ដោយៈ គង់ ម៉ាណា
ភ្នំពេញៈ ព្រះមហាក្សត្រប្រទេស លុច ហ្សំបួគគ្រោងបំពេញទស្សនកិច្ចជាន់ខ្ពស់នៅកម្ពុជា ស្របពេលប្រទេសទាំងពីរគ្រោងពង្រីកទំនាក់ទំនងទ្វេរភាគីបន្ថែមទៀត។
ព័ត៌មាននេះត្រូវបានលើកឡើងកាលពីថ្ងៃទី២៨ កុម្ភៈម្សិលម៉ិញនេះ ក្នុងជំនួបរវាងលោកឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី២ ក្រុមប្រឹក្សាអភិវឌ្ឍន៍កម្ពុជា (ក.អ.ក) បានទទួលជំនួបសម្ដែងការគួរសម និងពិភាក្សាការងារជាមួយគណៈប្រតិភូក្រសួងការបរទេសលុចសំបួ (Luxembourg)ដែលដឹកនាំដោយលោក Georges Ternes, អគ្គនាយកសហប្រតិបត្តិការអភិវឌ្ឍន៍ និងកិច្ចការមនុស្សធម៌នៃក្រសួងការបរទេសលុចសំបួ។
គោលដៅចម្បងនៃជំនួបនេះ ដូចជា ទី១)ដើម្បីពិភាក្សាការងារស្ដីពីការត្រៀមរៀបចំ ព្រះរាជដំណើរទស្សនកិច្ចជាន់ខ្ពស់ របស់ព្រះរជ្ជទាយាទនៃប្រទេសលុចសំបួ His Royal Highness Prince Guillaume Jean Joseph Marie ដែលគ្រោងនឹងយាងមកបំពេញ ព្រះរាជទស្សនកិច្ចជាន់ខ្ពស់នៅកម្ពុជា ចាប់ពីថ្ងៃទី៣០ ខែមីនា ដល់ថ្ងៃទី៣ ខែមេសា ឆ្នាំ២០២៥ ខាងមុខនេះ និងទី២) ដើម្បីពង្រឹងកិច្ចសហប្រតិបត្តិការអភិវឌ្ឍន៍ និងភាពជាដៃគូទ្វេភាគីកម្ពុជា-លុចសំបួនាពេលអនាគត។
ជាមួយគ្នានេះ លោកទេសរដ្ឋមន្ត្រី និងលោកប្រធានប្រតិភូ បានបង្ហាញជំហរយ៉ាងមុតមាំ និងសង្ឃឹមជឿជាក់ថាភាពជាដៃគូ ក្នុងកិច្ចសហប្រតិបត្តិការរវាងកម្ពុជា និងលុចសំបួ នឹងត្រូវបានពង្រឹង និងពង្រីកកាន់តែល្អប្រសើរនាពេលអនាគត៕
