ដោយ: ម៉ាលីស
ព្រះសីហនុៈ រដ្ឋបាលខេត្តព្រះសីហនុ បានប្រកាសលទ្ធផលចំណូលពន្ធក្នុងរយៈពេល២ខែដំបូងឆ្នាម២០២២ ដែលជាលទ្ធផលនៃពន្ធអាករគ្រប់ប្រភេទបានចំនួន១៩.៦០៧.៣៩លានរៀល ដែលស្មើរប្រមាន ៤.៩០លានដុល្លារអាមេរិក។
កាលពីថ្ងៃទី៣០ ខែមីនា ឆ្នាំ២០២២ លោក គួច ចំរើន អភិបាល នៃ គណអភិបាលខេត្តព្រះសីហនុ អញ្ជើញស្តាប់របាយការណ៍សាខាពន្ធដារខេត្តព្រះសីហនុ ដោយមានការចូលរួមពីលោកនាយក នាយករងរដ្ឋបាលសាលាខេត្ត លោកអភិបាល អភិបាលរងក្រុងស្រុក និងប្រធានមន្ទីរអង្គភាពពាក់ព័ន្ធ។
លោក សន ស៊ីផល ប្រធានសាខាពន្ធដារខេត្តព្រះសីហនុ បានរាយការណ៍ពីសកម្មភាពការងារ គ្រប់គ្រងចំណូលពន្ធរយៈពេល៣ឆ្នាំ ចាប់ពីឆ្នាំ២០១៩-២០២១ ដូចខាងក្រោមៈ នៅក្នុងឆ្នាំ២០១៩ អនុលោមតាមផែនការកំណត់ សាខាពន្ធដារខេត្តព្រះសីហនុ ប្រមូលចំណូលពន្ធ-អាករគ្រប់ប្រភេទបានចំនួន ៦៦.៩៦២,០០លានរៀល។ លទ្ធផលប្រមូលចំណូលពន្ធ-អាករគ្រប់ប្រភេទបានចំនួន ២០២.៣៦១,០០លានរៀល ស្មើនឹង ៣០២,២០ភាគរយនៃផែនការ។ ឆ្នាំ២០២០ ប្រមូលចំណូលពន្ធ-អាករគ្រប់ប្រភេទបានចំនួន ២៥៨.២៤៩,០០លានរៀល។
លទ្ធផលប្រមូលចំណូលពន្ធ-អាករគ្រប់ប្រភេទបាន ១៥៨.៥៦១,២៨លានរៀល ស្មើនឹង ១០០,២០ភាគរយ និងឆ្នាំ២០២១ ប្រមូលចំណូលពន្ធ-អាករគ្រប់ប្រភេទបានចំនួន ៧៧.៦០០,០០លានរៀល។ លទ្ធផលការប្រមូលចំណូលពន្ធ-អាករ គ្រប់ប្រភេទបានចំនួន១០០.៧១៩,៤៩លានរៀល។ លទ្ធផលប្រមូលចំណូលពន្ធ-អាករ គ្រប់ប្រភេទបានចំនួន ១០០.៧១៩,៤៩ លានរៀល ស្មើនឹង១២៩,៧៩ភាគរយ។
ក្នុងរយៈពេលពីរខែដើមឆ្នាំ២០២២ សាខាពន្ធដារប្រមូលចំណូលពន្ធ-អាករគ្រប់ប្រភេទបានប្រមាណ៤,៩០លានដុល្លារ ស្មើនឹង១៨,៨៧ភាគរយ នៃផែនការឆ្នាំ២០២២ ប្រមាណជា២៥,៩៧លានដុល្លា ក្នុងនោះចំណូលថវិកាថ្នាក់ជាតិប្រមូលបានចំនួន ៤.៣៥៤,៨២លានរៀល ស្មើនឹង ១៥ភាគរយ។
ចំណូលថវិការរដ្ឋបាលថ្នាក់ក្រោមជាតិ ប្រមូលបានចំនួន ១៥.២៥២,៥៦លានរៀល ស្មើនឹង ២០ភាគរយ។ ចំណូលបូកបន្តរយ:ពេល២ខែ ក្នុងឆ្នាំ២០២២ មានការកើនឡើងចំនួន ៤.១៤០,៩៨លាន រៀល ស្មើនឹង ២៥,០២ភាគរយ ធៀបនឹងរយៈពេលដូចគ្នាឆ្នាំ២០២១។
លោកអភិបាលខេត្ត ក៏បានណែនាំដល់សាខាពន្ធដារខេត្ត ក៏ដូចជាអាជ្ញាធរក្រុង ស្រុក ឃុំ សង្កាត់ បន្តខិតខំជំរុញកៀរគរចំនូលពន្ធនៅតាមក្រុង ស្រុក មានដូចពន្ធលើឈ្នួលផ្ទះ អាករសម្រាប់បំភ្លឺសាធារណៈ អាករលើការស្នាក់នៅ ពន្ធប៉ាតង់ ពន្ធលើមធ្យោបាយ ពន្ធប្រថាប់ត្រា ពន្ធអចលនទ្រព្យ ពន្ធលើដីធ្លីមិនបានប្រើប្រាស់។ល៕
