រដ្ឋមន្រ្តីពាណិជ្ជកម្មស្នើមីយ៉ាន់ម៉ាពិនិត្យលទ្ធភាពបង្កើនការនាំចូលផលិតផលកសិកម្មពីកម្ពុជា

ដោយ៖ សូរិយា

ភ្នំពេញ៖ លោករដ្ឋមន្រ្តីក្រសួងពាណិជ្ជកម្ម បានស្នើឱ្យភាគីមីយ៉ាន់ម៉ា ពិនិត្យលទ្ធភាពជួយជំរុញឱ្យមានការនាំចូលផលិតផលកសិកម្មមានសក្តានុពលពីកម្ពុជា ដូចជា ស្វាយ ចេកសម្ងួត មៀន ផ្លែបឺរ គ្រាប់ស្វាយចន្ទី ដំឡូងជ្វា ម្ទេស ល្ង និងស្ករត្នោត ទៅកាន់ទីផ្សារមីយ៉ាន់ម៉ាបន្ថែមទៀត។

ការស្នើសុំខាងលើនេះ លោករដ្ឋមន្រ្តី ប៉ាន សូរស័ក្តិ ជាប្រធាន នៃកិច្ចប្រជុំរដ្ឋមន្រ្តីសេដ្ឋកិច្ចអាស៊ាន និងកិច្ចប្រជុំក្រុមប្រឹក្សាសហគមន៍សេដ្ឋកិច្ចអាស៊ានឆ្នាំ២០២២ ធ្វើឡើងក្នុងជំនួបការងារជាមួយលោក Thit Linn Ohn ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសហភាពមីយ៉ាន់ម៉ាប្រចាំកម្ពុជា ក្នុងគោលដៅពង្រឹងកិច្ចសហប្រតិបត្តិការពាណិជ្ជកម្មទ្វេភាគីរវាងប្រទេសទាំងពីរ កាលពីថ្ងៃទី១៤ ខែកក្កដា ឆ្នាំ២០២២នេះ នៅទីស្តីការក្រសួង។

ក្នុងជំនួបនេះ លោករដ្ឋមន្រ្តី បានជម្រាបជូនអំពីវឌ្ឍនភាពនៃការរៀបចំសមិទ្ធផលសេដ្ឋកិច្ចអាទិភាពកម្ពុជាទាំង១៩ ក្រោមសសរស្តម្ភសហគមន៍សេដ្ឋកិច្ចអាស៊ាន និងស្នើឱ្យប្រទេសមីយ៉ាន់ម៉ាបន្តការចូលរួមរៀបចំ និងគំាទ្រ សំដៅអាចសម្រេចបានដោយជោគជ័យក្រោមភាពជាប្រធានអាស៊ានរបស់កម្ពុជា។

ជាមួយគ្នានេះ លោកក៏បានជម្រាបជូនភ្ញៀវ អំពីសក្តានុពលធុរកិច្ច និងវិនិយោគនៅកម្ពុជា ក៏ដូចជាយុទ្ធសាស្រ្តដ៏មុតស្រួចរបស់រាជរដ្ឋាភិបាលក្នុងការស្តារ និងអភិវឌ្ឍសេដ្ឋកិច្ចកម្ពុជា ដែលធ្វើឱ្យសេដ្ឋកិច្ចកម្ពុជារំពឹងថា នឹងមានកំណើន៦,៦% សម្រាប់ឆ្នាំ២០២៣ និង៧% នៅឆ្នាំបន្ទាប់។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ភាគីមីយ៉ាន់ម៉ា បានបង្ហាញពីការប្តេជ្ញាពង្រឹង និងពង្រីកកិច្ចសហប្រតិបត្តិការពាណិជ្ជកម្មរវាងប្រទេសទាំងពីរ និងពាំនាំនូវសំណើរបស់លោករដ្ឋមន្រ្តីទៅជម្រាបជូនដឹកនាំផងដែរ។ បន្ថែមពីនេះ លោកក៏បានស្នើសុំភាគីកម្ពុជាពិនិត្យលទ្ធភាពជំរុញកិច្ចសហប្រតិបត្តិការលើវិស័យសំខាន់ៗដទៃទៀត រួមមាន ការចៀសវាងការយកពន្ធត្រួតគ្នានិងការជំរុញ និងការពារការវិនិយោគ រវាងភាគីទាំងពីរផងដែរ។

ក្រសួងពាណិជ្ជកម្ម បានបញ្ជាក់ថា ក្នុងកិច្ចប្រជុំនោះ ភាគីទាំងពីរបានផ្លាស់ប្តូរយោបល់ និងពិភាក្សាលើការជំរុញពាណិជ្ជកម្មទ្វេភាគី ការលើកកម្ពស់ការចូលរួមសហការឱ្យកាន់តែជិតស្និទ្ធ រវាងសភាពាណិជ្ជកម្ម និងវិស័យឯកជននៃប្រទេសទាំងពីរ តាមរយៈការផ្គូរផ្គងធុរកិច្ច ការផ្លាស់ប្តូរទស្សនកិច្ចរវាងធុរជន សកម្មភាពពិព៍រណ៌ ព្រមទាំងការកំណត់ទំនិញសក្តានុពល រវាងប្រទេសទាំងពីរក្នុងការជំរុញការនាំចេញបន្ថែមទៀត។ ពិសេសជាងនេះទៅទៀត ភាគីទាំងពីរបានសម្តែងនូវការប្តេជ្ញាចិត្តបន្តកិច្ចសហការសម្របសម្រួល និងជំរុញសកម្មភាពធុរកិច្ចនិងវិនិយោគ ដើម្បីជំរុញកំណើនសេដ្ឋកិច្ច និងពាណិជ្ជកម្ម រវាងប្រទេសទាំង២ ឱ្យកាន់តែរីកចម្រើនបន្ថែមទៀត៕

LEAVE A REPLY

Please enter your comment!
Please enter your name here