ដោយៈ សុខុម
ប៉េកាំង: សេដ្ឋវិទូ និងធនាគារវិនិយោគជាច្រើន បានដំឡើងការព្យាកររបស់ខ្លួនថា ប្រទេសចិនក្នុងឆ្នាំ២០២៣ នេះនឹងសម្រេចបានកំណើនផលទុនជាតិសរុប (GDP) ចន្លោះពី៦% ទៅ៦,៥%។
ការដំឡើងការព្យាករនេះធ្វើឡើង បន្ទាប់ពីទីផ្សារប្រើប្រាស់ក្នុងប្រទេសចិន មានសន្ទុះកើនឡើងខ្លាំង អំឡុងបុណ្យចូលឆ្នាំថ្មីប្រពៃណីចិន។ នេះបើយោងតាមគេហទំព័រ Livemint.com ដែលបានចុះផ្សាយដោយដកស្រង់ប្រភពពីកាសែត Global Times កាលពីថ្ងៃច័ន្ទ ទី២៧ ខែកុម្ភៈ។
លោក Chen Fengying សេដ្ឋវិទូ និងជាអតីតនាយកវិទ្យាស្ថានសិក្សាសេដ្ឋកិច្ចពិភពលោក (Institute of World Economic Studies) នៅប្រទេសស៊ុយអែត បានប្រាប់កាសែត Global Times ថា សេដ្ឋកិច្ចរបស់ប្រទេសចិន អាចនឹងសម្រេចបានកំណើន ក្នុងរង្វង់៦%នៅក្នុងឆ្នាំ២០២៣។
សេដ្ឋវិទូរូបនេះគូសបញ្ជាក់ថា ការស្ទុះងើបឡើងវិញនៃសេដ្ឋកិច្ចរបស់ប្រទេសចិន នេះគឺដោយសារគោលនយោបាយគាំទ្រដ៏រឹងមាំ និងការថមថយនៃវិបត្តិកូវីដ-១៩ ព្រមទាំងកំណើនគួរឱ្យកត់សម្គាល់ នៅក្នុងវិស័យដែលកំពុងរីកចម្រើននានា។
ទន្ទឹមនេះ សេដ្ឋវិទូមួយរូបទៀតឈ្មោះ Cao Heping ដែលមកពីសាកលវិទ្យាល័យប៉េកាំង (Peking University) ក៏បានព្យាករដែរថា ប្រទេសចិន អាចនឹងសម្រេចបានកំណើន GDP ចន្លោះពី៦%ទៅ៦,៥%។
លោក Cao Heping បានប្រាប់កាសែត Global Times ថា ឱកាសវិនិយោគថ្មីៗក្នុងការជួសជុលបណ្តាញ និងហេដ្ឋារចនាសម្ព័ន្ធនៅតាមតំបន់ជនបទ ព្រមទាំងការធ្វើឱ្យប្រសើរឡើង នូវប្រព័ន្ធឌីជីថលនៅក្នុងគម្រោងហេដ្ឋារចនាសម្ព័ន្ធខ្នាតធំនានា ដូចជា ផ្លូវថ្នល់ ផ្លូវដែក ផែ និងគម្រោងផ្សេងទៀតជាដើមនោះ នឹងផ្ដល់កំណើនដល់ឧស្សាហកម្មថ្មីៗ ហើយវានឹងជួយកែប្រែស្ថានភាពសេដ្ឋកិច្ចរបស់ប្រទេសចិនបានច្រើន។
ការលើកឡើងទាំងនេះធ្វើឡើង នៅពេលមូលនិធិរូបិយវត្ថុអន្តរជាតិ (IMF) បានព្យាករណ៍ថា សេដ្ឋកិច្ចធំបំផុតទី២ របស់ពិភពលោកមួយនេះនឹងសម្រេចបានកំណើនក្នុងរង្វង់៥,២%ក្នុងឆ្នាំនេះ។
លោកស្រី Sonali Jain-Chandra ប្រធានបេសកកម្មរបស់ស្ថាប័ន IMFសម្រាប់ប្រទេសចិន បានថ្លែងក្នុងសន្និសីទសារព័ត៌មាន កាលពីថ្ងៃសុក្រ សប្ដាហ៍មុនថា សេដ្ឋកិច្ចចិន “កំពុងដំណើរការក្រោមសក្តានុពល នៅឡើយ” ក្នុងឆ្នាំ២០២៣។
កាលពីថ្ងៃទី១៩ ខែមករា ដើមឆ្នាំនេះ លោកស្រីGita Gopinath នាយករងនៃស្ថាប័ន IMF បានលើកឡើងថា សេដ្ឋកិច្ចប្រទេសចិន អាចនឹងមានសន្ទុះងើបឡើងខ្លាំង ចាប់ពីត្រីមាសទី២ តទៅដោយផ្អែកលើស្ថានភាពឆ្លងកូវីដ-១៩ នាពេលបច្ចុប្បន្ន បន្ទាប់ពីដកចេញវិធានការណ៍ រឹតបន្តឹងកូវីដ-១៩ ភាគច្រើន៕ Livemint.com៕
