបាច់ និងឃោរឃៅ ដែលបង្កការឈឺចាប់យ៉ាងខ្លាំងដល់ប្រជាជនស៊ីវិល៕
