ដោយៈ សាវុធ
ភ្នំពេញៈ ពិបាកណាស់មែនទេ ក្នុងការអត់ទ្រាំមិនចាយលុយផ្ដេសផ្ដាស ពេលឃើញរបស់ចង់បាន? តើអ្នកជាមនុស្សម្នាក់ ដែលមានលុយក្នុងដៃតែទុកមិនបានយូរ ចង់តែទិញរបស់នេះរបស់នោះ ដូចគោដាច់កន្លុះដែរឬទេ?។
ខាងក្រោមនេះ ជាយុទ្ធសាស្ត្រខ្លះៗដើម្បីហាត់ពត់ផ្លូវចិត្ត និងគ្រប់គ្រងខ្លួនឯងពីការចាយវាយផ្តេសផ្តាស ដូចជា ទី១ នៅផ្ទះឲ្យបានច្រើនបើមិនចង់ចាយលុយ។ ស្ដាប់ទៅមានម្យ៉ាងដែរ តែវាមិនមែនជាវិធីសាស្ត្រល្អនោះទេ ព្រោះអ្នកអាចនឹងស្ទះខ្យល់ ស្មុគ្រស្មាញក្នុងចិត្តបើមិនបានចេញក្រៅ។
ជាធម្មតាទេនៅក្នុងសង្គមខាងក្រៅ អ្នករមែងមានមិត្តភក្តិហៅទៅនេះ ទៅនោះដើម្បីជួបជុំគ្នា យ៉ាងហោចណាស់ក៏ពីរឬបីដងដែរក្នុងមួយអាទិត្យ។ ដូច្នេះដើម្បីជៀសវាងការចំណាយច្រើន អ្នកគួរហាត់ពត់លត់ដំចិត្តខ្លួនឯង និងរៀនច្រានចោលនូវការអញ្ជើញខ្លះហើយងាកមកសោយសុខនៅក្នុងផ្ទះ ជំនួសដោយការអានសៀវភៅ ធ្វើកិច្ចការផ្ទះ មើលទូរទស្សន៏ឬចំណាយពេលជាមួយគ្រួសារ។
ទី២ បង្កើត “តារាងបញ្ជី៣០ថ្ងៃ” រាល់ពេលដែលឃើញអ្វីដែលចង់បាន អ្នកគួរកត់វាទុកក្នុងបញ្ជីខាងលើ ហើយពិសោធន៏ខ្លួនឯងមើលថា តើអ្នកអត់វាឬត្រូវការវាចាំបាច់ដែរឬទេក្នុងរយៈពេល៣០ថ្ងៃនេះ? បើចាំបាច់ម្ល៉េះត្រូវត្បិតត្បៀតសន្សំខ្លះដើម្បីវា តែបើជារឿងតូចតាចម្ល៉េះ ត្រូវចាត់ការចំណង់ខុសរបៀបនេះចោលតាមការគួរ។ ការធ្វើបែបនេះជួយឲ្យអ្នកស្វែងយល់ពីខ្លួនបានច្រើន ថែមទាំងបង្កើនការអត់ធ្មត់។
ទី៣ ត្រូវចេះកំណត់ថវិកា និងលកលៃយ៉ាងណាចាយ ឲ្យគ្រប់សម្រាប់មួយខែ។ ឧទាហរណ៍ អ្នកទម្លាប់ចំណាយ១០០ដុល្លារប្រចាំខែ ទៅលើអាហារពេលល្ងាច ដូចនេះត្រូវចាយយ៉ាងណា ឲ្យស្ថិតក្នុងដែនកំណត់ ករណីណាដែលចាយអស់មុនថ្ងៃកំណត់ ដូចនេះ អ្នកប្រហែលជាត្រូវគិតគូររឿងមីកញ្ចប់ ឬបាយផ្ទះរហូតដល់ខែថ្មី។ ទម្លាប់បែបនេះល្អបំផុតសម្រាប់អ្នកចូលចិត្តចាយលុយសល់ថ្ងៃ៕ Spean៕