ដោយ វិសាល
ភ្នំពេញៈ ក្រុមហ៊ុនខ្នាតយក្សរបស់កូរ៉េខាងត្បូង គឺក្រុមហ៊ុន Booyoung Khmer2 Co, Ltd ដែលជាបុត្រសម្ព័ន្ឋរបស់ក្រុមហ៊ុន Booyoung Group បានចាប់ផ្តើមចាប់យកចំណែកទីផ្សារលំនៅដ្ឋានលក្ខណៈជាបុរីនៅទីក្រុងភ្នំពេញហើយ។
ក្រុមហ៊ុននេះ បានចាប់ផ្តើមប្រកាសលក់លំនៅដ្ឋាន ក្នុងបុរី ប៊ូយ៉ុង សែនសុខនៅថ្ងៃទី២៩ កក្កដានេះ ជាមួយលំនៅដ្ឋានទំនើបទាន់សម័យ និងអាចប្រកបអាជីវកម្មបាន។
លោកបណ្ឌិត LEE JOONGKEUN ប្រធានក្រុមប្រឹក្សាភិបាលក្រុមហ៊ុន Booyoung Group បានមានប្រសាសន៍ថា បុរីប៊ូយ៉ុង សែនសុខ ចាប់ផ្តើមលក់គម្រោងបុរីនាថ្ងៃទី ២៩ ខែកក្កដា ឆ្នាំ ២០២០ ដែលមានលំនៅដ្ឋានសរុបចំនួន ៧១៦ ផ្ទះ រួមមានផ្ទះប្រភេទសបហៅស៍ ផ្ទះល្វែង ផ្ទះលីង វីឡាភ្លោះ វីឡាឃ្វីន វីឡាឃីង ដែលបានសាងសង់លើផ្ទែដី១១ម៉ឺនម៉ែត្រក្រឡា ស្ថិតនៅភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។
ចំណែក លោក CHOI JUN YOUNG នាយកបុរីប៊ូយ៉ុង សែនសុខបានមានប្រសា សន៍ឲ្យដឹងផងដែរថា បុរីប៊ូយ៉ុងសែនសុខ ជាគម្រោងដំបូង ដែលចាប់ផ្តើមលក់ផ្ទះនៅកម្ពុជា ហើយរំពឹងថានឹងនាំមកនូវការកែលំអរ គុណភាពនៅក្នុងទីផ្សារ លំនៅដ្ឋាននៅកម្ពុជា។
ទីតាំងបុរីនេះ នឹងចូលរួមពង្រឹងគុណភាពជីវិត ដោយនៅដាច់ដោយឡែកពីគេ គម្រោងបុរីប៊ូយ៉ុងសែនសុខ មានទីតាំងកៀកនឹងផ្សារទំនើប EAON Mall2 ដោយចំណាយពេលធ្វើដំណើរត្រឹមតែ5 ផ្សារទំនើបម៉ាក្រូ និងផ្សារទំនើបគ្លូប៊លហៅស៍។ ក្រៅពីនោះ គម្រោងបុរីប៊ូយ៉ុងសែនសុខ ក៏នៅជិតសាលាអន្តរជាតិមួយចំនួន ក៏ដូចជាក្លឹបវាយកូនហ្គោលផងដែរ។ បុរី ប៊ូយ៉ុង សែនសុខ មិនត្រឹមតែទាក់ទាញ ចំណាប់អារម្មណ៍វិនិយោគិនមួយចំនួនទេ ថែមទាំងទាក់ទាញចំណាប់អារម្មណ៍ អតិថិជនដែលមានបំណងរស់នៅពិតប្រាកដ។
ក្រុមហ៊ុន ប៊ូយ៉ុង គ្រុប គឺជាក្រុមហ៊ុនអភិវឌ្ឍន៍លំនៅដ្ឋានដ៏ធំបំផុត ក្នុងប្រទេសកូរ៉េខាងត្បូង។ ក្រុមហ៊ុនប៊ូយ៉ុង គ្រុបបានសាងសង់ និងផ្គត់ផ្គង់លំនៅដ្ឋានចំនួន២៨០,០០០ផ្ទះរួចមកហើយ បើគិតចាប់តាំងពីឆ្នាំ១៩៨៣ ដោយផ្អែកលើបច្ចេកវិទ្យាសាងសង់លំនៅដ្ឋានទំនើបៗទាំងនេះ ក្រុមហ៊ុនបានប្តេជ្ញាសាងសង់ ផ្គត់ផ្គង់លំនៅដ្ឋាន ដែលមានសុវត្ថិភាពបំផុតដើម្បីបំពេញតម្រូវការរបស់ប្រជាជនក្នុងប្រទេសកម្ពុជា៕
