ដោយៈ សុផារី
ព្រះសីហនុៈ ពិធីផ្សព្វផ្សាយស្តីពីការរៀបចំក្រុងព្រះសីហនុ ក្រុងកោះរ៉ុង និងតំបន់តារាសាគរខេត្តកោះកុង ជាគោលដៅទទួលទេសចរណ៍វ៉ាក់សាំង បានប្រព្រឹត្តទៅនាព្រឹកថ្ងៃទី០១ ខែវិច្ឆិកា ឆ្នាំ២០២១ ក្រោមអធិបតីភាពលោកថោង ខុន រដ្ឋមន្ត្រីក្រសួងទេសចរណ៍ និងលោក គួច ចំរើន អភិបាលនៃគណៈអភិបាល ខេត្តព្រះសីហនុ និងមានការចូលរួមតាមប្រព័ន្ធ Zoom Meeting ដោយលោកស្រីអភិបាលខេត្តកោះកុងផងដែរ។
បើកទទួលភ្ញៀវទេសចរអន្តរជាតិ នឹងចាប់ផ្តើមនៅថ្ងៃទី៣០ ខែវិច្ឆិកា ឆ្នាំ២០២១ តទៅដោយផ្តើមដំបូងនៅក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងតំបន់តារាសាគរនៃខេត្តកោះកុង។ កម្មវិធីទេសចរណ៍វ៉ាក់សាំង អនុញ្ញាតឱ្យភ្ញៀវទេសចរអន្តរជាតិស្នាក់នៅ និងទស្សនាក្នុងតំបន់ ឬគោលដៅទេសចរណ៍សុវត្ថិភាពរយៈពេល៥ថ្ងៃ ដោយមិនតម្រូវឱ្យធ្វើចត្តាឡីស័កក្នុងសណ្ឋាគារ។
ទន្ទឹមនឹងដំណើរការទេសចរណ៍វ៉ាក់សាំង ទេសចរណ៍ផ្ទៃក្នុងក៏កំពុងចលនាជម្រុញផងដែរដោយដាក់ចេញវិធានការចាំបាច់នានា ដើម្បីធានាបានសុវត្ថិភាព ដូចជា ទី១.ការលើកកម្ពស់ទំនុកចិត្ត និងភាពជឿជាក់របស់ភ្ញៀវទេសចរផ្ទៃក្នុង។ ទី២.ការជំរុញដំណើរការឡើងវិញរបស់អាជីវកម្ម- ប្រតិបត្តិការទេសចរណ៍តាមគន្លងប្រក្រតីភាពថ្មី ទី៣.បង្កលក្ខណៈងាយស្រួលដល់ភ្ញៀវទេសចរផ្ទៃក្នុង។
ទិ៤.ការអភិវឌ្ឍផលិតផលទេសចរណ៍ បម្រើឱ្យចលនាទេសចរណ៍ផ្ទៃក្នុង ទី៥.ផ្សព្វផ្សាយ អប់រំ និងបញ្ជ្រាបការយល់ ដឹងជាសាធារណៈ និងទាមទារការចូលរួមពីគ្រប់ភាគីពាក់ព័ន្ធ។
ស្របពេលដែលក្រសួងទេសចរណ៍ បានដាក់ចេញផែនការយុទ្ធសាស្ត្រកំណត់នូវគោលដៅសំខាន់៤ដូចជា ១.ការកំណត់ប្រភពទីផ្សារដែលមានសក្តានុពល សុវត្ថិភាព និងហានិភ័យទាប។ ២.ការគ្រប់គ្រងលំហូរភ្ញៀវទេសចរអន្តរជាតិ ដើម្បីបង្ការ ទប់ស្កាត់ និងកាត់បន្ថយការឆ្លងរាលដាល។ ៣.ការពង្រឹងសុវត្ថិភាព និងគុណភាពសេវាកម្មទេសចរណ៍កម្ពុជា ស្របតាមគន្លងប្រក្រតីភាពថ្មី។ ៤.បង្កើនទំនុកចិត្ត និងភាពជឿជាក់គ្នាទៅវិញទៅមករវាងប្រភពទីផ្សារ និងគោលដៅទេសចរណ៍កម្ពុជា។
លោក គួច ចំរើន អភិបាលខេត្តព្រះសីហនុ សំដែងការអបអរសាទរនិងបានរំពឹងថាតាមរយៈការបើកទទួលទេសចរវ៉ាក់សាំង និងការសម្របសម្រួលឲ្យប្រជាពលរដ្ឋ អាចធ្វើដំណើរបានទូលំទូលាយ ជាគោលនយោបាយលើកកម្ពស់ទេសចរណ៍ ផ្ទៃក្នុងរបស់កម្ពុជានឹងអាចផ្តល់កាលានុវត្តភាព ធ្វើអោយអាជីវកម្មទេសចរណ៍ដើរឡើងវិញ ដើម្បីជួយស្តារសេដ្ឋកិច្ចសង្គមនិងជីវភាពអាជីវករ និងពលរដ្ឋទូទៅមានភាពប្រសើរឡើង។
ជាមួយគ្នា លោក ថោង ខុន មានប្រសាសន៍ថា “ការផ្សព្វផ្សាយ ស្តីពីការរៀបចំក្រុងព្រះសីហនុ ក្រុងកោះរ៉ុង និងតំបន់តារាសាគរ ជាគោលដៅទទួលទេសចរណ៍វ៉ាក់សាំង ក្នុងចក្ខុវិស័ស្តារ និងអភិវឌ្ឍវិស័យទេសចរណ៍កម្ពុជា ចាប់ផ្តើមបើកទទួលទេសចរណ៍វ៉ាក់សាំងជាមួយការ គ្រប់គ្រងប្រកបដោយគុណភាព សុវត្ថិភាព និងនិរន្តរភាព តាមគន្លងប្រក្រតីភាពថ្មី”។
គោលបំណងបើកទទួលទេសចរណ៍អន្តរជាតិឡើងវិញ ជាជំហានៗឈរលើគោលការណ៍រក្សានូវតុល្យភាព រវាងសកម្មភាពសង្គមសេដ្ឋកិច្ច និងធានាសុវត្ថិភាព និងសុខភាពសាធារណៈសម្រាប់ប្រជាពលរដ្ឋ និងភ្ញៀវទេសចរ ស្របតាមស្មារតីនៃ “ការធ្វើដំណើរ និងទេសចរណ៍សុវត្ថិភាព” ។
លោក ថោង ខុនបានបន្តថា ជំហានទី១ យើងចាប់ផ្តើមទទួលទេសចរអន្តរជាតិឡើងវិញ ដោយកំណត់យកគម្រោងសាកល្បងនៅចុងខែវិច្ឆិកា ឆ្នាំ២០២១ ចាប់ផ្តើមនៅក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងតំបន់តារាសាគរនៃខេត្តកោះកុង និងបន្ទាប់មកនៅខេត្តសៀមរាប នៅខែមករា ឆ្នាំ២០២២។ ជំហានទី២ ការបើកឡើងវិញតាមតំបន់ទទួលទេសចរអន្តរជាតិ មកតាមតំបន់ទេសចរណ៍សុវត្ថិភាពផ្សេងទៀត។
លោកបានបន្តថា “បើជំហានដំបូងនេះបានជោគជ័យ ជំហានទី៣នឹងការបើកឡើងវិញទាំងស្រុងទទួលទេសចរណ៍ វ៉ាក់សាំងពេញលេញនៅទូទាំងប្រទេសតែម្តង”៕
