ដោយៈ និស្ស័យ
ភ្នំពេញៈ ទិន្នន័យបានបង្ហាញថា ក្នុងរយៈពេល៩ខែដំបូង កម្ពុជាបាននាំចេញកសិផលជាង១១លានតោន កើនឡើង៣០.៤៣ភាគរយបើធៀបនឹងរយៈពេលដូចគ្នាកាលពីឆ្នាំមុន និងរកចំណូលប្រហែល៣.៨៩ពាន់លានដុល្លារ។
នេះបើយោងតាមរបាយការណ៍ចេញផ្សាយ កាលពីម្សិលមិញដោយអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ។
របាយការណ៍បានបន្ថែមថា ការនាំចេញសរុបដែលបានកត់ត្រាក្នុងមូលដ្ឋានទិន្នន័យភូតគាមជាតិ សម្រេចបានប្រមាណ១១,១៣លានតោន ក្នុងនោះមានដំណាំមិនមែនស្រូវចំនួន៥,៣លានតោន និងស្រូវចំនួន៥,៨៤លានតោន (ស្រូវ៥,២លានតោន និងអង្ករចំនួន ៥៩៦,៣៤៣តោន) នាំចេញទៅកាន់ប្រទេសចំនួន៨៤នៅក្នុងពិភពលោក។
អគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ លោកងិន ឆាយ បានបញ្ជាក់ក្នុងរបាយការណ៍ថា រយៈពេល៩ខែដំបូងនៃឆ្នាំ២០២៥ ការនាំចេញដំណាំរបស់កម្ពុជាបានកើនឡើងប្រហែល២.៦០ លានតោន បើធៀបនឹងរយៈពេលដូចគ្នាក្នុងឆ្នាំ២០២៤។ ក្នុងចំណោមនោះ ការនាំចេញដំណាំមិនមែនស្រូវបានកើនឡើងចំនួន៣៤០,៥៧៧តោន ការនាំចេញស្រូវបានកើនឡើងជាង២លានតោន និងការនាំចេញអង្ករកើនឡើងចំនួន ១៥០,៤៣០តោន។
លោកបន្តថា ទោះបីជាការនាំចេញសរុប កើនឡើង៣០,៤៣ ភាគរយក៏ដោយ ក៏ផលិតផលមួយចំនួនបានធ្លាក់ចុះ។ ការនាំចេញដំឡូងមីស្រស់បានធ្លាក់ចុះជិត១៧ភាគរយ។ ទោះយ៉ាងណាក៏ដោយ ការនាំចេញដំឡូងមីស្ងួត និងម្សៅដំឡូងមីបានកើនឡើង ខណៈដែលកសិករបានផ្លាស់ប្តូរ ពីដំឡូងមីស្រស់ទៅជាទម្រង់ស្ងួត និងកែច្នៃសម្រាប់រក្សាទុកបានយូរ និងមានតម្លៃខ្ពស់។
លោកបានបន្ថែមថា តាមពិតទៅ ការនាំចេញដំឡូងមីស្ងួតបានកើនឡើង ៥៧,៦២ ភាគរយ ខណៈម្សៅដំឡូងមីកើនឡើង ៨៣,៤៩ ភាគរយ បើធៀបនឹងរយៈពេលដូចគ្នាក្នុងឆ្នាំ២០២៤៕
