ដោយៈលក្ខិណា
ភ្នំពេញៈ សហគ្រាសធុនតូច និងមធ្យមកម្ពុជា (SME) នឹងកាន់តែមានជម្រើសនិងមានភាពងាយស្រួល ក្នុងការស្វែងរកហិរញ្ញវត្ថុ ក្នុងការបន្តដំណើរការអាជីវកម្មឬពង្រីកអាជីវកម្មនៅក្នុងវិបត្តិកូវីដ១៩នេះ ខណៈធនាគារនិងមីក្រូហិរញ្ញវត្ថុកាន់តែច្រើនបានចាប់ផ្ដើមបញ្ចេញកញ្ចប់ ហិរញ្ញប្បទានសម្រាប់វិស័យ SME នៅកម្ពុជា។
ជាការកត់សម្គាល់មួយរយៈចុងក្រោយថ្មីៗនេះ បណ្ដាស្ថាប័នហិរញ្ញវត្ថុជាច្រើនរួមទាំងធនាគារ និងមីក្រូហិរញ្ញវត្ថុ បានប្រកាសពីការផ្ដល់កម្ចីបន្ថែម ទៅដល់សហគ្រាសក្នុងវិស័យសហគ្រាសធុនតូច និងមធ្យមកម្ពុជា ក្នុងពេលដែលវិស័យនេះ នៅតែបន្តជួបបញ្ហានឹងលំហូរសាច់ប្រាក់ ក្នុងការទូទាត់បង្វិលក្នុងអាជីវកម្មរបស់ខ្លួន។
ជាក់ស្ដែងធនាគារធំៗកាលពីពេលថ្មីៗនេះ បានប្រកាសសហការក្នុងការផ្ដល់ឥណទានដល់សហគ្រាសធុនតូច និងមធ្យមកម្ពុជា សម្រាប់ប្រើប្រាស់ក្នុងដំណើរការអាជីវកម្ម បន្តរក្សាលំនឹងអាជីវកម្មក្នុងវិបត្តិកូវីដ១៩ និងត្រៀមខ្លួនក្នុងការស្ដារនូវអាជីវកម្ម ក្រោយពេលវិបត្តិកូវីដ១៩ ។
នៅក្នុងសេចក្តីប្រកាសព័ត៌មានរបស់ធនគារប្រៃសណីយ៍កម្ពុជា និងធនាគារសហគ្រាសធុនតូច និងមធ្យមកម្ពុជាកាលពីចុងសប្ដាហ៍មុននេះ បានបញ្ជាក់ថា ស្ថាប័នទាំងពីរបានត្រៀមខ្លួន ក្នុងការសហការគាំទ្រផ្នែកហិរញ្ញវត្ថុ តាមរយៈការផ្ដល់កម្ចីជូនសហគ្រាសធុនតូចនិងមធ្យមកម្ពុជា ក៏ដូចជាម្ចាស់អាជីវកម្ម ក្នុងការបន្តរក្សាលំនឹងអាជីវកម្មរបស់ខ្លួនក្នុងគ្រាដ៏លំបាក និងត្រៀមខ្លួនងើបឡើងវិញក្រោយវិបត្តិកូវីដ១៩។
គម្រោងសហហិរញ្ញប្បទាននេះ ផ្ដោតសំខាន់លើការផ្ដល់ឥណទាន ដើម្បីជំរុញការអភិវឌ្ឍសហគ្រាសធុនតូច និងមធ្យម ក្នុងវិស័យអាទិភាពមួយចំនួន ដូចជា ឧស្សាហកម្ម សេវាកម្ម និងពាណិជ្ជកម្ម សម្រាប់ជំនួសឱ្យការនាំចូលបម្រើសេចក្តីត្រូវការ បម្រើជាធាតុចូលក្នុងការផលិតរបស់ក្រុមហ៊ុនធំៗជាដើម ។
ដោយឡែកគ្រឹះស្ថានមីក្រូហិរញ្ញវត្ថុជាច្រើនទៀត ក៏បានប្រកាសពីការចូលរួមក្នុងការផ្ដល់ហិរញ្ញប្បទានដល់សហគ្រាសធុនតូច និងមធ្យម ដើម្បីយកប្រើប្រាស់បន្តអាជីវកម្ម និងត្រៀមក្នុងការស្ដារអាជីវកម្មនៅពេលឆាប់ៗនេះ ។
លោកស៊ាង សុបញ្ញាប្រធានសមាគមសហគ្រិនវ័យក្មេងកម្ពុជាបានថ្លែងថា បើសិនជាមិនមានវិបត្តិ ដោយសារតែកូវីដ១៩នោះទេ លោកជឿថាសហគ្រិន មិនស្វះស្វែងក្នុងការរកជំនួយពីស្ថាប័នហិរញ្ញវត្ថុផ្សេងៗ ក្នុងការជួយខ្លួនឡើយ តែដោយសារតែសហគ្រិនជាច្រើន បានជួបវិបត្តិនឹងលំហូរសាច់ប្រាក់ ផលិតបានហើយតែមិនអាចលក់ចេញព្រោះតែបាត់បង់តម្រូវការទីផ្សារ ទើបធ្វើឱ្យពួកគេត្រូវការហិរញ្ញវត្ថុ សម្រាប់បង្វិលទៅវិញទៅមក ។
រដ្ឋាភិបាលនៅតែចាត់ទុកវិស័យសហគ្រាសធុនតូច និងមធ្យមជាវិស័យសំខាន់ និងជាឆ្អឺងខ្នងសេដ្ឋកិច្ចកម្ពុជា ដោយវិស័យនេះ បានផ្ដល់ឱកាសការងារដល់ពលរដ្ឋច្រើនជាងគេ ដែលអាចនាំប្រាក់ចំណូលដល់ប្រជាពលរដ្ឋ ក្នុងការផ្គត់ផ្គង់គ្រួសារ រួមចំណែកដល់ការនាំចេញរបស់កម្ពុជាផងដែរ៕
