ធនាគារអាស៊ីបូព៌ាប្រកាសលក់អាជីវកម្មធានារ៉ាប់រងអាយុជីវិតទៅឱ្យក្រុមហ៊ុនAIAក្នុងតម្លៃ៦៥៣លានដុល្លារ

ដោយៈ សុខុម

ហុងកុង: ធនាគារអាស៊ីបូព៌ា (Bank of East Asia – BEA) បានប្រកាសថា ខ្លួននឹងលក់អាជីវកម្មធានារ៉ាប់រងអាយុជីវិតរបស់ខ្លួនឱ្យទៅក្រុមហ៊ុនធានារ៉ាប់រងអាយុជីវិតធំបំផុតនៅក្រុងហុងកុង AIA Group Limited។ នេះបើយោងតាមកាសែត South China Morning Post ចុះផ្សាយកាលពីថ្ងៃពុធ ទី២៤ មីនា។

យោងតាមសេចក្តីថ្លែងការណ៍មួយឱ្យដឹងថា ធនាគារ BEA ដែលមានមូលដ្ឋាននៅក្រុងហុងកុង ដែរនេះនឹងទទួលបានសាច់ប្រាក់៥,០៧ពាន់លានដុល្លារហុងកុង (៦៥៣ លានដុល្លារអាមេរិក) ពីការលក់នេះ ហើយនឹងក្លាយជាអ្នកចែកចាយផ្តាច់មុខនូវសេវាកម្មធានារ៉ាប់រងអាយុជីវិត និងផលិតផលដាក់សន្សំប្រាក់រយៈពេលវែងរបស់ក្រុមហ៊ុន AIA នៅក្រុងហុងកុង ម៉ាកាវ និងនៅទីក្រុងចិន ដីគោកចំនួន ៩ ក្នុងតំបន់ Greater Bay Area (GBA) (ខេត្តគ័ងតុង-ក្រុងហុងកុង-ម៉ាកាវ) រយៈពេល ១៥ ឆ្នាំ។

លោក Jacky Chan នាយកប្រតិបត្តិប្រចាំតំបន់របស់ក្រុមហ៊ុន AIA បានលើកឡើងតាមរយៈរបាយការណ៍ផ្ញើទៅកាន់ផ្សារហ៊ុនក្រុងហុងកុង ថា “សមត្ថភាពបន្ថែម និងកាន់តែទូលំទូលាយ របស់យើងនៅទូទាំងតំបន់ GBA ធ្វើឱ្យក្រុមហ៊ុន AIA និងធនាគារ BEA មានលទ្ធភាពកសាងភាពជាដៃសហការដ៏ល្អគ្មានពីរ និងទាញយកសក្តានុពលកំណើន នៅពេលតំបន់កំពុងរីកចម្រើន”។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ធនាគារ BEA នឹងទទួលបានប្រាក់ចំណេញ១ពាន់លានដុល្លារហុងកុង (១២៨,៧ លានដុល្លារអាមេរិក) ពីការលក់នេះដែលត្រូវបានប្រកាសជាលើកដំបូង កាលពីខែកញ្ញា ឆ្នាំ២០២០ ក្រោយការពិនិត្យឡើងវិញរយៈពេលរាប់ខែ លើអាជីវកម្មនានារបស់ធនាគារ BEA ដែលជំរុញដោយក្ដីក្ដាំតុលាការដ៏អូសបន្លាយ របស់ម្ចាស់ភាគហ៊ុនជាមួយក្រុមហ៊ុនគ្រប់គ្រងមូលនិធិការពារហានិភ័យសហរដ្ឋអាមេរិក Elliott Management របស់លោក Paul Elliott ជុំវិញការតម្រង់ទិសរបស់ធនាគារនេះ។

ធនាគារចំណាស់រាប់សតវត្សរ៍ ដែលគ្រប់គ្រងដោយគ្រួសារត្រកូល លី (Li) ចាប់តាំងពីឆ្នាំ១៩១៨ មកនេះធ្លាប់បានលើកឡើងថា ការលក់ក្រុមហ៊ុនធានារ៉ាប់រង BEA Life នឹងជួយបង្កើនតម្លៃអាជីវកម្មរបស់ខ្លួន ធ្វើឱ្យស្ថានភាពហិរញ្ញវត្ថុរបស់ខ្លួនប្រសើរឡើង និងផ្ដល់លទ្ធភាពឱ្យគណៈគ្រប់គ្រងផ្ដោតលើប្រតិបត្តិការធនាគារ ដែលជាអាជីវកម្មស្នូលរបស់ខ្លួននៅក្រុងហុងកុង និងចិនដីគោក៕

LEAVE A REPLY

Please enter your comment!
Please enter your name here