ក្រុមហ៊ុន Vietnam Airlines លក់ភាគហ៊ុនតម្លៃ៣៥លានដុល្លារដើម្បីផ្ដាច់ខ្លួនចេញពី Cambodia Angkor Air

ដោយៈសុខុម

ហាណូយ: ក្រុមហ៊ុនអាកាសចរណ៍វៀតណាម Vietnam Airlines បានប្រកាសកាលពីថ្ងៃទី២៧ ខែឧសភាកន្លងមកថា ខ្លួនបានបញ្ចប់ដំណើរការផ្ទេរភាគហ៊ុន៣៥%របស់ខ្លួន នៅក្នុងក្រុមហ៊ុនអាកាសចរណ៍កម្ពុជា Cambodia Angkor Air ឱ្យទៅភាគហ៊ុនិកថ្មីជាស្ថាពរហើយ ក្រោមការព្រមព្រៀងរវាងភាគីទាំង២ក្នុងកិច្ចសន្យាផ្ទេរភាគហ៊ុន។

ក្រុមហ៊ុនអាកាសចរណ៍វៀតណាម Vietnam Airlines បានបញ្ជាក់ថា បន្ទាប់ពីការផ្ទេរនេះ ក្រុមហ៊ុន Cambodia Angkor Air លែងជាប់ពាក់ព័ន្ធនឹងខ្លួនទៀតហើយ។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃពុធ ទី១ ខែមិថុនា។

យោងតាមរបាយការណ៍ហិរញ្ញវត្ថុមួយបង្ហាញថា ក្រុមហ៊ុនអាកាសចរណ៍វៀតណាមមួយនេះ បានទទួលប្រាក់មួយលើកចំនួន៣០លានដុល្លារអាមេរិក នៅថ្ងៃទី៣ ខែមករា ឆ្នាំ២០២២ និងមួយលើកទៀតចំនួន៤លានដុល្លារអាមេរិក នៅថ្ងៃទី២៩ ខែមីនា ឆ្នាំ២០២២ ពីអ្នកវិនិយោគសម្រាប់ការទិញយកភាគហ៊ុនក្នុងក្រុមហ៊ុន Cambodia Angkor Air។

ក្រុមហ៊ុននេះ ក៏បានទទួលប្រាក់កក់ចំនួន១លានដុល្លារអាមេរិក ក្នុងឆ្នាំ២០១៩ ផងដែរ។ ទឹកប្រាក់សរុបចំនួន៣៥លានដុល្លារអាមេរិក ខាងលើនេះ គឺជាការទូទាត់ថ្លៃទិញយកភាគហ៊ុនទាំង៣៥% របស់ខ្លួននៅក្នុងក្រុមហ៊ុន Cambodia Angkor Air។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ការទូទាត់ទើបតែធ្វើឡើងក្នុងឆ្នាំ២០២២ នេះប៉ុណ្ណោះ ប៉ុន្តែការផ្ទេរកម្មសិទ្ធិភាគហ៊ុនធ្វើឡើងតាំងពីឆ្នាំ២០២១ មកម៉្លេះ។

ប្រាក់ចំណូលដែលបានពីការលក់ភាគហ៊ុននេះ ជួយក្រុមហ៊ុនអាកាសចរណ៍វៀតណាម Vietnam Airlines កាត់បន្ថយបានមួយចំនួនធំនូវការខាតបង់របស់ខ្លួនក្នុងឆ្នាំ២០២១។

ក្រុមហ៊ុនអាកចរណ៍ Cambodia Angkor Air ត្រូវបានបង្កើតឡើងក្នុងឆ្នាំ២០០៩ ក្រោមកិច្ចសហប្រតិបត្តិការ រវាងក្រុមហ៊ុនអាកាសចរណ៍វៀតណាម Vietnam Airlines និងរាជរដ្ឋាភិបាលកម្ពុជា៕ Vietnam News៕

LEAVE A REPLY

Please enter your comment!
Please enter your name here