ដោយគង់ ម៉ាលីន
ភ្នំពេញៈ អគ្គនាយកគណៈកម្មការមូលបត្រកម្ពុជា (SECC) លោកស៊ូ សុជាតិបានសម្តែងសុទិដ្ឋិនិយម និងមើលឃើញចន្លោះកាន់តែធំ ក្នុងការអភិវឌ្ឍវិស័យមូលបត្រនៅកម្ពុជា។
លោកបានមានប្រសាសន៍ឲ្យដឹងកាលពីចុងសប្តាហ៍មុន តាមរយៈបទសម្ភាសន៍ផ្តាច់មុខជាមួយសារព៌តមានល្បីក្នុងស្រុកមួយថា បច្ចុប្បន្នគណៈកម្មការមូលបត្រកម្ពុជា បាន និងកំពុងជំរុញ និងគៀរគរវិស័យផ្សេងៗចូលក្នុងវិស័យមូលបត្រកម្ពុជា ដោយក្នុងនោះនឹងមានក្រុមហ៊ុនមកពីវិស័យអចលនទ្រព្យ វិស័យសណ្ឋាគារ និងវិស័យធានារ៉ាប់រងដែលអាចនឹងឈានជើងចូល ក្នុងវិស័យមូលបត្រកម្ពុជា ក្នុងពេលខាងមុខ។
លោកបានបន្តថា “ការចាប់ផ្ដើមដំបូងក្នុងវិស័យមូលបត្រ រាជរដ្ឋាភិបាលបានគាំទ្រដំណើរការទីផ្សារ តាមរយៈការដាក់ក្រុមហ៊ុនរដ្ឋមួយចំនួន ដើម្បីចុះបញ្ជីក្នុងទីផ្សារមូលបត្រ ហើយបន្ទាប់ពីមានក្រុមហ៊ុនរដ្ឋក៏មានក្រុមហ៊ុនឯកជន ចាប់ផ្ដើមចាប់អារម្មណ៍លើវិស័យនេះជាបន្ដបន្ទាប់ ដោយមានវិស័យធនាគារ និងវិស័យមិនមែនធនាគារ” ។
លោក ស៊ូ សុជាតិបានមានប្រសាសន៍ឲ្យដឹងថា គណៈកម្មការមូលបត្រកម្ពុជា តែងតែសម្លឹងមើលលើក្រុមហ៊ុនទាំងឡាយណា ដែលមានភាពរួចរាល់ ជាក់ស្ដែងដូចវិស័យហិរញ្ញវត្ថុ គឺជាវិស័យមួយ ដែលក្រុមហ៊ុនមានភាពរួចរាល់មុនគេ តាំងពីផ្នែករបាយការណ៍ហិរញ្ញវត្ថុ ផ្នែកអភិបាលកិច្ចសាជីវកម្មជាដើម។ ដូច្នេះបានជាអ្នកទាំងអស់គ្នាឃើញថា ផ្នែកហិរញ្ញវត្ថុបានឈានជើងចូលទីផ្សារមូលបត្រមុនគេ។
លោកបានបន្តទៀតថា បន្ទាប់ពីវិស័យធនាគារ គណៈកម្មការមូលបត្រកម្ពុជា ក៏ដូចជាផ្សារមូលបត្រ បានសម្លឹងឃើញវិស័យ៣រួមមាន វិស័យធានារ៉ាប់រង វិស័យអចលនទ្រព្យ។
លោកបន្តថា “ខ្ញុំគិតថាប្រហែលជាចុងឆ្នាំ២០២០នេះ យើងនឹងទទួលបានសំណើពីក្រុមហ៊ុនអចលនទ្រព្យ មកបោះផ្សាយលក់មូលបត្របំណុល និងមូលបត្រកម្មសិទ្ធិ និងវិស័យសណ្ឋាគារ ជាវិស័យដែលកំពុងជំរុញ ក្នុងការចូលលើទីផ្សារមូលបត្រកម្ពុជា ដោយវិស័យទាំង៣នេះ នឹងឈានជើង ចូលក្នុងទីផ្សារមូលបត្រក្នុងពេលឆាប់ៗខាងមុខនេះ” ៕