ប្រទេសចិនកំពុងជួបការលំបាកក្នុងការទាក់ទាញអ្នកវិនិយោគបរទេសឱ្យត្រលប់ទៅវិញ

ដោយៈ តែម សុខុម

ប៉េកាំងៈ ប្រទេសចិន ពេលនេះកំពុងជួបការលំបាក ក្នុងការព្យាយាមទាក់ទាញ អ្នកវិនិយោគបរទេសឱ្យត្រលប់ទៅវិញ ខណៈទិន្នន័យបង្ហាញថា ការវិនិយោគផ្ទាល់ពីបរទេស (FDI) កាន់តែច្រើនបានបន្តហូរចេញពីប្រទេសនេះច្រើនជាងហូរចូល។

វាជាសញ្ញាបង្ហាញថា ក្រុមហ៊ុននានាកំពុងតែព្យាយាម ធ្វើពិពិធកម្មខ្សែសង្វាក់ផ្គត់ផ្គង់របស់ខ្លួន នៅក្រៅប្រទេសចិន ដើម្បីកាត់បន្ថយហានិភ័យ។ នេះបើយោងតាមសារព័ត៌មាន Japan Times ចុះផ្សាយនៅថ្ងៃព្រហស្បតិ៍ ទី៩ ខែវិច្ឆិកា នេះ។

ការវិនិយោគផ្ទាល់ពីបរទេសក្នុងប្រទេសចិន បានបន្តធ្លាក់ចុះឥតឈប់ឈរក្នុងរយៈពេល២ឆ្នាំកន្លងមកនេះ។បន្ទាប់ពីឡើងដល់កម្រិតកំពូល ជាង១០១ពាន់លានដុល្លារអាមេរិក ក្នុងត្រីមាសទី១ ដើមឆ្នាំ២០២២ ទំហំវិនិយោគផ្ទាល់ពីបរទេសបានធ្លាក់ចុះ ស្ទើរតែរាល់ត្រីមាសចាប់តាំងពីពេលនោះមក។

ទំហំវិនិយោគផ្ទាល់ពីបរទេស បានធ្លាក់ចុះ១១,៨ពាន់លានដុល្លារអាមេរិក ក្នុងរយៈពេលពីខែកក្កដា ដល់ខែកញ្ញា ដែលជាការធ្លាក់ចុះដំបូង ចាប់តាំងពីការកត់ត្រាបានចាប់ផ្ដើមក្នុងឆ្នាំ១៩៩៨។

លោក Robert Carnell ប្រធានផ្នែកស្រាវជ្រាវប្រចាំតំបន់អាស៊ី-ប៉ាស៊ីហ្វិក នៃក្រុមហ៊ុនហិរញ្ញវត្ថុ និងធនាគារហូឡង់ ING Groep NV បានធ្វើការកត់សម្គាល់ថា “នេះប្រហែលគ្រាន់តែជាសញ្ញា នៃការចាប់ផ្ដើមដែលបង្ហាញថា អ្នកវិនិយោគកាន់តែច្រើនឡើង កំពុងសម្លឹងរកគោលដៅវិនិយោគផ្សេងៗក្រៅពីប្រទេសចិន”៕ Japan Times ៕