ដោយៈសហសេវិក
ភ្នំពេញៈ លទ្ឋផលនៃការសិក្សាថ្មីមួយបានបង្ហាញថា ឈាមប្រភេទណាក៏ដោយ ក៏ប្រឈមនឹងហានិភ័យឆ្លងជំងឺកូវីដ១៩ដូចគ្នា ខណៈមានការស្រាវជ្រាវដែលនិយាយថា ឈាមប្រភេទ A មានហានិភ័យខ្ពស់ជាងគេនឹងការឆ្លងមេរោគកូវីដ១៩ និងឈាមប្រភេទ O វិញមានហានិភ័យទាបជាងគេ។
ដើម្បីដោះស្រាយចម្ងល់នេះ អ្នកស្រាវជ្រាវបានធ្វើការសិក្សាស្រាវជ្រាវទ្រង់ទ្រាយធំមួយចំពោះមនុស្ស១០៧,០០០ នាក់ដែលមានអាយុជាមធ្យម ៤២ឆ្នាំ។ ក្រោយមកគេឃើញមានមនុស្សចំនួន ១១០០០នាក់ វិជ្ជមានកូវីដ១៩ និង៩៦០០០នាក់អវិជ្ជមាន។
តាមការស្រាវជ្រាវដែលចេញផ្សាយ កាលពីថ្ងៃទី៥ មេសាកន្លងមកបានរកឃើញថា ក្នុងចំណោមមនុស្ស ដែលតេស្តឃើញវិជ្ជមាននោះ គឺមនុស្សកាន់តែចាស់និងមនុស្សប្រុសមាន ស្ថានភាពគ្លីនិកធ្ងន់ធ្ងរជាងគេ។
នៅក្នុងការវិភាគ គេមិនឃើញមានការទាក់ទងគ្នា រវាងកូវីដ១៩ និងប្រភេទឈាមទេ។ គេមិនឃើញ មានការកើនឡើងឬថយចុះ ដោយសារតែប្រភេទឈាមឡើយចំពោះការធ្វើតេសត្តវិជ្ជមាន ឬការចូលព្យាបាលនៅមន្ទីរពេទ្យ ឬក៏ការចូលកន្លែងសង្គ្រោះបន្ទាន់។
ដូច្នេះប្រជាជនកម្ពុជាទាំងអស់ ត្រូវឈប់យល់ច្រឡំពីបញ្ហានេះ ហើយប្រឹងប្រែងការពារខ្លួនអោយបាន គ្រប់គ្នាតាមរយះការអនុវត្តវិធានការ បីការពារ និង បីកុំព្រមទាំងចាក់វ៉ាក់សាំងអោយបានគ្រប់គ្នាហើយ ត្រូវអនុវត្តន៍តាមការណែនាំរបស់ក្រសួងសុខាភិបាល៕
ប្រភព Health.com.kh៕
