ដោយ: លាងហួរ
ប៉េកាំង: គម្រោងជាង៤០០ ដែលមានទំហំទឹកប្រាក់ជាង៥៤ពាន់លានដុល្លារអាមេរិក ត្រូវបានចុះហត្ថលេខា នៅក្រោមគំនិតផ្តួចផ្តើមរបស់ប្រទេសចិន-សិង្ហបុរី (Chongqing) ស្តីពី ការតភ្ជាប់ជាយុទ្ធសាស្រ្តក្នុងរយៈពេល៧ឆ្នាំកន្លងមកនេះ។
គម្រោងទាំងនោះ រួមមាន គម្រោងកិច្ចសហប្រតិបត្តិការ រវាងរដ្ឋាភិបាល និងធុរកិច្ចចំនួន២១៨ ដែលមានតម្លៃ២៥,២៦ពាន់លានដុល្លារអាមេរិក និងគម្រោងសេវាកម្មហិរញ្ញវត្ថុចំនួន២៣៥ ដែលមានតម្លៃ២៩,០៤ពាន់លានដុល្លារអាមេរិក។
ការិយាល័យរដ្ឋបាលនៃគំនិតផ្តួចផ្តើមនេះ បានប្រកាសកាលពីថ្ងៃចន្ទ ទី១៤ ខែវិច្ឆិកាថា គម្រោងទាំងនេះ បានធ្វើឱ្យប្រសើរឡើងនូវទំនាក់ទំនងរវាងតំបន់ភាគខាងលិចនៃប្រទេសចិន និងសមាគមប្រជាជាតិអាស៊ីអាគ្នេយ៍ (អាស៊ាន)។
លោក Zeng Jinghua ប្រធានគំនិតផ្តួចផ្តើមចិន-សិង្ហបុរី (Chongqing) ស្តីពីការតភ្ជាប់ជាយុទ្ធសាស្ត្រ បានមានប្រសាសន៍ថា គម្រោងហិរញ្ញប្បទានឆ្លងព្រំដែន មានទំហំទឹកប្រាក់ប្រហែល១៨,៥៩ពាន់លានដុល្លារអាមេរិក ដែលគ្របដណ្តប់ខេត្តចំនួន១០ តំបន់ស្វយ័ត និងក្រុងនៅភាគខាងលិចនៃប្រទេសចិន។
ច្រករបៀងពាណិជ្ជកម្មដី -សមុទ្រអន្តរជាតិថ្មី ដែលជាច្រកឆ្លងកាត់ពាណិជ្ជកម្ម និងដឹកជញ្ជូនរួមគ្នាដោយប្រទេសសិង្ហបុរី និងតំបន់ភាគខាងលិចនៃប្រទេសចិនកម្រិតខេត្ត ដោយមានទីក្រុងChongqing ជាមជ្ឈមណ្ឌលប្រតិបត្តិការរបស់ខ្លួន បានតភ្ជាប់កំពង់ផែចំនួន៣៣៥ នៅក្នុងប្រទេសចំនួន១១៣។
ទន្ទឹមនឹងនោះ សហគ្រាសប្រមាណ២០០ មកពីភាគខាងលិចនៃប្រទេសចិន និងបណ្តាប្រទេសអាស៊ាន ក៏បានចូលរួមក្នុងកិច្ចសហប្រតិបត្តិការកសិកម្មក្រោមគំនិតផ្តួចផ្តើមនេះផងដែរ៕