ដោយ: គង់ លាងហួរ
ភ្នំពេញ: កម្ពុជាបានដាក់ឱ្យដំណើរការកម្មវិធី សេវាកសិកម្មសម្រាប់សេដ្ឋកិច្ចជនបទរួមមួយ និងពាណិជ្ជកម្មកសិកម្ម ក្នុងគោលបំណងភ្ជាប់ផលិតផលកសិកម្មទៅនឹងទីផ្សារ។
គម្រោងដែលមានរយៈពេល៧ឆ្នាំនេះ ត្រូវបានរៀបចំឡើង ដើម្បីជំរុញពាណិជ្ជកម្មផលិតផលកសិកម្មសំខាន់ៗ ដូចជា បន្លែ គ្រាប់ស្វាយចន្ទី ផ្លែឈើស្រស់ ផលិតផលផ្លែឈើកែច្នៃ និងបសុបក្សី។
លោកឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា “គម្រោងនេះនឹងជួយតភ្ជាប់ផលិតផល កសិកម្មរបស់កសិករជាមួយនឹងទីផ្សារនាំចេញ និងក្នុងស្រុក”។លោកបានបន្តថា “វានឹងជួយជំរុញសេដ្ឋកិច្ចជនបទ របស់ប្រទេសកម្ពុជា តាមរយៈកំណើនកសិកម្មរួមនិងនិរន្តរភាព”។
លោករដ្ឋមន្ត្រីបានថ្លែងអំណរគុណ ដល់មូលនិធិអន្តរជាតិសម្រាប់ការអភិវឌ្ឍន៍កសិកម្ម និងអ្នកពាក់ព័ន្ធផ្សេងទៀត ដែលបានគាំទ្រកម្មវិធីនេះ ដែលមានសារៈសំខាន់ ក្នុងការលើកកម្ពស់ជីវភាពរបស់កសិករកម្ពុជា និងជួយកាត់បន្ថយភាពក្រីក្រ។
យោងតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កម្មវិធីនេះ នឹងផ្តល់អត្ថប្រយោជន៍ដល់កសិករខ្នាតតូច ចំនួន១២៥.០០០នាក់ ដែលរស់នៅ ឬជិតបន្ទាត់នៃភាពក្រីក្រ។
ដោយមានប្រជាជនចំនួន១៦លាននាក់ អត្រានៃភាពក្រីក្ររបស់ប្រទេសកម្ពុជា បានស្ថិតនៅត្រឹម១៧,៨ភាគរយក្នុងឆ្នាំ២០២០។ នេះបើយោងតាមក្រសួងផែនការ។
យោងតាមធនាគារពិភពលោកនៅកម្ពុជាបានឱ្យដឹងថា ខ្សែបន្ទាត់ភាពក្រីក្រជាតិ ក្នុងប្រទេសកម្ពុជាបច្ចុប្បន្នគឺ១០.៩៥១រៀល ឬ២,៧ដុល្លារអាមេរិកក្នុងមួយថ្ងៃ៕
